වසර 17ක 20/20 ඉතිහාසයේ පළමු වරට ලංකාව මූළික වටයෙන්ම ඉවතට
වසර 17ක විස්සයි20 ලෝක කුසලාන ක්‍රිකට් තරගාවලි ඉතිහාසයේ පළමු වරට මූලික වටයෙන් ඉවතට විසිවීමට ශ්‍රී ලංකාවට සහ නවසීලන්තයට සිදු විය.
2007 වසරේ ආරම්භ විස්සයි20 ලෝක කුසලාන තරගාවලිය මෙවර පැවැත්වෙන් 9 වැනි වරටය. මංගල ශූරතාවලියේදී දෙවැනි වටයට පිවිසි ශ්‍රී ලංකා පිල 2009 දී අනුශූරතාව දිනාගත් අතර, 2010 දී අවසන් පූර්ව වටයට එක්විය. 2012 වසරේ යළි අනුශූරයන් වූ ශ්‍රී ලංකාව 2014දී ශූරයන් බවට පත්විය. අනුතුරුව පැවති තරගාවලි ත්‍රිත්වයේදී දෙවැනි වටයට පිවිසීමට සමත්වූ අතර, මෙවර තරගාවලියේදී මුල් වටයෙන් ඉවතට විසිවිය.
තරගාවලියේ මුල් තරග දෙකෙම පරාජය වී සිටි ශ්‍රී ලංකා පිල ඉතිරි තරග දෙක කෙරෙහි බලාපොරොත්තු රඳවා ගත්ත ද නේපාලයට එරෙහි තරගය වැස්සට සේදී යෑමෙන් එය අවම වූ අතර, පෙරේදා පැවති තරගය ප්‍රතිඵලයක් සහිතව (බංග්ලාදේශයට ජය) නිමා වීමත් සමඟ ශ්‍රී ලංකා පිලට සුපිරි 8 වටය අහිමි වූ බව අයිසීසීය නිල වශයෙන් ප්‍රකාශයට පත් කළේය.
ශ්‍රී ලංකා කණ්ඩායම මූලික වටය යටතේ ලබන සඳුදා (17) නෙදර්ලන්තයට එරෙහිව තරග බිමට පිවිසෙන අතර, එය හුදෙක් ප්‍රදර්ශන තරගයක් බවට පත්ව තිබේ. ශ්‍රී ලංකා පිලට මේ තරගය ජය ගැනීමෙන් එකම ජයක් හෝ නොමැතිව තරගාවලිය නිමා කිරීමේ අවමානයෙන් ගැලවීමට හැකිවනු ඇත. කෙසේ වෙතත් තවමත් සුපිරි 8 වටයේ බලාපොරොත්තු රඳවාගෙන සිටින නෙදර්ලන්තයට මේ තරගය ජය ගැනීම අත්‍යවශ්‍ය වන අතර, එම නිසා ඔවුන් ද හොඳ සටනක් දීමට පිටියට පිවිසෙනු ඇත.
මංගල තරගාවලියේ අවසන් පූර්ව වටයට පිවිසි නවසීලන්තය අනතුරුව පිට පිට තරගාවලි 4කදී දෙවැනි වටයට එක්වූ අතර, 2016දී අවසන් පූර්ව වටයට පිවිසි ඔවුන් 2021දී අනුශූරයන් බවට පත්විය. අවසන් වරට පැවති තරගාවලියේදී යළි අවසන් පූර්ව වටයට පිවිසීමට නවසීලන්තයට හැකිව තිබිණි.
‘සී‘ කාණ්ඩයෙන් තරග වදින නවසීලන්තය මෙවර තරගාවලියේ සහභාගිවූ මුල් තරග දෙක කෙදෙව්වන්ට සහ ඇෆ්ගනිස්තානය හමුවේ පරාජය වූ අතර, ඔවුන්ට ඉතිරිව ඇති උගන්ඩාව සහ පැපුවා නිව්ගිනියාවට එරෙහි තරග ජය ගත්තද සුපිරි 8ට යෑමට අවස්ථාවක් හිමි නොවනු ඇත. ඒ ඉතිහාසයේ පළමු වරට ඇෆ්ගනිස්තානය සහ සත්කාරක කොදෙව් පිල මේ වන විටත් ජයග්‍රහණ 3 බැගින් වාර්තා කරමින් එම කාණ්ඩයෙන් සුපිරි 8 වටයේ ස්ථාන වෙන් කර ගැනීමට සමත්වීම හේතුවෙනි. එබැවින් නවසීලන්තයට ඉතිරි තරග දෙක ද ප්‍රදර්ශන තරග වී තිබේ.
@දිනමිණ
