එහිම සුදුමැලි පිටපතක් කියවන්න එන්න

(විශ්ව ප්‍රභාත් රශ්මික)

තිලක් කෝදාගොඩ විසින් රචිත “එහිම සුදුමැලි පිටපතක් ” කෘතිය පාදක කරගනිමින් පැවැත්වෙන විචාරියානු විලාසිතාව පිළිබද සංවාදය අගෝස්තු මස 26 දින සවස 4.00ට කොළඹ මහවැලි කේන්ද්‍රයේදී පැවැත්වීමට නියමිතයි.

මෙම සංවාදයේ මූළික අදහස් දැක්වීම සදහා ආනන්ද වක්කුඹුර, රංජිත් පෙරේරා, සෞම්‍ය ලියනගේ, සමන් පුෂ්පකුමාර සහ තිලක් කෝදාගොඩ සම්බන්ධ වීමට නියමිත අතර ඉන් අනතුරුව විවෘත සංවාදයට අවස්ථාව විවර වනු ඇත.

තිලක් කෝදාගොඩ ලියා එළි දක්වා තිබෙන නවතම කෘතිය වන ‘එහිම සුදුමැලි පිටපතක්’ ජර්මානු විඥානවාදය, මාක්සියානු දේශපාලන ආර්ථික විද්‍යාව සහ ෆ්‍රොයිඩියානු-ලකානියානු මනෝවිශ්ලේෂණය හරහා සිනමා විචාරයට නව ප්‍රවේශයක් ගැනීමට ගන්නා උත්සාහයකි. ඔහු අප ඉහතින් සාකච්ඡා කළ ආකාරයට ඉහත බොරෝමියානු ගැටයේ එක් ක්ෂේත්‍රයක් වන ‘මාක්ස්මය දේශපාලන ආර්ථිකය’ ගැන හා එහි ඇති සීමා ගැන මෙන්ම මිනිස් ආශාව පදනම් කරගත් මනෝවිශ්ලේෂණයේ බලපෑම හා පවතින දේශපාලන ආර්ථික ගැටළු මගින් සංකීර්ණ කර ඇති මිනිස් ජීවිතවල ආත්මීය සාධක වන මිනිස් සම්බන්ධතා හා ආදරය ඇතුළත් මානසික ක්ෂෙත්‍රයේ කඩා වැටීම මලක දේවප්‍රියගේ. “බහුචිතවාදියා”සිනමා කෘතිය ආශ්‍රයෙන් සාකච්ඡා කිරීමට උත්සාහ කරයි.

පතිරාජ, වසන්ත ඔබේසේකර, සත්‍යජිත් මායිටිපේ හා නවක සිනමා අධ්‍යක්ෂ ජගත් මනුවර්ණ ආදීන්ගේ සමාජ ප්‍රශ්න තිරයට ගෙන එමින් ඒවා දේශපාලනික ලෙස සාකච්ඡා කිරීමට පෙළඹෙන සිනමා ප්‍රවේශයත් එයට වෙනස්ව බිහි වූ අශෝක හඳගම, ප්‍රසන්න විතානගේ, විමුක්ති ජයසුන්දර, සංජීව පුෂ්පකුමාර වැනි සමාජ ප්‍රශ්න වෙනුවට ආත්මීය ප්‍රශ්න තේමා කරගත් සිනමා ප්‍රවේශයත් යන ප්‍රවේශ දෙක තුළම මාලකගේ සිනමාව ස්ථානගත කර ගැනීමට කෝදාගොඩ මෙහිදී උත්සාහයක් දරා ඇත.

ඔහු මතු කරන ආකාරයට න්‍යා‍ය සංවාද තලයෙන් ඉවතට ගෙන සමාජ භාවිතමය තලයකට ගෙන ඒම තමන්ගේ ආකල්පය බව පෙන්වා දෙයි. මේ ඔස්සේ යමින් මාක්ස්වාදී දේශපාලන ආර්ථික ප්‍රවර්ගයත්, ෆ්‍රොයිඩියානු ලැකානියානු මනෝ විශ්ලේෂණාත්මක ප්‍රවර්ගයත් සහ හෙගලියානු සමපේක්ෂණමය විඥානවාදී ප්‍රවර්ගයත් ආදී ප්‍රවර්ගයන් ඔස්සේ කිසියම් කලාකෘතියක් දෙස බලන්නට අපව පොළඹවයි.