මෙරට සිදුවන මරණවලින් 83% ක් ම සිදුවන්නේ බෝ නොවන රෝගවලින්: සෞඛ්‍ය අමාත්‍යාංශය

මෙරට සිටින දියවැඩියා රෝගීන්ගෙන් 50% ක ප්‍රමාණයක් තවමත් හඳුනාගෙන නොමැති බව සෞඛ්‍ය අමාත්‍යාංශයේ බෝ නොවන රෝග ඒකකය පවසනවා.

මෙරට සිදුවන මරණවලින් 83% ක් ම සිදුවන්නේ බෝ නොවන රෝගවලින් බවයි එහි අධ්‍යක්ෂ විශේෂඥ වෛද්‍ය සමින්දි සමරකෝන් මහත්මිය සඳහන් කරන්නේ.

දියවැඩියා රෝගීන් එම රෝගය පාලනය නොකිරීම හේතුවෙන් වකුගඩු රෝගවලට සහ හෘදයාබාද වලට යොමුවන බව ද එසේ නොවුනහොත් අංසභාග තත්වයන්ට හෝ පත්වන බව ද ඇය පවසනවා.

විශේෂඥ වෛද්‍ය සමින්දි සමරකෝන් මහත්මිය පෙන්වා දෙන්නේ, මේ හේතුවෙන් අධික රුධිර පීඩනය ද ඇතැම් රෝගීන්ට වැළදෙන බවයි.

 ඇය සඳහන් කරන්නේ බොහෝ පිරිස් බෝ නොවන රෝග සඳහා ප්‍රතිකාර ලබාගැනීමට යොමු නොවන බැවින් හඳුනා නොගත් රෝගීන් විශාල පිරිසක් සමාජයේ සිටිය හැකි බවයි.