ප්‍රංශ මැතිවරණය අළුත් ප්‍රංශයක් ගොඩනගන්නට ද?
ඊශ්‍රායලය මේ වන විට ගාසා තීරයට ප්‍රහාර එල්ලකරමින් සිටින්නේ සාම ගිවිසුම් පිළිබඳව වගේ වගක් නැති ගානටය. ගාසා තීරයෙන් එල්ලවන ප්‍රහාර කෙසේ වෙනත් නිරන්තරයෙන් ලෝක පුවත් සේවාවන්වලට ඉදිරිපත් කිරීමට සිදුව ඇත්තේ නිරන්තරයෙන් ඊශ්‍රායලයෙන් එල්ලවන ප්‍රහාරයන් සම්බන්ධයෙනි. එමෙන්ම ව්ලැදිමීර් පුටින්ගේ කොරියානු සංචාරය පිළිබඳවද පසුගිය සතිය පුරා ලෝක පුවත් සේවාවන් වැඩි ඉඩකඩක් ලබා දී තිබිණි. එයින් මතුද එහි දිගුවක් ලෙසින් නොයෙක් ආකාරයේ පුවත් කරළියට පැමිණෙමින්, විසිවෙමින් තිබිණි. ඒවා කොතරම් දුරට සත්‍යද, අසත්‍යද, පිළිගත නොහැකිද යන කාරණා කෙසේ වෙතත් සෑම මාදිලියකම පුවත් ඒජන්සි සහ සමාජ මාධ්‍ය ජාල ඒ, වෙනුවෙන් ඉඩකඩ වෙන්කර තිබිණි. යුද කතා මෙන්ම හිතමිතුරු කතා හා පසමිතුරු කතා එසේ සටහන් වන විට මේ මොහොතේ මැතිවරණයක කතාවක් එළියට පැමිණ තිබේ. ඒ ප්‍රංශ මැතිවරණයයි. ඉන්දියාවේ පැවැති මැතිවරණය අහවරව සති කීපයක් ගිය තැන ආරම්භ වූයේ ප්‍රංශ මැතිවරණයයි. එම මැතිවරණය ආරම්භ වූයේ පසුගිය 30 වැනිදාය.
මේ මොහොතේ පැවත්වෙන මැතිවරණය කෙසේ වෙතත් මෑත වකවානුවේ ප්‍රංශය පිළිබඳව ලෝකය පුරා කතාබහ කරන්නට වූයේ 2023 වසරේ ජූලි මාසයේදීය. සාමකාමී ප්‍රංශය පිළිබඳව අසුබවාදි අදහස් බොහෝ දෙනාගේ සිතෙහි මතුව ආවේ මෙම සිදුවීමත් සමඟිනි. ප්‍රංශ අරගලය පිළිබඳව වෙනම ආකාරයකට කතා කළද පසුගිය වසරේ සිදුවූ මෙම සිදු වීමත් සමඟින් ජනතා නැඟිටීම සිදු වූයේද අරගලයක සිරි මවමිනි. සිදුවීම වූයේ ජූනි 27 වැනිදා පොලිසිය විසින් වෙඩිතබා 17 හැවිරිදි තරුණයකු ඝාතනය කිරීමත් සමඟිනි. අඩු වැඩි ආකාරයෙන් ප්‍රංශය පිළිබඳව පුවත් ඒ ඒ අයුරින් උඩට මතුව ආවේය. මේ මොහොතේ ප්‍රංශය පිළිබඳව කතා කරන්නට ඇති මාතෘකාව වන්නේ ප්‍රංශයේ පැවැත්වෙන මැතිවරණයයි.
මැතිවරණයේ පළමු වටය
ප්‍රංශ මැතිවරණයේ පළමු වටය මේ වන විට අවසන්ව තිබේ. මැතිවරණයේ පළමු වටය අවසන් වන විට 30 වැනිදා රාත්‍රී වී තිබිණි. මෙවර මැතිවරණයේ පළමු වටයෙන් ජයග්‍රහණය කිරීමට සමත්ව ඇත්තේ දක්ෂිණාංශික පක්ෂයයි. ඔහු ප්‍රංශයේ ජනාධිපතිවරයා වන එමානුවෙල් මැක්‍රොන්ගේ ප්‍රබලම ප්‍රතිවාදියා ලෙසින් නම් කළ හැකිය. සරලවම කියන්නේ නම් එය ප්‍රංශයේ විපක්ෂය කරනලද ජයග්‍රහණයකි. එම ප්‍රතිඵලවලින් ජයග්‍රහණය කිරීමට සමත්ව තිබුණේ මැරින්‍ ලේපෙන්ගේ දක්ෂිණාංශික පක්ෂයයි. මේ වන විට පළමු වටයේදී 33%ක ඡන්ද ප්‍රතිශතයක් ලබා ගනිමින් දක්ෂිණාංශික ජාතික සංධානය ජයග්‍රාහී ගමනක ඉදිරියෙන්ම සිටින අතර එහිදී මැතිවරණ කොට්ඨාස සඳහා මන්ත්‍රීවරුන් 76ක් තේරී පත්වූ අතර ජනාධිපති එමානුවෙල් මැක්‍රොන්ගේ සන්ධානයට දිනාගත හැකිවූයේ මන්ත්‍රීවරු දෙදෙනෙක් පමණි. Marien Le Pen ගේ දක්ෂිණාංශික සන්ධානය මන්ත්‍රීවරුන් 39ක්ද, නවජනතා පෙරමුණ(NFP) 32ක්ද, වශයෙන් මන්ත්‍රීවරු 76 දෙනා පත් විණි.
Marien Le Pen
Marien Le Pen 2021, 2017 මෙන්ම 2022 වසරවලදී ප්‍රංශ ජනාධිපතිවරණය වෙනුවෙන් තරග කරන්නට විය. නීතිඥවරියක් වන ඇය 2011 සිට 2021 දක්වා තම පක්ෂයේ සභාපතිනිය ලෙසද කටයුතු කළාය. වයස අවුරුදු 55ක් වන ඇය තම මුල්ම දේශපාලන ජීවිතය සනිටුහන් කරගනු ලැබුවේ ඇයගේ වයස අවුරුදු 18ක් වන විටය. ඒ 1986 වසරේදී ප්‍රාදේශීය සභා මන්ත්‍රීවරියක් ලෙස පත්වීමත් සමඟය. ඒ ඇයගේ පළමු දේශපාලන ජයග්‍රහණයයි. ඉන්පසු ඇය නව නායකයකු ලෙසින් තම ගමන්මාර්ගය ආරම්භ කරනු ලැබුවේ 2011 වසරේදීය. එම වසරේ මැයි පළමුවැනිදා පැරීසියේදී ආධාරකරුවන් 3000ක් ඉදිරියේ සිය පළමු කතාව ආරම්භ කළාය. Le pen ගේ පළමු ජනාධිපති අපේක්ෂකත්වය ඇයට ලැබුණේ 2011 වසරේදීය. ඇයගේ ජනාධිපති අපේක්ෂකත්වය 2017 මැයි 16 දින නිත්‍ය ලෙසින් නම් වූ අතර එම වසරේ සැප්තැම්බර් 10,11 දිනවල ඇය ජනාධිපතිවරණ සටන දියත් කළාය. මෙම ජනාධිපතිවරණ සටනේදී සංක්‍රමණික ප්‍රශ්න, ගෝලීයකරණය වැනි දෑවලට වඩා ආර්ථික හා සාමාජයීය ප්‍රශ්න පිළිබඳව අවධානය යොමු කිරීමේ ප්‍රවණතාවක් දක්නට ලැබිණි. එය බොහෝ දේශපාලන විචාරකයන්ගේ කතාබහට පවා ලක්විය. කෙසේ වෙතත් ජනාධිපතිවරණයේ පළමු වටයේදී ඇය 17.90%ක ඡන්ද ප්‍රතිශතයක් ලබා ගැනීමට සමත්විය.
ඒ කතා කෙසේ වෙතත් මේ වන විට Le penගේ නායකත්වයෙන් යුතු මැතිවරණයේ පළමු වටයෙන් ජයග්‍රහණය කිරීමට සමත්ව තිබේ.
මේ අතරවාරයේ දක්ෂිණාංශික ජයග්‍රහණය වැළැක්වීම සඳහා එක්සත්ව පෙරමුණක් පිහිටුවීමට එක්වන ලෙස අගමැතිවරයා ඉල්ලීමක් කර තිබිණි. මේ ආකාරයට එක්සත් පෙරමුණක් ඇති කිරීමේ අරමුණ වූයේ Marine Le penගේ පක්ෂය බහුතරයක් දිනාගැනීමේ හේතුව නිසාය.
මැක්‍රොන්ගේ සූදුව
බොහෝ දෙනෙක් මෙම මැතිවරණය හඳුන්වා දුන්නේ ජනාධිපතිවරයාගේ හදිසි මැතිවරණයක් ලෙසයි. යුරෝපා සංගම් පාර්ලිමේන්තු මැතිවරණයෙන් ඔහුගේ පක්ෂය පරාජයට පත් වූ හේතුවෙන් වසර තුනකට පෙර හදිසි මැතිවරණයක් පැවැත්වීමට කටයුතු කළේය. දේශපාලන විචාරකයන් එය හඳුන්වන්නේ දේශපාලන ජීවිතයේ විශාලතම සූදුව ලෙසයි. මේ තීරණය සම්බන්ධයෙන් ඔවුන් තවදුරටත් පවසන්නේ ඔලිම්පික් උලෙළ පැවැත්වීමට කෙටි කාලයක් තිබියදී සහ රුසියානු ආක්‍රමණයට එරෙහිව යුක්‍රේනයට හිතවත්කම් පාමින් ප්‍රංශය අවුල් ජාලයකට ඇද දැමීමට හදිසි තීරණයක් ගෙන ඇති බවයි.
එමෙන්ම මැතිවරණයේ පළමු වටය අවසන්වීමෙන් පසු සභාග ආණ්ඩුවක් සඳහාද සාකච්ඡා කටයුතු කෙරෙමින් තිබෙනා බවය. ඒ කෙසේ වෙතත් SELMA SUN වෙබ් අඩවිය සඳහන් කරනුයේ ජනාධිපතිවරයාගේ RN පක්ෂයට ආසන 199 සිට 220 දක්වා ජයග්‍රහණය කළ හැකි බවයි. එහෙත් එය තවදුරටත් වර්ධනීය ලෙස වෙනස්වී ඇතැයි පසුගිය බ්‍රහස්පතින්දා ඔවුන් සඳහන් කරනුයේ RN පක්ෂයට ආසන 210 – 240ක් සංඛ්‍යාවක් දිනා ගැනීමට හැකියාව ඇති බවයි.
මේ අතර POLITICO වෙබ් අඩවිය සඳහන් කර සිටියේ පළමුවටයේ මැතිවරණ ප්‍රතිඵලවලින් පෙනී යන්නේ ජනපතිවරයාගෙන් මහජනතාව කොතරම් ඈත්වී තිබේද යන්න පැහැදිලිවම පෙනෙන්නට තිබෙනා බවය. කවර ආකාරයෙන් කතා කළද මේ වන විටත් අවසන්ව ඇත්තේ ප්‍රංශ මැතිවරණයේ පළමු වටය පමණි. එහි දෙවන වටය පිළිබඳව ලෝකයටම දැනගන්නට හැකිවන්නේ ඉරිදා පැවැත්වෙන දෙවන වටයෙන් පසුවය.
එහෙත් බහුතරයක් දෙනා මේ වන විට සඳහන් කරන්නේ දක්ෂිණාංශික පක්ෂය ප්‍රංශ දේශපාලනය උඩු යටිකුරු කරනු ඇති බවයි. එහෙත් එම පක්ෂය බලයට ඒම වළක්වමින් මේ වන විටත් අනෙකුත් දේශපාලන පක්ෂ තම උපායමාර්ගයන් භාවිතයට ගනිමින් සිටී
දෙවැනි වටය
සමීක්ෂණයන් යම් විටෙක නිවැරදි විය හැකි මෙන්ම එය සාවද්‍ය තොරතුරුවලින්ද ගහන විය හැකිය. කෙසේ වෙතත් challenges සඟරාව සඳහා කළ සමීක්ෂණයකදී Marine Le pen ගේ දක්ෂිණාංශික පක්ෂයට ජාතික සභාව පාලනය කිරීමට අවශ්‍ය ආසන 289 දිනාගත නොහැකි බව පෙන්නුම් කරයි. කෙසේ වෙතත් තරග තීරණය තාමත් විවෘතය. එයට නිසි පිළිතුර ලැබෙනුයේ එළඹෙන ඉරිදාය.
@දිනමිණ
