ශ්‍රී ලංකාව නමින් චන්ද්‍රිකාවක් නැහැ – නලින්ද ජයතිස්ස

ගෝලීය තොරතුරු හා සන්නිවේදන තාක්ෂණයන් සම්බන්ධීකරණය කිරීමේ එක්සත් ජාතීන්ගේ ආයතනය වන ජාත්‍යන්තර විදුලි සංදේශ සංගමයේ (ITU) වාර්තාවල ශ්‍රී ලංකාව නමින් ලියාපදිංචි කළ චන්ද්‍රිකාවක් නොමැති බව අමාත්‍ය නලින්ද ජයතිස්ස මහතා අද (12) ප්‍රකාශ කළේය.

සතිපතා කැබිනට් තීරණ දැනුම් දීමේ මාධ්‍ය හමුවේදී අදහස් දක්වමින් අමාත්‍යවරයා පැවසුවේ, චන්ද්‍රිකාවක් දියත් කිරීමේදී ITU හි සම්මත ක්‍රියාපටිපාටිය අදියර තුනකින් සමන්විත වන බවයි.

එහිදී, පළමුව, සැලසුම් කරන ලද චන්ද්‍රිකා ජාලයේ තාක්ෂණික තොරතුරු ඉදිරිපත් කිරීම, දෙවනුව, වෙනත් සාමාජික රටවල් සමඟ සම්බන්ධීකරණය කිරීමෙන් අනවශ්‍ය බාධා වළක්වා ගැනීම සහ තෙවනුව, ලියාපදිංචිය සහ ජාත්‍යන්තර පිළිගැනීම සඳහා අවසාන පරාමිතීන් දැනුම් දීම සිදු වේ. මෙම ක්‍රියාවලිය සඳහා සාමාන්‍යයෙන් වසර තුනත් හතත් අතර කාලයක් ගත වන බව ඔහු පැහැදිලි කළේය.

“ITU හි සාමාජිකයෙකු වන ශ්‍රී ලංකාවේ විදුලි සංදේශ නියාමන කොමිසම සතුව භූස්ථාවර කක්ෂීය ස්ථාන දෙකක් තිබෙනවා. ඒවා 121.5°E සහ 50°E යි. මෙම ස්ථාන ශ්‍රී ලංකාව සඳහා වෙන් කර තිබුණත්, ඇෆ්ගනිස්ථානය, කිර්ගිස්ථානය, මෝල්ඩෝවා, නේපාලය, ටජිකිස්තානය සහ රුමේනියාව වැනි වෙනත් රටවලටද බාධාවකින් තොරව එහි ක්‍රියාත්මක විය හැකියි” යැයි අමාත්‍යවරයා පැවසීය.

ITU දත්තවලට අනුව, මේ වන විට “ශ්‍රී ලංකා” නමින් එම කක්ෂීය ස්ථානවල ක්‍රියාත්මක වන කිසිදු චන්ද්‍රිකාවක් නොමැත.

SupremeSat One ලෙස නම් කර, පසුව ChinaSat 2 ලෙස නම් කරන ලදැයි වාර්තා වූ චන්ද්‍රිකාවක් පිළිබඳවද පරීක්ෂා කළ බවත්, එම නම් දෙකෙන් කිසිවක් ITU වාර්තාවල නොමැති බවත් අමාත්‍ය ජයතිස්ස මහතා පැවසීය.

ශ්‍රී ලංකාවට වෙන් කර ඇති කක්ෂීය ස්ථානවලින් ක්‍රියාත්මක වන කිසිදු චන්ද්‍රිකාවක ක්‍රියාකාරීත්වයක් ITU වාර්තා මගින් නොපෙන්වන බවද අමාත්‍යවරයා නැවත අවධාරණය කළේය.

@Lanka C News