සහල් මෙට්‍රික්ටොන් 70000ක් ආනයනය කරනවා – ලාල් කාන්ත
රටේ පවතින සහල් අර්බුදයට පිළියමක් ලෙස ඉන්දියාවෙන් සහල් මෙට්‍රික්ටොන් 70000 ක් ආනයනයට අදාළ කැබිනට් පත්‍රිකාව ලබන සතියේ ඇමැති මණ්ඩලයට ඉදිරිපත් කරන බව කෘෂිකර්ම, පශු සම්පත්, ඉඩම් සහ වාරිමාර්ග ඇමැති කේ.ඩී. ලාල් කාන්ත මහතා පැවසීය. කෘෂිකර්ම අමාත්‍යාංශයේදී පැවැති මාධ්‍ය හමුවකදී ඊයේ (22) ඒ මහතා මේ බව පැවසුවේය. එහිදී වැඩිදුරටත් අදහස් පළ කළ ඇමැතිවරයා මෙසේද කීවේය.
කෘෂිකර්ම හා වෙළෙඳ අමාත්‍යාංශ ඒකාබද්ධ පත්‍රිකාවක් ලෙස මෙම පත්‍රිකාව ඉදිරිපත් කරන බවත් මේ යටතේ නාඩු සහල් මෙට්‍රික්ටොන් 70,000ක් පළමු අදියර යටතේ ආනයනය කරන බවත් ඇමැතිවරයා පැවසීය.
උත්සව සමයේ පාරිභෝගිකයන්ට හිඟයකින් තොරව සහල් සැපයීමේ අරමුණෙන් මේ පියවර ගත් බවද හෙතෙම පැවසීය.
වෙළෙඳපොළේ සහල් හිඟයක් මෙන්ම මිල පිළිබඳ ප්‍රශ්නයක්ද පවතින බවත් කී ඇමැතිවරයා, පසුගිය කාලයේ නාඩු සහල් නිෂ්පාදනය අවශ්‍ය ප්‍රමාණයට සිදු වුවත් ඒවා වෙළෙඳපොළට පැමිණ නැති බවද කියා සිටියේය.
මේ තත්ත්වය හේතුවෙන් අනිවාර්යයෙන් පිටරටින් සහල් ගෙන ඒමට සිදු වන බවත් ඒ අනුව ඉන්දියාවෙන් මේ නාඩු සහල් ප්‍රමාණය ගෙන්වීමට බලාපොරොත්තු වන බවත් ඇමැතිවරයා කීවේය.
“සහල් ගෙන්නුවත් අපි ගොවියාට මෙන්ම පාරිභෝගිකයාට ගැටලුවක් වන්නට ඉඩ තබන්නේ නැහැ. අතරමැදියන්ට පාරිභෝගිකයන්ව ගසාකන්නට කිසිසේත් ඉඩ තබන්නේ නැහැ.
මහා පරිමාණ සහල් මෝල් හිමියන් සමඟ අපට ප්‍රශ්නයක් නෑ. සහල් වෙළෙඳපොළේ හිඟ නම් සහල් නිෂ්පාදනය වී තිබෙනවා නම්, ඒ සහල් තොග තිබෙන්න ඕනෑ ඒ හාල් මෝල් හිමියන් ළඟයි. ඒ නිසා අපි පාරිභෝගිකයා සහ ගොවියා ගැන සිතා මේ තීරණය ගත්තා.
මේ අනුව උත්සව සමයට අවශ්‍ය ප්‍රමාණයට සහල් වෙළෙඳපොළට ලබාදෙන්නට අපට පුළුවන්. හිඟයකින් තොරව රජයේ ප්‍රකාශිත මිල අනුව සහල් ලබාගන්නට පාරිභෝගිකයාට මෙහිදී හැකියාව ලැබෙනවා.
මේ සහල් ගැටලුවට සදාකාලික උත්තර අප ළඟ නෑ. වෙළෙඳපොළ පවතින තත්ත්වයට ගැළපෙන උත්තරය ලෙසයි මෙම සහල් මෙට්‍රික් ටොන් 70,000ක් ආනයනය කිරීමට තීරණය කළේ. මේ වන විට මාස් කන්නය ආරම්භ වී තිබෙනවා. මේ කන්නයේදී හොඳ නාඩු අස්වැන්නක් අපට ලැබෙයි කියා අප විශ්වාස කරනවා” යැයිද කීවේය.
