එප්පාවල පොස්පේට් අඩු මිලට සමාගම්වලට දීලා
එප්පාවල පොස්පේට් නිධියෙන් ලබා ගන්නා පොස්පේට් තොග අපනයනය කිරීමට සම්මත මිල ගණන්වලට වඩා අඩු මිල ගණන්වලට තමන්ට හිතවත් සමාගම් කිහිපයකට ලබා දීමට ඉකුත් රජය සමයේදී කටයුතු කිරීම සම්බන්ධයෙන් හිටපු ජනාධිපති රනිල් වික්‍රමසිංහ මහතා, විෂය භාර ඇමැතිවරයාව සිටි චාමර සම්පත් දසනායක ඇතුළු එවක කැබිනට් මණ්ඩලයේ සිටි පිරිසකට එරෙහිව ගොනු කළ මූලික අයිතිවාසිකම් පෙත්සමක් විභාගයට ගැනීමට ශ්‍රේෂ්ඨාධිකරණය ඊයේ (01) අවසර ලබා දුන්නේය.
පෙත්සම් විභාගය මාර්තු මස 09 වැනිදා ඇරඹීමට නියම කෙරිණි. අදාළ සිදුවීම හේතුවෙන් මෙරට ජනතාවගේ මූලික අයිතිවාසිකම් උල්ලංඝනය විය හැකිය යන පදනම මත මේ අවසරය දෙන ලදි. එම පෙත්සම පිළිබඳව මූලික කරුණු සලකා බැලීමෙන් අනතුරුව ජනක් ද සිල්වා, ප්‍රියන්ත ප්‍රනාන්දු සහ සම්පත් අබේකෝන් යන මහත්වරුන්ගෙන් සමන්විත ත්‍රිපුද්ගල ශ්‍රේෂ්ඨාධිකරණ විනිසුරු මඬුල්ලක් විසින් මේ බව ප්‍රකාශ කරන ලදි. පරිසරය යුක්ති කේන්ද්‍රය විසින් ගොනු කර ඇති මේ පෙත්සමෙහි වගඋත්තරකරුවන් ලෙස හිටපු ජනාධිපති රනිල් වික්‍රමසිංහ සහ හිටපු ඇමැති මණ්ඩල සාමාජිකයන්, භූ විද්‍යා හා පතල් කාර්යාංශය, එහි අධ්‍යක්ෂ ජනරාල්වරයා, නීතිපතිවරයා ඇතුළු තිස් දෙදෙනෙක් නම් කර සිටිති.
පෙත්සම කැඳවූ අවස්ථාවේදී පෙත්සම්කාර පාර්ශ්වය වෙනුවෙන් පෙනී සිටි නීතිඥ ආචාර්ය රවීන්ද්‍රනාත් දාබරේ මහතා අධිකරණය හමුවේ දීර්ඝ ලෙස කරුණු ඉදිරිපත් කළේය. ලෝක වෙළෙඳපොළේ පොස්පේට් මෙට්‍රික් ටොන් එකක් සඳහා නියමිත මිලට වඩා ඉතාම අඩු මිලකට පොස්පේට් තොග තමන්ට හිතවත් සමාගම් කිහිපයකට අපනයනය කිරීම සඳහා ලබාදීමට වගඋත්තරකරුවන් කටයුතු කළ බව ඒ මහතා සඳහන් කළේය. පොස්පේට් නිකුත් කිරීමට අවශ්‍ය බලපත්‍ර නිකුත් කරන ලෙස එවකට විෂය භාර ඇමැතිවරයා වශයෙන් කටයුතු කළ චාමර සම්පත් දසනායක මහතා භූ විද්‍යා හා පතල් කාර්යාංශය ඇතුළු රාජ්‍ය ආයතනවලට බලපෑම් සිදු කර තිබෙන බවට තොරතුරු අනාවරණය වී ඇති බව නීතිඥවරයා පෙන්වා දුන්නේය. එප්පාවල පොස්පේට් නිධිය සම්බන්ධයෙන් ශ්‍රේෂ්ඨාධිකරණය විසින් 2000දී තිබෙන නියෝගයකට පටහැණි ලෙස ලංකා පොස්පේට් සමාගම විසින් පොස්පේට් තොග ගැනීම සිදු කළ බව ඒ මහතා එහිදී සඳහන් කළේය. එමඟින් රජයටත්, මහජනතාවටත් විශාල පාඩුවක් සිදුවී ඇති බවට ඔහු චෝදනා කළේය. එම ක්‍රියාවලිය හේතුවෙන් මෙරට ජනතාවගේ මූලික අයිතිවාසිකම් උල්ලංඝනය වී ඇති බවට ද ඔහු කරුණු ඉදිරිපත් කළේය. ඉදිරිපත් වූ කරුණු සලකා බැලූ ත්‍රිපුද්ගල ශ්‍රේෂ්ඨාධිකරණ විනිසුරු මඬුල්ල එම පෙත්සම විභාගයට ගැනීමට තීරණය කළේය.
@දිනමිණ
