ශෂින්ද්‍ර යලි රිමාන්ඩ්
හානිපූර්ණ කාර්යාලයේ නිලධාරීන්ට සිය දේශපාලන බලය හා නිල බලය පෙන්වා බලපෑම් කර අරගල සමයේ හානියට පත් සෙවනගල කිරිඉබ්බන්වැව ප්‍රදේශයේ පිහිටි මහවැලි අධිකාරියට අයත් ඉඩමක අනවසරයෙන් ඉදිකර තිබූ ගොඩනැඟිල්ලක් ඇතුළු දේපළ සඳහා රුපියල් අසූ අට ලක්ෂ පනස්දහසක වන්දි මුදලක් ලබා ගැනීමේ චෝදනාව යටතේ සැකපිට අත්අඩංගුවට ගෙන රක්ෂිත බන්ධනාගාරගත කර සිටි හිටපු පාර්ලිමේන්තු මන්ත්‍රි ශෂින්ද්‍ර රාජපක්ෂ මහතා වෙනුවෙන් ඉදිරිපත් වූ ඇප ඉල්ලීම ප්‍රතික්ෂේප කළ කොළඹ ප්‍රධාන මහෙස්ත්‍රාත් අසංග එස්. බෝදරගම මහතා එම සැකකරු ලබන 12 වැනිදා දක්වා යළි රක්ෂිත බන්ධනාගාරගත කිරීමට ඊයේ (29දා) නියෝග කළේය.
සිය සේවාදායකයා මේ වනවිට මාසයකට ආසන්න කාලයක් රක්ෂිත බන්ධනාගාර භාරයේ පසුවන බැවින් ඕනෑම ඇප කොන්දේසියක් යටතේ ඇපමත මුදාහරින්නැයි සැකකරු වෙනුවෙන් පෙනී සිටි නීතිඥවරයා ඉල්ලීමක් කළ මුත් විමර්ශන අවසන් වී නොමැති බවත් දේශපාලන බලයක් ඇති එකී සැකකරු ඇප මත මුදාහැරීමෙන් ඉදිරි විමර්ශනවලට බාධාවක් විය හැකි බවත් කියමින් විමර්ශන නිලධාරීන් දැක්වූ කරුණු සලකා බැලූ ප්‍රධාන මහෙස්ත්‍රාත්වරයා විත්තියේ ඇප ඉල්ලීම ප්‍රතික්ෂේප කළේය. ඉදිරි නඩු දිනයේදී එකී චෝදනා සනාථ කිරීම සඳහා ඉදිරිපත් කිරීමට අපේක්ෂා කරන පැමිණිල්ලේ සාක්ෂිකරුවන්ගේ සාක්ෂිවල සම්පිණ්ඩන වාර්තා අධිකරණයට ඉදිරිපත් කරන ලෙසට ද පැමිණිල්ලට නියෝග කළේය.
@දිවයින
