අපි හිටියා නම් ඩීසල් 126යි පෙට්‍රල් 130යි – චම්පික රණවක
තමන්ගේ පාලනයක් තිබුනානම් ජනතාවට මේ තරම් දුක්විදින්නට සිදු නොවන බව පාඨලී චම්පික රණවක මන්ත්‍රිවරයා පවසනවා. තම පාලනයක් පැවතියේ නම් ඩීසල් ලීටරයක් රුපියල් 126කටත් පෙට්‍රල් ලීටරයක් රුපියල් 130කටත් ලබා දීමේ හැකියාව පැවතුන බව මන්ත්‍රිවරයා වැඩිදුරටත් අවධාරණය කරනවා.
වැඩිදුරටත් අදහස් දැක්වූ චම්පික රණවක මහතා,
“වෙළෙඳපොලේ තෙල් මිල පහලට ඇවිල්ලා තියෙනවා. බොරතෙල් මිල ඩොලර් 98 යි මේ වෙනකොට. ඉතින් ඇත්තටම යහපාලන කාලේ තිබුණු ඩොලරයට රුපියල් 180 ට තිබුනනම් සහ මේ මිලට ගත්තා නම්, අද වෙනකොට ඇත්තටම ඩීසල් ලීටරයක මිල වෙන්නේ, රුපියල් 126 යි. පෙට්‍රල් ලීටරයක් වෙන්නේ රුපියල් 130 යි.
එහෙමනම් රටේ ජනතාවට තේරෙනවා අද පෙට්‍රල්, ඩීසල් හිඟයට අමතරව කොයිතරම් මුදලක් මේ ආණ්ඩුව ඉන්ධනවලට පනවල තියෙන සහගහන බදු හරහා ජනතාවගෙන් පික් පොකට් ගහනවද කියලා මහජනතාව පෝලිම් වල ඉන්න අතරේ. මතක තබා ගන්න ආදායම් ඉතාමත්ම අඩු වෙලා තියෙන මේ අවස්ථාවේ දී පෙට්‍රල්, ඩීසල් වලින් රුපියල් 120 ට අධික ප්‍රමාණයක මුදල් බදු වලටත් අමතරව ලාභ හැටියට උපයා ගන්නවා.
ඒ වගේම ආණ්ඩුවේ වැරදි මූල්‍ය කළමනාකරණය නිසා අනෙක් පැත්තෙන් ජනතාවට මේවට වන්දි ගෙවන්න සිද්ධ වෙලා තිබෙනවා. ඒ වගේම මේ ආකාරයට මේ පෙට්‍රල්, ඩීසල් හෝ බොරතෙල් ගෙන්වීම ලංකාවට කරන්න බැහැ. මොකද මේ විදිහට යන්තම් චුට්ට චුට්ට කරගෙන මේ රීලෝඩ් ක්‍රමයට මේක කරගෙන යන්න පුළුවන් කමක් නැහැ.
ඒ සඳහා ස්ථිරසාර වැඩපිළිවෙලක් රටට අවශ්‍යයි. ඒක කරන්න මේ ආණ්ඩුව අසමත්. ඒ නිසා ගෑස් පෝලිම් වල, පෙට්‍රල් පෝලිම් වල, ඩීසල් පෝලිම්වල දුක් විඳින ජනතාව දැන් ඉදිරියට ඇවිල්ලා තමන්ගේ ජීවන අයිතිය වෙනුවෙන් නැගී සිටීම ඉතාම අවශ්‍ය කරලා තිබෙනවා”
