ඉලෝන් මස්ක් ඉහළම තනතුරකට
ලොව ලොකුම ධනවතා වන ඉලෝන් මස්ක් අමෙරිකානු රජයේ නව කාර්යක්ෂමතා දෙපාර්තමේන්තුවේ සම ප්‍රධානියා ලෙස පත් කිරීමට ජනාධිපති ඩොනල්ඩ් ට්‍රම්ප් පියවර ගෙන ඇතැයි විදෙස් මාධ්‍ය වාර්තා කළේය. ඩොනල්ඩ් ට්‍රම්ප් මෙවර ජනපති ධුරයට පත් කිරීමට ප්‍රබල සහායක් දුන් ඉලෝන් මස්ක් සමඟ එම දෙපාර්තමේන්තුවේ සම ප්‍රධානියකු ලෙස රිපබ්ලිකන් නියෝජිතයකු වන විවේක් රාමස්වාමි පත් කර ඇති අතර, රජයේ වියදම් අවම කිරීම සඳහා ජනාධිපතිවරයාට උපදෙස් සැපයීම සඳහා දෙපාර්තමේන්තුව ස්ථාපිත කර ඇතැයි ද විදෙස් මාධ්‍ය වැඩිදුරටත් වාර්තා කළේය.
මීට අමතරව ෆ්ලොරිඩා ප්‍රාන්තයේ රිපබ්ලිකන් නියෝජිතයකු වන මයිකල් වොල්ට්ස් නව ජනපතිගේ ජාතික ආරක්ෂක උපදේශකවරයා ලෙස පත් කර ඇතැයි ද වාර්තා වේ. අමෙරිකානු හමුදාවේ හිටපු කර්නල්වරයකු වන මයිකල් වොල්ට්ස් මීට පෙර ට්‍රම්ප් යටතේ බුද්ධි අංශය, සන්නද්ධ සේවය හා විදේශ සබඳතා කමිටුවේ තනතුරු දැරූ විශ්වාසවන්ත සගයෙකි.
මේ අතර ඇෆ්ගන් යුද මෙහෙයුම්වලට සහභාගිවූ අමෙරිකානු හමුදාවේ ඉහළ නිලධාරියකු සහ ෆොක්ස් රූපවාහිනි සේවයේ වැඩසටහන් ඉදිරිපත් කරන්නකු වූ පෙට් හෙග්සෙත් නව රජයේ ආරක්ෂක ලේකම්වරයා ලෙසත්, 2020-21 කාලයේ එරට ජාතික බුද්ධි සේවාවේ අධ්‍යක්ෂවරයා ලෙස කටයුතු කළ ජෝන් රැට්ක්ලිෆ් සීඅයිඒ සංවිධානයේ ප්‍රධානියා ලෙසත් පත් කර ඇතැයි විදෙස් මාධ්‍ය වාර්තා කළේය.
@දිනමිණ
