චීන ජාතිකයින්ට නාසා තහනම්
අමෙරිකාවේ වලංගු වීසා බලපත්‍ර සහිත චීන ජාතිකයන්ට කොන්ත්‍රාත්කරුවන් ලෙස සේවය කිරීම හෝ ශිෂ්‍යයන් ලෙස පර්යේෂණ සඳහා දායකත්වය ලබාදීම වහාම ක්‍රියාත්මක වන පරිදි අත්හිටුවූ බව නාසා අභ්‍යවකාශ ආයතනය නිවේදනය කර ඇතැයි විදෙස් මාධ්‍ය වාර්තා කරයි. මේ මස 5 වැනිදා සිට බලපැවැත්වෙන පරිදි එම පහසුකම් අත්හිටුවීමට නාසා ආයතනය තීරණය කර ඇත්තේ ආයතනික මට්ටමෙන් සිදු කරන පර්යේෂණ සහ එහි උපාංග ආරක්ෂා කිරීමේ පියවරක් ලෙස බව ද විදෙස් මාධ්‍ය වැඩිදුරටත් වාර්තා කරයි.
ලොව විශාලතම ආර්ථිකයන්ට හිමිකම් කියන අමෙරිකාව සහ චීනය අතර පවතින තරගකාරිත්වය සහ චීනයේ වේගයෙන් වර්ධනය වන අභ්‍යවකාශ වැඩසටහන් හේතුවෙන් චීනය සමඟ දත්ත තොරතුරු හුවමාරු කරගැනීම අමෙරිකානු රජය විසින් තහනම් කරනු ලැබු බවත්, ආරක්ෂක ගැටලු හේතුවෙන් එම තීරණය ගෙන ඇති බවත් විදෙස් මාධ්‍ය සඳහන් කරයි. කෙසේ වුවද අමෙරිකානු රජයේ තීරණය මත නාසා ආයතනය විසින් චීන ජාතිකයන්ට සිය පහසුකම් අත්හිටුවීමට පියවර ගැනීම දෙරට අතර විද්‍යාත්මක සහයෝගිතාව පිරිහීමට හේතුවනු ඇතැයි විදෙස් මාධ්‍ය වාර්තා කරයි.
@දිනමිණ
