පද්මේගේ දුරකථනයේ පියුමිගේ පින්තූර
කෙහෙල්බද්දර පද්මේ සමඟ රංගන ශිල්පිනියන් සහ නිරූපණ ශිල්පිනියෝ 05 දෙනෙක් පමණ සම්බන්ධකම් පවත්වා ඇති බව අපරාධ පරීක්ෂණ දෙපාර්තමේන්තුව විසින් කළ විමර්ශනවලින් හෙළිවී තිබේ.කෙහෙල්බද්දර පද්මේගේ ජංගම දුරකතනය විශ්ලේෂණය කිරීමේදී කෙහෙල්බද්දර පද්මේ සමඟ ඒ අය සම්බන්ධකම් පවත්වා ඇති බව පෙනී ගොස් ඇත.
එම නිරූපණ ශිල්පීන් සහ රංගන ශිල්පීහු ඩුබායිහි සංචාරය කළ අවස්ථා කිහිපයකදී කෙහෙල්බද්දර පද්මේ ඔවුන් සමඟ රැඳීසිට ඡායාරූප පවා ගෙන තිබෙන බවත්, එම ඡායාරූප කෙහෙල්බද්දර පද්මේගේ ජංගම දුරකතනයේ තිබී හමුවී ඇති බවත්, අපරාධ පරීක්ෂණ දෙපාර්තමේන්තු තොරතුරු අනාවරණය කළේය. ඒ අනුව රංගන ශිල්පී පියුමි හංසමාලි මහත්මියගෙන් අපරාධ පරීක්ෂණ දෙපාර්තමේන්තුව විසින් ප්‍රශ්න කර ප්‍රකාශ සටහන් කරගෙන ඇත.
ඉදිරියේදී රංගන ශිල්පීන් කිහිප දෙනෙක්ගෙන්ද මේ සම්බන්ධයෙන් ප්‍රශ්න කිරීමට නියමිත බව අපරාධ පරීක්ෂණ දෙපාර්තමේන්තු තොරතුරු අනාවරණය කළේය.
කෙහෙල්බද්දර පද්මේට අයත් උඩුගම්පොළ පිහිටි කබානා 06ක් සහිත ඉඩමක් සහ තවත් ඉඩමක් තහනම් කිරීමට ද අපරාධ පරීක්ෂණ දෙපාර්තමේන්තුවේ නීති විරෝධි වත්කම් විමර්ශන කොට්ඨාසය පියවර ගෙන ඇත. එම වත්කම්වල වටිනාකම රුපියල් ලක්ෂ 500ක් වන බව එම කොට්ඨාසය සඳහන් කරයි. මෙම දේපළ මත්කුඩු ජාවාරමෙන් උපයාගත් මුදල්වලින් මිලදී ගෙන ඇති බව පෙනී යන බැවින් මෙම දේපළ රාජසන්තක කිරීමට පියවර ගන්නා බව ද අපරාධ පරීක්ෂණ දෙපාර්තමේන්තුව සඳහන් කරයි.
@දිනමිණ
