ඉන්දික අනුරුද්ධගේ සොහොයුරා අත්අඩංගුවට
කටාන ප්‍රදේශයේ ඇඟලුම් කම්හලක් පවත්වාගෙන ගිය ඕමාන ජාතික ව්‍යාපාරිකයකුට අමානුෂික ලෙස පහරදී දේපොළ විනාශ කළ සිද්ධිය සම්බන්ධයෙන් හිටපු රාජ්‍ය ඇමැති ඉන්දික අනුරුද්ධ මහතාගේ බාල සොහොයුරු අපරාධ පරීක්ෂණ දෙපාර්තමේන්තුව මගින් පෙරේදා (01) රාත්‍රියේ අත්අඩංගුවට ගෙන තිබේ.
පොලිසිය පවසන්නේ මෙම සිද්ධිය සම්බන්ධයෙන් හිටපු රාජ්‍ය ඇමැති ඉන්දික අනුරුද්ධ මහතාට ද චෝදනා එල්ල වී තිබෙන බවයි.
කටාන ප්‍රදේශයේ ඇඟලුම් කම්හලක් පවත්වාගෙන ගිය ධනවත් ව්‍යාපාරිකයකු වන ඕමාන් ජාතිකයා පදිංචිව සිටි නිවසට කඩාවැදී ඔහුට අමානුෂික ලෙස පහරදී දේපොළ විනාශ කර තිබුණේ ඉකුත් 2022 වර්ෂයේදී වන අතර
මෙම ව්‍යාපාරිකයාට අයත් ඇඟලුම් කම්හලේ ප්‍රවාහන කටයුතු සඳහා ලොරි රථ යෙදවීම සම්බන්ධයෙන් ඇතිවූ ආරවුලක් ප්‍රහාරයට හේතු වී තිබුණි.
මෙම සිද්ධිය සම්බන්ධයෙන් එවකට ජනාධිපති ගෝඨාභය රාජපක්ෂ මහතා ද මැදිහත්වී තිබූ අතර ජනාධිපතිවරයාගේ නියෝග මත ව්‍යාපාරිකයාට සහ ඇඟලුම් කම්හලට විශේෂ ආරක්ෂාවක් ද යෙද වූ බව සඳහන් වේ.
මෙම ප්‍රහාරය සම්බන්ධයෙන් කඳාන පොලිසිය මගින් මීට ඉහතදී සැකකරුවන් සිව් දෙනකු අත්අඩංගුවට ගනු ලැබීය.
කෙසේ වෙතත් සිද්ධිය සම්බන්ධයෙන් විමර්ශන පැවැත්වීමෙන් පසුව ඔවුන්ව අපරාධ පරීක්ෂණ දෙපාර්තමේන්තුව වෙත භාරදී තිබූ අතර එහිදී තවත් සැකකරුවන් දෙදෙනකු අත්අඩංගුවට ගත් බව සඳහන් වේ.
මෙම සිද්ධියට සම්බන්ධ ප්‍රධාන සැකකරුවකු වන හිටපු රාජ්‍ය ඇමැතිවරයාගේ සොහොයුරා අත්අඩංගුවට ගනු ලැබුවේ වසරක 2කට පමණ පසුවය.
සිද්ධිය සම්බන්ධයෙන් අපරාධ පරීක්ෂණ දෙපාර්තමේන්තුව වැඩිදුර විමර්ශන සිදු කරයි.
@දිනමිණ
