යක්කල පෙරටුගාමී සමාජවාදී පක්ෂ කාර්යාලයට ප්‍රහාරයක්

ගම්පහ යක්කල ප්‍රදේශයේ පිහිටි පෙරටුගාමී සමාජවාදී පක්ෂයේ ප්‍රධාන කාර්‍යාලයට අද (02) උදෑසන කඩාවැදුණු මැර පිරිසක් එහි සිටි පුද්ගලයින්ට පහර දෙමින් බලහත්කාරයෙන් කාර්‍යලාය අත්පත් කරගැනීමට උත්සහා ගන්නා ලදී. 100කට වැඩි පිරිසක් මෙසේ කඩු පොලු රැගන කාර්‍යාලයට කඩා වැදී තිබෙන අතර එම පිරිසට ආණ්ඩුවේ පාර්ලිමේන්තු මන්ත්‍රීවරුන් සහ අණ්ඩු පක්ෂයේ දිස්ත්‍රික් සහ ප්‍රාදේශීය සංවිධායකවරුන්ද අයත්‍ බවයි පෙරටුගාමී සමාජවාදී පක්ෂය චෝදනා කරන්නේ. මෙම මෙලෙච්ඡ පහරදීම නැවැත්වීම සඳහා පොලීසිය කිසිඳු මැදිහත් වීමක් සිදුකර නොමැති බවත් ඔවුන් ආණ්ඩුවේ මැරයින්ට සහයෝගය දක්වන ලද බවත් පෙරටුගාමී සමාජවාදී පක්ෂයේ මධ්‍යම කාරක සභික සුජිත් කුරුවිට මහතා පවසනවා.

මේ පිළිබදව වැඩිදුරටත් අදහස් දැක්වූ සුජිත් කුරුවිට මහතා,

                             පක්ෂ ඛණ්ඩනයත් සමග පෙසප කණ්ඩායම සතු වූ මෙම කාර්‍යාලය දැනට අවුරුදු 14ක් තිස්සේ පක්ෂය විසින් පරිහරණය කරනවා. පක්ෂයේ මැතිවරණ කටයුතු පක්ෂ සංවිධාන කටයුතු බහුජන මැදිහත් වීම් ආදී සියලු නිල කටයුතු මෙම ස්ථානය මූලික කරගෙන ක්‍රියාත්මක වන අතර නඩු තීන්දුවක් ඇතැයි පවසමින් ආණ්ඩුවේ මැරයි මෙසේ මෙම ස්ථානයට කඩා පැනීම කිසිසේත්ම යුක්ති සහගත නැහැ. මෙම පහරදීම සිදු කර ඇත්තේ ආණ්ඩුවට සම්බන්ධ මැරයන් පිරිසක් විසින්. මෙම ප්‍රහාරයෙන් මමත් අපේ පක්ෂයේ සහෝදරියන් සහ සහෝදරවරුන් අමානුෂික පහරකෑමකට ලක්වුණා. මේ වන විට කිහිපදෙකේම රෝහල්ගත කර තිබෙනවා. ඉතා අමානුෂික ලෙස අපේ සහෝදරියන්ට සහ සහෝදරවරුන්ට ‌මේ මැරයන් පහර දුන්නා. එකවර 100කට අධික පිරිසක් පැමිණ සිදුකළ මෙම මිලේච්ඡ පහර දී ප්‍රජාතන්ත්‍රවාදය අගයන කිසිම මනුෂ්‍යයෙක් අනුමත කරන්නේ නැහැ.

 කිසියම් පුද්ගලයෙක් හෝ සමූහයක්  යම් ස්ථානයකින් ඉවත් කිරීමට අවශ්‍ය නම් නිත්‍යානුකූලව ෆිස්කල් නියෝගයක් සමඟ පැමිණිය යුතුයි. මෙම ස්ථානයේ අප පක්ෂයට අයත් බඩු බාහිරාදිය  භාණ්ඩ මෙන්ම පුස්තාකාලය සතු පොත්පත් විශාල ප්‍රමාණයක් තිබෙනවා.  ආණ්ඩුව රජයේ කාර්‍යාල සුද්ධ කිරීම යැයි ව්‍යාපෘතියක් පටන් ගෙන දැන් එය තමන්ට විරුද්ධ මත දරණ දේශපානලන පක්ෂවල කාර්‍යාලවලට පහරදීමේ උපක්‍රමයක් දක්වා වෙස් මාරු කිරීම පිළිකුල් සහගතයි.