තායිලන්තයේ තරු පහේ හෝටලයක මළසිරුරු හයක්
තායිලන්තයේ බැංකොක් අගනුවර තරු පහේ හෝටලයක කාමරයක් තුළින් වියට්නාම ජාතිකයන් 6 දෙනකුගේ මළ සිරුරු සොයා ගත් බව එරට පොලිසිය ප්‍රකාශ කර ඇතැයි වාර්තා වේ. එම මළ සිරුරු සොයාගෙන ඇත්තේ ඒ පිළිබඳ හෝටල් සේවකයකු විසින් කරනු ලැබූ දැනුම් දීමකට අනුව බව ද තායිලන්ත පොලිසිය වැඩිදුරටත් සඳහන් කර තිබේ. මිය ගිය අය අතර පිරිමි පුද්ගලයන් තිදෙනකු සහ කාන්තාවන් තිදෙනකු සිටින බවත්, ඉන් දෙදෙනකුට අමෙරිකාවේ පුරවැසිභාවය ඇති බවත් පොලිසිය ප්‍රකාශ කර ඇත. ඔවුන් මියගොස් ඇත්තේ සයනයිඩ් මිශ්‍ර වූ තේ පානය කිරීම හේතුවෙන් බව මරණ පරීක්ෂණයේදී අනාවරණය වූ බව වැඩිදුරටත් වාර්තා වේ.
ඔවුන් සියලු දෙනාම හෝටලයට පැමිණ ඇත්තේ මිය ගිය දිනයට පෙර දිනයේදී බවත් වැඩිදුරටත් වාර්තා වේ. මිය ගිය පුද්ගලයන් අවුරුදු 37 සිට අවුරුදු 56 දක්වා වයස් කාණ්ඩයේ පසුවන්නන් බව පොලිසිය හඳුනාගෙන තිබේ.
බැංකොක් අගනුවර පිහිටි ග්‍රෑන්ඩ් හයාට් හෝටලය වෙත වෙන් වෙන් වශයෙන් පැමිණ ඇති එම පුද්ගලයන් කාමර 5ක් වෙන්කරගෙන ඇතැයි ද, ඉන් කාමර 4ක් සත්වැනි මහලෙන් සහ තවත් කාමරයක් පස්වැනි මහලෙන් වෙන්කර ගත් බව හෝටල් සේවකයන් පොලිසියට ප්‍රකාශ කර තිබේ. ඔවුන්ගේ මළ සිරුර හමුවී ඇත්තේ පස්වැනි මහලේ පිහිටි කාමරයෙන් බවද වාර්තා වේ. පස්වැනි මහලේ පිහිටි කාමරයට රැස්වූ පිරිස තේ ඇණවුම් කර ඇති අතර, පසුව තේ රැගෙන පැමිණී කාමර සේවකයා එය සකස් කිරීමට සූදානම් වීමේදී අමුත්තන් අතර සිටි කාන්තාවක් එය ප්‍රතික්ෂේප කරමින් කාමර සේවකයාට පිටවී යන ලෙස ප්‍රකාශ කර ඇතැයි ද අනාවරණය වී ඇත.
පසුව කාමර සේවකයා ඉන් පිටවී ගොස් ඇති අතර, ඉන් පසු ඔවුන් මිය යන අවස්ථාව දක්වා කිසිදු බාහිර පුද්ගලයකු එම කාමරයට ඇතුළුවීමක් සම්බන්ධව හෝ යම්කිසි සොරකමක් සිදුවීමක් සම්බන්ධව හෝඩුවාවක් නැති බවත් පොලිසිය ප්‍රකාශ කර ඇත. ඒ අනුව තේ කෝප්පවලට සයනයිඩ් මිශ්‍ර කළ ඝාතකයා ඔවුන් අතරම සිටි අයකු බවට පොලිසිය අනුමාන කර තිබේ. මිය ගිය සියලු පුද්ගලයන් ධනවතුන් වන අතර, ව්‍යාපාරික ආරවුලක් ඊට හේතුවන්නට ඇතැයි තායිලන්ත පොලිසියේ විශ්වාසය වී ඇත.
@දිනමිණ
