තරාතිරම කුමක්වුනත් පාස්කු සැකකරුවන් අත්අඩංගුවට ගන්නවා – ආනන්ද විජේපාල
පිල්ලෙයාන් පාස්කු ප්‍රහාරය ගැන පෙර දැනුවත්ව සිටි බව විමර්ශනවලදී අනාවරණය වී ඇති බවත් මොන තරාතිරමේ හිටියත් පාස්කු සැකකරුවන් අත්අඩංගුවට ගන්නා බවත් මහජන ආරක්ෂක සහ පාර්ලිමේන්තු කටයුතු ඇමති ආනන්ද විජේපාල අවධාරණය කරයි.
ඔහු ඒ බව අවධාරණය කළේ ඊයේ (09) පාර්ලිමේන්තුවේදී පැවති පාස්කු ප්‍රහාරය පිළිබඳ සභාව කල්තැබීමේ විවාදයට එක්වෙමිනි.
එහිදී ඔහු සඳහන් කළේ, මඩකලපුව බන්ධනාගාරයේ රඳවා සිටියදී සිවනේෂතුරෙයි චන්ද්‍රකාන්තන් හෙවත් පිල්ලෙයාන් පාස්කු ප්‍රහාරය පිළිබඳ පූර්ව දැනුවත් වීමකින් සිටි බව විමර්ශනවලදී අනාවරණය වී ඇති බවය.
ඒ අනුව, පාස්කු ප්‍රහාරය සිදුවන අවස්ථාවේදී ඔහු ජෝෂප් පරරාජසිංහම් ඝාතනය සම්බන්ධයෙන් මඩකලපුව බන්ධනාගාරයේ බන්ධනාගාරගතව සිටි බවත් එහි සිටිමින් පාස්කු ප්‍රහාරය ගැන පූර්ණ දැනුවත්ව සිටි බවට සාක්ෂි හා තොරතුරු මඟින් තහවුරු වී ඇති බවත් ඔහු පැවසීය.
මෙම ඝාතනය සම්බන්ධයෙන් පිල්ලෙයාන් සමඟ යුධ හමුදා බුද්ධි අංශ සාමාජිකයින්ද බන්ධනාගාරගතව සිට ඇති බවත් ඔවුන් පිල්ලෙයාන් සමඟ සමීපව කටයුතු කර ඇති බවට තොරතුරු අනාවරණය වී ඇති බවත් ඔහු පැවසීය.
පිල්ලෙයාන් මෙම ප්‍රහාරය සම්බන්ධයෙන් පූර්ව දැනුවත්භාවයකින් සිටි බවට සාධාරණ සැකයක් මේ හරහා ඉස්මතු වන බවත්, මේ සම්බන්ධයෙන් තවදුරටත් පරීක්ෂණ කටයුතු සිදු කරන බවත් මහජන ආරක්ෂක සහ පාර්ලිමේන්තු කටයුතු ඇමති ආනන්ද විජේපාල වැඩිදුරටත් ප්‍රකාශ කළේ.
පාස්කු ප්‍රහාරය ගැන විධිමත් විමර්ශනයක් කරන බව ජනපතිවරණ ප්‍රකාශයේද සඳහන් කර තිබූ පරිදි මේ වනවිට විධිමත් විමර්ශන ආරම්භ කර තිබෙන බවත් මොන තරාතිරමේ හිටියත් පාස්කු සැකකරුවන් අත්අඩංගුවට ගන්නා බවත් ඔහු වැඩිදුරටත් අවධාරණය කරයි.
@Lanka Truth
