ආනන්දත් මාට්ටු

ගණේමුල්ල සංජීව ඝාතනයේ ප්‍රධාන සැකකාරියක වන ඉෂාරා සෙව්වන්දිට යාපනයේ සිට ඉන්දියාවට පලායෑමට පහසුකම් සැපයූ බව කියන ආනන්ද නමැත්තා කොළඹ අපරාධ කොට්ඨාසය මගින් ඊයේ (21 දා) අත්අඩංගුවට ගෙන ඇත.

මේ අතර ඉන්දියාවට පලා යනතුරු සෙව්වන්දිට නවාතැන් පහසුකම් සැපයූ කිලිනොච්චියේ පදිංචි කාන්තාවක ද පොලිසියෙන් අත්අඩංගුවට ගෙන තිබේ.

සැකකාර ආනන්ද නමැත්තා ජේ. කේ. බායිගේ සමීපතමයකු වන අතර පුද්ගලයන් නීතිවිරෝධි අන්දමින් මුහුදු මාර්ගයෙන් විදෙස් රටවලට යැවීමේ ජාවාරමේ යාපනය ප්‍රදේශයේ නියෝජිතයා ලෙස ද කටයුතු කර ඇත.

සෙව්වන්දි ඉන්දියාවට යැවීම සම්බන්ධයෙන් විමර්ශන ආරම්භ කිරීමෙන් පසු ආනන්ද කොළඹට ආසන්න ප්‍රදේශයක සැඟවී සිට ඇති බව පොලිසිය පවසයි. කොළඹ අපරාධ කොට්ඨාසයේ නිලධාරීන් කළ විමර්ශනයකදී ආනන්ද නමැත්තා අත්අඩංගුවට ගැනීමට හැකි වූ අතර මේ වනවිට ඔහුගෙන් දීර්ඝ ලෙස ප්‍රශ්න කරගෙන යයි.

ඉෂාරා සෙව්වන්දි ඉන්දියාව බලා ගොස් ඇත්තේ යාපනය මුහුදු තීරයෙන්ය. ඇය කුඩා බෝට්ටුවකින් රැගෙන ගොස් ඇති අතර එහි පිරිමි පුද්ගලයන් තිදෙනකු ද ගමන් කර ඇත.

සෙව්වන්දි රැගත් බෝට්ටුවට ඉන්දියාට යෑම සඳහා දින පහක් ගතවී ඇත. නාවික හමුදා ආරක්ෂක නිලධාරීන් මඟහරිමින් මෙම බෝට්ටුව ආරක්ෂිත ලෙස ඉන්දියාවට ගොස් ඇති අතර එහිදී ජේ. කේ. බායි පැමිණ සෙව්වන්දි භාරගෙන තිබේ.

බස්නාහිර පළාත භාර ජ්‍යෙෂ්ඨ නියෝජ්‍ය පොලිස්පති සංජීව ධර්මරත්න සහ කොළඹ දිසාව භාර නියෝජ්‍ය පොලිස්පති නිශාන්ත සොයිසා යන මහත්වරුන්ගේ උපදෙස් මත කොළඹ අපරාධ කොට්ඨාසයේ අධ්‍යක්ෂ ඉන්දික ලොකුහෙට්ටි මහතාගේ මෙහෙයවීමෙන් විමර්ශන පැවැත්වෙයි.

@දිවයින