සතුන් මරන්න ගොවියාට කියන්න එපා, ඒක රජය කරන්න – ගොවි සමීති ලාල් කාන්තට කියයි
වගාවට හානි කරන සතුන් පිළිබඳව වගා භූමිය තුළදී ගොවියා ගත යුතු ක්‍රියාමාර්ගය කුමක්ද යන්න පිළිබඳව චක්‍රලේඛයක් මගින් නිසියාකාරව කෘෂිකර්ම ඇමැතිවරයා ප්‍රකාශයක් සිදු කළ යුතු බවත්, තම වගාවට හානි සිදු කළත්, එම සත්වයා මරා දමන්න තරම් ගොවියා දුර්වල හා පව්කාර තත්ත්වයට පත්ව නැති බවත් ගොවි නායකයෝ පිරිසක් පැවසූහ.
වගාවන්ට සතුන්ගෙන් හානි වනවා නම් වගා බිමේදී ගොවීන්ට ඕනෑම ක්‍රියාමාර්ගයක් ගත හැකි බවට කෘෂිකර්ම ඇමැති කේ. ඩී. ලාල්කාන්ත මහතා පාර්ලිමේන්තුවේ දී කළ ප්‍රකාශයත් සමග ඔවුහු මේ බව පවසා සිටියහ.
ගොවි මහතුන් හරි හැටි නොදැනුවත් නිසා නීතියක් ලෙස සකස් කොට චක්‍රලේඛයක් මගින් ගොවි ජනතාව දැනුවත් කරන ලෙසට මහකනදරාව ඒකාබද්ධ ගොවි සංවිධානයේ හිටපු භාණ්ඩාගාරික, මහසෙන් ගොවි සංවිධානයේ සභාපති සමන් තුසිත මහතා පවසයි.
මහකනදරාව ඒකාබද්ධ ගොවි සංවිධානයේ හිටපු සභාපති රණමයුර ගොවි සංවිධානයේ සභාපති සුභසිංහ රත්නායක මහතා මෙසේ පැවසීය.
“කෘෂිකර්ම ඇමැතිවරයා කළ මෙම ප්‍රකාශයෙන් වගාවට පැමිණෙන සතුන් මරා දැමීමට කටයුතු කරන ලෙස කියා සිටියා. නමුත් ගොවියන් විදියට බෞද්ධාගමට අනුව එම සතුන් ඝාතනය කිරීමට අපිට බැහැ. අපේ වගාව හානි කළත් එම සත්තු මරලා දාන්න තරම් අපි දුර්වල නැහැ. අපි ඇමැතිවරයාට කියා සිටින්නේ සත්තු මරන්න ගොවියන්ට පවරන්න එපා කියලයි.
ඒ වෙනුවට, කෘෂි හමුදාවක්, ගොවි හමුදාවක් නමින් ඒකකයක් ඇති කර ඔවුනට ගිනි අවි ලබා දී, ලැබෙන තොරතුරු අනුව වගාවට පැමිණෙන අලි ඇතුන්ට, රිලවුන්ට, මොනරුන්ට හා අනෙකුත් හානි කරන සතුන්ට වෙඩි තිබීමට කෘෂිකර්ම අමාත්‍යවරයා එම ගොවි හමුදාවට අණ කළ යුතුයි. එහෙම නැති වුණොත් මම ඇති කරන එළ ගවයා එහා වත්තේ කුඹුරට ගියොත් මනුස්සයාට පුළුවන් ඒකා මරාගෙන මස් කන්න.
එම නිසා මෙම ප්‍රකාශය පිළිබඳව සවිස්තරාත්මක විස්තරයක් හා එය නීතිගත කර ගැසට් එකක් මගින් ප්‍රකාශයට පත් කරන ලෙස අපි ඉල්ලා සිටිනවා.
@දිවයින
