ජුලී චන්ග් යයි එරික් මේයර් එයි
ශ්‍රී ලංකාවේ නව අමෙරිකා එක්සත් ජනපද තානාපතිවරයා ලෙස එරික් මේයර් මහතා නම් කිරීමට එක්සත් ජනපද ධවල මන්දිරය පියවර ගෙන තිබේ. ඒ මහතාගේ නාමයෝජනාව තහවුරු කිරීමට අමෙරිකානු ජනාධිපති ඩොනල්ඩ් ට්‍රම්ප් මහතා විසින් එක්සත් ජනපද සෙනෙට් සභාව වෙත නිල වශයෙන් ඉදිරිපත් කර තිබෙන බව වාර්තා වෙයි. ජ්‍යෙෂ්ඨ රාජ්‍ය තාන්ත්‍රිකයකු වන එරික් මේයර් මහතා, දැනට දකුණු සහ මධ්‍යම ආසියානු කටයුතු කාර්යාංශයේ ජ්‍යෙෂ්ඨ කාර්යාංශ නිලධාරියා ලෙස සේවය කරයි. ඒ අනුව ඒ මහතාගේ නම සෙනෙට් මණ්ඩලයට යෝජනා කිරීමත් සමඟ ශ්‍රී ලංකාවේ අමෙරිකා එක්සත් ජනපද අති විශේෂ සහ පූර්ණ බලැති තානාපතිවරයා ලෙස පත්වීමට නියමිතය.
එරික් මේයර් මහතා, ඇෆ්ගනිස්තානය, බංග්ලාදේශය, භූතානය, ඉන්දියාව, කසකස්තානය, කිර්ගිස්තානය, මාලදිවයින, නේපාලය, පාකිස්තානය, ශ්‍රී ලංකාව, ටජිකිස්තානය, ටර්ක්මෙනිස්තානය සහ උස්බෙකිස්තානය ඇතුළු දකුණු සහ මධ්‍යම ආසියාව පුරා කාර්යාංශ අධීක්ෂණය කිරීම මෙන්ම පරිපාලනයේ ප්‍රතිපත්ති ප්‍රමුඛතා සම්බන්ධීකරණය කිරීම ඔහු වෙත පැවරී ඇති වගකීම් බව ද වාර්තා වෙයි.
එරික් මේයර් නෝර්වේ හි එක්සත් ජනපද දූත මණ්ඩලයේ සහ නේටෝවේ නවතම සාමාජික රාජ්‍යයක් වන උතුරු මැසිඩෝනියාවේ ස්කොප්පේ හි එක්සත් ජනපද දූත මණ්ඩලයේ භාරකරු ලෙසත් නියෝජ්‍ය දූත මණ්ඩල ප්‍රධානියා ලෙසත් සේවය කර ඇත. ඊට පෙර මේයර් මහතා කාම්බෝජයේ නොම් පෙන් හි කොන්සල් ජනරාල්වරයා ලෙස කටයුතු කර තිබෙන අතර එහි දී ඔහු වැඩබලන නියෝජ්‍ය දූත මණ්ඩල ප්‍රධානියා ලෙස ද සේවය කර තිබේ.
මේයර් මහතා කැලිෆෝනියා බර්ක්ලි විශ්වවිද්‍යාලයෙන් දේශපාලන විද්‍යාව පිළිබඳ උපාධියක් ලබා ඇති අතර ජෝර්ජ්ටවුන් විශ්වවිද්‍යාලයෙන් MBA උපාධියක් ද ලබා ඇත. ඔහු රාජ්‍ය දෙපාර්තමේන්තු උසස් සහ කුසලතා ගෞරව සම්මාන කිහිපයකින් පිදුම් ලැබූවෙක් වන අතර ඩෙන්මාර්ක, ප්‍රංශ, කෙමර්, රුසියානු සහ ස්පාඤ්ඤ භාෂා චතුර ලෙස හැසිරවීමේ හැකියාව ද ඔහුට ඇත.
@දිනමිණ
