ගාසා රෝහලට එල්ල වූ ඊශ්‍රායල් ප්‍රහාරයට යුක්තිය ඉටු විය යුතුයි – එක්සත් ජාතීන්ගේ සංවිධානය
මාධ්‍යවේදීන් ඇතුළු පුද්ගලයන් 20 දෙනකු ඝාතනයට ලක් කරමින් ගාසා තීරයේ නසීර් රෝහලට එල්ල වූ ඊශ්‍රායල හමුදා ප්‍රහාරය සම්බන්ධව යුක්තිය ඉටු විය යුතු බව එක්සත් ජාතීන්ගේ සංවිධානය නිවේදනය කර ඇතැයි විදෙස් මාධ්‍ය වාර්තා කරයි. ජාත්‍යන්තර මාධ්‍ය සමාගම්වලට අනුයුක්තව රාජකාරි කළ මාධ්‍යවේදින් පස්දෙනකු ද, සහන සේවකයන් සිවුදෙනකු ද එම ප්‍රහාරයෙන් ජීවිතක්ෂයට පත්වූ අතර, බ්‍රිතාන්‍ය අගමැති ශ්‍රීමත් කීර් ස්ටාර්මර් ද එම ප්‍රහාරය හෙළා දකිමින් ප්‍රකාශයක් නිකුත් කළ බව විදෙස් මාධ්‍ය වැඩිදුරටත් වාර්තා කරයි.
රෝහල් ප්‍රහාරයට එරෙහිව ජාත්‍යන්තරයේ අප්‍රසාදය ඉහළ යෑම හේතුවෙන් ඒ පිළිබඳ විමර්ශන කටයුතු සිදු කිරීමට ඊශ්‍රායලය පියවර ගත් අතර, හමාස් සංවිධානය විසින් සවි කරන ලද කැමරාවක් හඳුනා ගැනීම ප්‍රහාරයට හේතුවූ බවට මූලික පරීක්ෂණයේදී අනාවරණය වී ඇතැයි ඊශ්‍රායල හමුදාව ප්‍රකාශ කර තිබේ. කෙසේ වුවද වැඩිදුර විමර්ශනයට හේතු වන සාධක කිහිපයක් ද හඳුනා ගත් බැවින් පුළුල් පරීක්ෂණයක් පැවැත්වීමට කටයුතු යොදා ඇතැයි ඊශ්‍රායලය නිවේදනය කළ බව විදෙස් මාධ්‍ය සඳහන් කරයි.
@දිනමිණ
