අවධානම් ටයිටැනික් නටඹුන් චාරිකාවට තවත් කෝටිපතියෙක් සැරසේ
ටයිටන් නමැති කුඩා වර්ගයේ සබ්මැරීනයකින් ටයිටැනික් නෞකාවේ නටබුන් නැරඹීමට ගොස් බ්‍රිතාන්‍ය කෝටිපතියකු ඇතුළු පුද්ගලයන් පස්දෙනකුට ජීවිත අහිමිවීමේ ඛේදවාචකයෙන් වසරකට පසු අමෙරිකාවේ කෝටිපතියකු ද ටයිටැනික් නටබුන් ගවේෂණය කිරීමේ චාරිකාවක නිරතවීමට සූදානමින් සිටින බව විදෙස් මාධ්‍ය වාර්තා කළේය. අමෙරිකාවේ දේපළ වෙළෙඳ සමාගමක හිමිකරුවකු වන 74 හැවිරිදි ලැරී කෝනර් සහ ඔහුගේ සහායක පැට්‍රික් ලාහේ එම චාරිකාවට එක්වීමට කටයුතු කරමින් සිටින බව විදෙස් මාධ්‍ය වැඩිදුරටත් වාර්තා කළේය.
ඔහියෝ ප්‍රාන්ත වැසියකු වන මේ කෝටිපතියා පසුගිය වසරේ නටබුන් නැරඹීමට ගොස් ජීවිතය අහිමි කරගත් ඕෂන්ගේට් සමාගමේ හිමිකරු වන ස්ටොක්ටන් රෂ් මෙන්ම ත්‍රාසජනක ක්‍රියාකාරකම්වලට ඇබ්බැහි වූවකු බව විදෙස් මාධ්‍ය සඳහන් කළේය. උතුරු අත්ලාන්තික් සයුරේ අඩි 12,000කට වඩා මුහුදු පතුලේ තැන්පත් වී ඇති ටයිටැනික් නෞකාවේ නටබුන් මෙන්ම පසුගිය වසරේදී මුහුද යටදී පිපිරී ගිය ටයිටන් සබ්මැරීනයේ සුන්බුන්ද ගවේෂණය කිරීම ලැරී කෝනර්ගේ අරමුණ වී ඇත. ඔවුන්ගේ ගවේෂණ චාරිකාව සිදු කිරීමට නියමිතව ඇත්තේ අමෙරිකානු ඩොලර් මිලියන 20ක් වැය කරමින් තැනූ ට්‍රයිටොන් නමැති කුඩා වර්ගයේ සබ්මැරීනයකින් බවත්, අමෙරිකාවේ සාගර ගවේෂණ සහතිකය ලැබීමෙන් පසු චාරිකාව ආරම්භ කරනු ඇති බවත් සඳහන් වේ.
පෞද්ගලික ගගනගාමියකු ලෙස නාසා ආයතනයේ සහතිකලත් මේ කෝටිපතියා මීට පෙර අභ්‍යවකාශ නැවතුම් මධ්‍යස්ථානයට ද ගොස් ඇති අතර, පැසිෆික් සයුරේ අඩි 20,000ක් ගැඹුරට කිමිදීමට සමත්වූ පුද්ගලයෙකි. හෙතෙම අනතුරුදායක ෆෝමියුලා මෝටර් රථ තරගවලට ද ඉදිරිපත් වී ඇතැයි වාර්තා වේ.
@දිනමිණ
