කළම්බෝ කිංග්ස් පරාජයට පත් කරමින් දඹුල්ල වයිකින්ග් ජය වාර්තා කරයි

ඊයේ (01) දඹුල්ල වයිකින්ග් කණ්ඩායම හා කළම්බෝ කිංග්ස් කණ්ඩායම අතර පැවති තරගයෙන් ජය වාර්තා කිරීමට දඹුල්ල වයිකින්ග් කණ්ඩායම සමත් විය.

තරගයේ කාසියේ වාසිය දිනූ දඹුල්ල කණ්ඩායම ප්‍රථමයෙන් පන්දුවට පහරදුන් අතර එහි දී කඩුලු 9ක් දැවී ලකුණු 175ක් ලබා ගැනීමට සමත් විය.

දඹුලු පිලේ නායක දසුන් ශානක පන්දු 34ක දී හයේ පහර 4ක් සහ හතරේ පහර 3ක් සමඟ ලකුණු 56ක් ලබා ගත්තේය.

සමිත් පටෙල් ලකුණු 30ක් ද උපුල් තරංග ලකුණු 25ක් රැස් කරමින් තම කණ්ඩායම ශක්තිමත් කරන ලදි.

පන්දු යැවීමේ දී ඉසුරු උදාන සහ ඇන්ඩ්‍රි රසල් කඩුලු 3 බැගින් බඳ හෙලීමට සමත් විය.

ලකුණු 176ක ඉලක්කයක් සමඟ පිටියට පැමිණි කළම්බෝ කිංග්ස් කණ්ඩායමට හැකි වූයේ පන්දුවාර 18.4ක් අවසානයේ සියලු දෙනා දැවී ලකුණු 147ක් ලබා ගැනීමට පමණි.

ලව්රි එවන්ස් පන්දු 33ක දී හයේ පහර 4ක් සහ හතරේ පහර 5ක් සමග ලකුණු 59ක් රැස් කිරීමට සමත් විය.

කළම්බෝ කිංග්ස් කණ්ඩායම වෙනුවෙන් ක්‍රීඩා කළ අනෙකුත් පිතිකරුවන් හට ජයග්‍රාහී ඉලක්කය පසු කිරීමට නොහැකි විය.

පන්දු යැවීමේ දී පුලින තරංග, මාලින්ද පුෂ්පකුමාර, අන්වර් අලී සහ සමිත් පටෙල් කඩුලු 2 බැගින් බිඳ හෙලීමට සමත් විය.