ඩොනල් ට්‍රම්ප් සිදුවීම
නිල් චිත්‍රපට නිළියකට මුදල් ලබාදීම සම්බන්ධයෙන් අධිචෝදනා ලැබ සිටින අමෙරිකාවේ හිටපු ජනාධිපති ඩොනල්ඩ් ට්‍රම්ප් නිව්යෝර්ක් අධිකරණයේ දී අත්අඩංගුවට ගෙන පසුව ඇප මත මුදා හැර තිබේ.
ඔහුට චෝදනා එල්ල වූයේ 2016 ජනාධිපතිවරණ සමයේ දී අමෙරිකාවේ හිටපු නිල් චිත්‍රපට නිළියකට මුදල් ලබා දීම සම්බන්ධයෙන් හා ව්‍යාජ ලිපි ලේඛන සැකසීම සම්බන්ධයෙනි.
මෙවැනි අපරාධ 34 ක් සම්බන්ධයෙන් හිටපු ජනාධිපති ට්‍රම්ප් ට චෝදනා එල්ල වී තිබේ.
ට්‍රම්ප් අධිකරණය හමුවේ පවසා ඇත්තේ ඔහු සියලුම චෝදනා සම්බන්ධයෙන් නිවැරදිකරු වන බවය.
ඩොනල්ඩ් ට්‍රම්ප් අත්අඩංගුවට ගැනීමත් සමග ඔහු සියවසකට අධික කාලයකින් පසු අත්අඩංගුවට පත් පළමු අමෙරිකානු ජනපතිවරයා බවට පත්වුණි.
විදෙස් මාධ්‍ය වාර්තා කරන පරිදි ඩොනල්ඩ් ට්‍රම්ප්ට එල්ල වී ඇති අධිචෝදනා අයත් වන්නේ එක්සත් ජනපදයේ අවම දඩුවම් ලැබිය හැකි අපරාධ කාණ්ඩයට ය.
ඒ සඳහා උපරිම වශයෙන් වසර 4ක් සිර දඩුවමක් නියම වන අතර නීති විශේෂඥයින්ගේ අදහස් වන්නේ හිටපු ජනපති ට්‍රම්ප් ට බොහෝ විට දඩයක් ගෙවීමට සිදුවනු ඇති බවය.
ට්‍රම්ප් ට එරෙහිව ඇති මෙම අධිචෝදනා සම්බන්ධ විමර්ශනයේ මීළඟ නඩු වාරය එළඹෙන දෙසැම්බර් මාසයේදී පැවැත්වීමට නියමිතව තිබේ.
එමෙන්ම නඩු විමසීමට අදාළව මෝසමක් ඉදිරිපත් කිරීමට ද ට්‍රම්ප්ගේ නීතිඥ මණ්ඩලයට අගෝස්තු මාසය තෙක් කල් ලබා දී ඇති බව වාර්තා වේ.
නඩු විමසීමෙන් පසු ෆ්ලෝරිඩාහි මාර් ලාගෝ නිවස වෙත ගිය ඩොනල්ඩ් ට්‍රම්ප් පළමු වරට ඔහුට එරෙහිව ඇති චෝදනා සම්බන්ධයෙන් අදහස් ප්‍රකාශ කර තිබේ.
එහිදී ඔහු පවසා ඇත්තේ මෙලෙස අසත්‍ය චෝදනා එල්ල කිරීම සමස්ත දේශයටම එල්ල කළ අපහාසයක් බවය.
“මම කරපු එකම අපරාධය අපේ රට විනාශ කරන්න උත්සාහ කරන අයගෙන් නොබියව රට බේරා ගැනීම පමණයි. මෙම ව්‍යාජ නඩුව ගොනුකර ඇත්තේ එළඹෙන 2024 මැතිවරණයට බාධා කිරීමේ අපේක්ෂාවෙන්. එය වහාම ඉවත් කර ගත යුතුයි.”
@sinhala.adaderana.lk
