ඉම්රාන් ඛාන් නිදහස් කරනු! ලක්ෂ සංඛ්‍යාත ජනතාව අගනුවරට වටලයි
විරෝධතාකරුවන් හාරදහසකට වැඩි ප්‍රමාණයක් අත්අඩංගුවට
ඉස්ලාමාබාද් ආරක්ෂාවට අතිවිශාල හමුදා බළඇණියක්
සිරගත කර සිටින පාකිස්තානයේ හිටපු අගමැති ඉම්රාන් ඛාන් නිදහස් කරන ලෙස රජයට බල කරමින් ලක්ෂ සංඛ්‍යාත ජනතාව දසදෙසින් ඉස්ලාමාබාද් අගනුවරට ඇතුළු වෙමින් සිටින බව විදෙස් මාධ්‍ය වාර්තා කළේය. ඉම්රාන්ගේ ටෙහ්රීකි ඉන්සාෆ් පක්ෂය විසින් සංවිධාන කළ එම විරෝධතා පා ගමන පාකිස්තානයේ නගර රැසක සිට අතිවිශාල ජන සහභාගිත්වයෙන් අගනුවර කරා ළඟාවී ඇති බවත්, රජයේ නියෝග මත ඉස්ලාමාබාද් අගනුවරට ඇතුළුවීම වැළැක්වීම සඳහා සියලු ප්‍රධාන මාර්ග කන්ටේනර් බහාලුම් යොදා අවහිර කළද ඒ සියලු මාර්ග බාධක නොතකමින් ජනතාව ඉදිරියට ඇදෙමින් සිටින බවත් විදෙස් මාධ්‍ය වැඩිදුරටත් වාර්තා කළේය.
ඉම්රාන් ඛාන් නිදහස් කරන ලෙසත්, රජයට ඉල්ලා අස්වන ලෙසත් බල කරමින් පැවැත්වෙන විරෝධතා රැලිය මැඬ පැවැත්වීමට ඛාන් හිතවාදීන් හාරදහසකට අධික පිරිසක් පොලීසිය විසින් අත්අඩංගුවට ගෙන ඇති අතර, පාර්ලිමේන්තු මන්ත්‍රීවරු පස්දෙනකු ද ඒ අතර සිටින බව විදෙස් මාධ්‍ය සඳහන් කළේය.
ඉස්ලාමාබාද් නුවර ‘රතු කලාපයක්‘ ලෙස නම් කර ඇති බැවින් අගනුවරට පැමිණෙන ඛාන් හිතවාදීන් අත්අඩංගුවට ගන්නා බව ඊයේ මාධ්‍ය හමුවක් කැඳවමින් එරට අභ්‍යන්තර කටයුතු ඇමැති මොෂින් කන්වි ප්‍රකාශ කර ඇතැයි ද, විරෝධතා පා ගමන මැඬ පැවැත්වීමට අවශ්‍ය සියලු පියවර ගත් බව ඔහු සඳහන් කර ඇතැයි ද වාර්තා වේ. විරෝධතා රැලිය මැඬ පැවැත්වීමේ අරමුණින් රජය විසින් අන්තර්ජාල සබඳතා අවහිර කර ඇති බවට ටෙහ්රීකි ඉන්සාෆ් පක්ෂය චෝදනා එල්ල කර ඇති අතර, එරට අභ්‍යන්තර කටයුතු ඇමැතිවරයා එම චෝදනාව ප්‍රතික්ෂේප කර ඇතැයි ද වාර්තා වේ. පාකිස්තාන ඉතිහාසයේ පැවැත්වෙන බව කියන විශාලතම විරෝධතා රැලිය මෙය බවත්, දේශීය මාධ්‍ය මෙන්ම විදේශීය මාධ්‍ය නාළිකා රැසක් එම ඓතිහාසික විරෝධතා රැලිය සජීවීව විකාශය කිරීමට කටයුතු යොදා ඇති බවත් වැඩිදුරටත් වාර්තා වේ.
ඉස්ලාමාබාද් අගනුවර අසලට රැස්වෙමින් සිටින ඉම්රාන් හිතවාදී විරෝධතා රැලියේ පෙරමුණ ගෙන ඇත්තේ ඔහුගේ බිරිය බුෂ්රා බීබී සහ සමීපතම හිතවතකු වන අලි අමින් ගාන්ඩ්පූර් බව ටෙහ්රීකි ඉන්සාෆ් පක්ෂය නිවේදනය කර ඇතැයි විදෙස් මාධ්‍ය වාර්තා කළේය. එම විරෝධතා පා ගමන තම නිදහස වෙනුවෙන් සිදුවන අවසන් උත්සාහය වනු ඇතැයි චෝදනා රැසකට වරදකරු වී රාවල්පිණ්ඩි නුවර බන්ධනාගාරගතවී සිටින ඉම්රාන් ඛාන් ප්‍රකාශ කළ බවත් විදෙස් මාධ්‍ය සඳහන් කළේය. මේ අතර ඉස්ලාමාබාද් අගනුවර පිහිටි අමෙරිකානු තානාපති කාර්යාලය අගනුවර සිටින සියලු අමෙරිකානු පුරවැසියන්ට අනතුරු ඇඟවීමේ නිවේදනයක් නිකුත් කර ඇති බවත් වාර්තා වේ.
@දිනමිණ
