IMF සරණ ගිහින් 27% ණය කප්පාදුව 16%ට අඩුකරගත් ආන්ඩුවක් මේක – දුමින්ද නාගමුව

(විශ්ව ප්‍රභාත් රශ්මික)

IMF ණය ප්‍රතිව්‍යුහගතකරණ සැලැස්ම නිසා ඉදිරියේදී රට පත්වන්න නියමිත බරපතළ අවදානම් තත්වයක් සම්බන්ධයෙන් ජනතාව දැනුවත් කිරීම සඳහා ජන අරගල සන්ධානය අද (29 ) නුගේගොඩදී විශේෂ මාධ්‍ය හමුවක් කැඳවන ලදී.

එහිදී අදහස් දැක්වූ ජන අරගල සන්ධානයේ ජාතික විධායක සභික පෙරටුගාමී සමාජවාදී පක්ෂයේ ප්‍රචාරක ලේකම් දුමින්ද නාගමුව මහතා, 

   "ආණ්ඩුව පැත්තෙන් විශාල ප්‍රචාරයක් ගෙනියනවා ලංකාවේ ආර්ථිකය ස්ථාවරයි කියලා. අපි දැක්කා ජනාධිපතිවරයා පසුගිය දවසක පාර්ලිමේන්තුවේදි සංඛ්‍යාලේඛන උපුටා දක්වමින් ආර්ථිකය ගැන නොයෙක් කතන්දර කියනවා. නමුත් ඇත්ත කතාව තමයි ලංකාවේ විදේශ විනිමය සංචිත පැහැදිලි බිඳවැටීමකට ලක් වෙලා. 2024 වසර අවසන් වෙද්දි ලංකාවේ මුළු විදෙස් විනිමය සංචිත පැවතුණේ ඩොලර් මිලියන 6091යි. නමුත් 2025 ජූලී මාසේ වෙනකොට ඒ අගය ඩොලර් මිලියන 6144ක් දක්වා ඩොලර් මිලියන 53කින් තමයි වැඩි වෙලා තියෙන්නේ.  මේ අවුරුද්ද අවසන් වෙද්දි අපි ඩොලර් මිලියන 7174 දක්වා අපේ විදෙශ විනිමය සංචිත වැඩිකරගන්න ඕන. ඒ කියන්නේ ඩොලර් බිලියන 1ක් ඒ කියන්නේ තව ඩොලර් මිලියන 950ක් අපි ඉදිරි මාස කිහිපය ඇතුළේ අත්පත්කරගන්න ඕන. ආණ්ඩුව දැන් රටට හෙලිකරන්න ඕන ඉදිරි මාස කිහිපය ඇතුළේ ඩොලර් බිලියනයකට ආසන්න විදෙස් සංචිත රැස් කරන විදිහ. 
       අපි දන්නවා මේ ආණ්ඩුව හිතුවක්කාර විදිහට ජනතාවගේ කැමැත්ත පවා නොසලකමින් IMF සහ ජාත්‍යන්තර ස්වරීත්ව බැඳුම්කර හිමියන් සමග ඉතාමත් දුෂ්කර ණය ප්‍රතිව්‍යුහගතකරණ සැලස්මකට ගියා. දැනට ඒ සැලැස්ම අනුව අපි ණය සඳහාවන පොලී විතරයි ගෙවමින් ඉන්නේ. මේ ණය ගිවිසුම් අනුව ලංකාවට 2028 අවුරුද්දෙ ඉඳලා ණය ගෙවීම ආරම්භ කරන්න වෙනවා.  හැබැයි ඒ වෙද්දි අපේ විදෙස් සංචිත ප්‍රමාණය ඩොලර් බිලියන 15ක් දක්වා ප්‍රසාරණය වෙලා තියෙන්න ඕන. නමුත් දැනට ඩොලර් බිලියන 6ක සංචිත ප්‍රමාණයක් විතරයි අපිට තියෙන්නේ. 2028 අවුරුද්ද වෙද්දි තව ඩොලර් බිලියන 9ක් අපිට හොයන්න වෙනවා. මේක ඉතාම බරපතළ තත්වයක්. මේ තත්වය කලින් ඇතිවෙන බව දන්න නිසා තමයි අපි ආණ්ඩුවට පළවෙනි මොහොතේම කිව්වේ මේ දුෂ්කර ණය ප්‍රතිව්‍යුහගතකරණ සැලස්මට යන්න එපා. මේක ලංකාවට ඉතාම අවාසිදායක ණය සැලස්මක් කියලා. නමුත් ආණ්ඩුව ඒ කිසිවක් ගණනන් නොගෙන උද්ධච්ච විදිහට රනිල් වික්‍රමසිංහල  ජාත්‍යන්තර මූල්‍ය අරමුදලත් සමග එකඟවුණු ණය ප්‍රතිව්‍යුහගතකරණ සැලැස්ම ක්‍රියාත්මක කරන්න පටන් ගත්තා. 
          මේ අවාසිදායක ණය එකඟතාවය නිසා ඉදිරියේදී රටේ ආර්ථිකයට බරපතළ කම්පන තත්වයකට මුහුණ දෙන්න වෙනවා. අනිත් කාරණය තමයි අපි දිගින් දිගටම කිව්වා අපි එකඟවෙලා තියෙන ණය ප්‍රතිව්‍යුහගතකරණ සැලැස්ම නිසා අපේ ණය කප්පාදුව අඩු වෙනවා කියන කරණය. නමුත් මහබැංකු අධිපතිගේ ඉඳලා මේ ආණ්ඩුවේ ආර්ථික න්‍යායාචාර්‍යවරු පම්පෝරි ගැහුවා නෑ අපිට අනිවාරෙන් 27%ක ණය කප්පාදුවක් හම්බවෙනවා කියලා. හැබැයි දැන් මොකක්ද වෙලා තියෙන්නේ ? පසුගිය අවුරුද්ද අවසානයේ ලංකාවේ නාමික දළ දේශීය නිෂ්පාදිත අගය පැවතුණේ ඩොලර් බිලියන 98. 96ක් විදිහට. ඒ කියන්නේ ඉදිරි වසර තුනේදී මේ අගය අනිවාරෙන් ඉහළ යනවා. දැන් මේ ආණ්ඩුව එකඟවෙලා තියෙන ගිවිසුම අනුව 2025, 2026, 2027 කියන අවුරුදු තුනේ නාමික දළ දේශීය නිෂ්පාදිත අගයේ එකතුව තුනෙන් බෙදලා එන අගය වැඩි වෙන ප්‍රමාණය අනුව අපේ ණය කප්පාදුව අඩු වෙනවා. ඊලගට මේගොල්ලො තව සූත්‍රයක් හැදුවා ඒකට අනුව 2024 - 27 අවුරුදු හතරේ අපේ රටේ දළ දේශීය නිෂ්පාදිතයේ වර්ධිත අගය 11.5ට වඩා වැඩි වෙනවනං මේ ණය කප්පාදු සූත්‍රය ක්‍රියාත්මක වෙන විදිහට.  

           දැන් මේ සියල්ලේ අන්තිම ප්‍රතිඵලය තමයි අපේ 27% ණය කප්පාදුව අහිමි වෙන එක. මේකට අනුව අපේ ණය කප්පාදුව 16 - 17% දක්වා පල්ලම් බහින්න නියමිතයි. දැන් අපි අහනවා මහබැංකු අධිපති මේ ගැන මොකද කියන්නේ ? ඔය මහබැංකු අධිපතිවරයා 27%ක ණය කප්පාදුවක් අරං දෙනවා කියලා කතන්දර ගොඩක් කියලා තමයි දේශීය ණය ප්‍රතිව්‍යුහගතකරණයේදී සේවක අරථසාධක අරමුදලෙන් 27%කට වැඩි කප්පාදුවක් කළේ. එහෙම කරලා මේ අර්බුදයේ සම්පූර්ණ බර පැටෙව්වේ මේ රටේ වැඩකරන ජනතාවගේ කර උඩ. හැබැයි එහෙම කරන ගමන් පෞද්ගලික ණය හිමියන්ගේ ලාභ කඳු වැඩි වෙන විදිහට ඔවුන්ට ගෙවන පොලී ප්‍රමාණය වැඩි කළා. දැන් මේ සියල්ලේ ප්‍රතිඵල අපිට පේන්න තියනවා. මේ වෙද්දි සේවක අර්ථසාධක අරමුදල හරි අඩකින් පමණ ක්ෂය වෙන්න පටන් අරගෙන. හැබැයි පෞද්ගලික මූල්‍ය සමාගම් අතිවිශාල ලාභයක් උපයනවා. අන්තිමට බලනකොට ජනතාවාදී කියාගෙන බලයට ආව ආණ්ඩුව වැඩකරන ජනතාවගේ කරපිට විශාල ණය බරක් පටවන උගුලක් තමයි අටවලා තියෙන්නේ. 
           මේ ණය උගුල නිසා 2028 අවුරුද්දෙ ඉඳලා මේ රටේ වැඩකරන පන්තියට විශාල ඛේදවාචකයකට මුහුණ දෙන්න වෙනවා. උඹලා මැරි මැරී හරි වැඩ කරලා අපිට ණය පොලී ගෙවපං කියලා තමයි IMF එක මේ කියන්නේ. අන්තිමට මේ සැලසුම් ක්‍රියාත්මක කරන්න ගිහිල්ලා. අපි විදුලිබල මණ්ඩලෙත් මස් කෙරුවා. අධ්‍යාපන සෞඛ්‍ය ප්‍රවාහණ මේ සියලු සුභසාධන කප්පාදු කරගත්තා, ඒ වගේම තමයි මේ රටේ සාමාන්‍යෙ ජනතාවමත විශාල බදු බරක් පැටෙව්වා. මේ ඔක්කොම කරද්දි කිව්වේ බය වෙන්න එපා අපි ආර්ථිකය හදනවා. ඒ නිසා අමාරුවෙන් අල්ලගෙන ඉන්න කියලා. හැබැයි මේ සියල්ලෙම අන්තිම ප්‍රතිඵලය විදිහට අපිට ලැබෙනවා කිව්වා ණය කප්පාදුවවත් ලැබෙන්නේ නෑ. එතකොට මේ රටේ ජනතාව මේ පටි තදකරගෙන මේ ගෙවන වන්දිය මොකටද ? අපි හිතනවා ආණ්ඩුව සහ මහබැංකුව වහාම මේ සම්බන්ධයෙන් රටට පැහැදිලි කිරීමක් කළ යුතුයි. එක්කෝ ආණ්ඩුව රටට කියන්න ඕන මේ විදිහට ගිහිල්ලා 27ක ණය කප්පාදුවක් ගන්නෙ කොහොමද කියලා. එහෙම බැරි නම් ආණ්ඩුව ජනතාව ඉස්සරහ පිළිගන්න ඕන ඔවුන් මේ රට විශාල ණය උගුලක හිර කලා කියන කාරණය."