සමියා ජයගනී, ටැන්සානියාව ගිනිගනී
අඛණ්ඩව දෙවැනි වරටත් ටැන්සානියාවේ ජනාධිපතිවරණය ජයගත් එරට පළමු කාන්තා ජනාධිපති සමියා සුලුහු හසන්ගේ ජයග්‍රහණය ප්‍රතික්ෂේප කරමින් විපක්ෂය සහ දහස් සංඛ්‍යාත ජනතාව වීදි බැස සිදු කළ විරෝධතාව අතරතුරදී 700කට අධික පිරිසක් ජීවිතක්ෂයට පත් වූ බවට තොරතුරු ලැබී ඇතැයි විදෙස් මාධ්‍ය සඳහන් කරයි. වසර 2021 මාර්තුවේදී පළමු වරට ටැන්සානියාවේ ජනාධිපති ධුරයට පත් වූ පාලක චමා චා මපින්ඩුසි පාලක පකෂයේ නායිකා 65 හැවිරිදි සමියා සුලුහු පසුගියදා පැවති ජනාධිපතිවරණයේදී 98%ක ඡන්ද ප්‍රතිශතයක් ලැබූ බව එරට මැතිවරණ කොමිසම නිවේදනය කළ අතර, සිය ජයග්‍රාහී කතාව සිදු කරමින් ජනාධිපතිනිය ප්‍රකාශ කර ඇත්තේ නිදහස් සහ ප්‍රජාතන්ත්‍රවාදී ලෙස මැතිවරණය පැවති බවය. පශ්චාත් මැතිවරණය ප්‍රචණ්ඩ ක්‍රියා ව්‍යාප්ත වූ බවට වාර්තා වුවද, විරෝධතාකරුවන් 700කට අධික පිරිසක් ජීවිතක්ෂයට පත්වීම ඇය විසින් ප්‍රතික්ෂේප කරනු ලැබූ බව ද වාර්තා වේ.
එසේ වුවත් ප්‍රතිවාදී දේශපාලනඥයන් සිරගත කිරීමෙන් සහ මැතිවරණයට ඉදිරිපත් වීම වළක්වාලමින් පවත්වනු ලැබූ මෙවර මැතිවරණයේ ප්‍රතිඵල ප්‍රතික්ෂේප කරන බව නිවේදනය කර ඇති ටැන්සානියාවේ විපක්ෂය එය ප්‍රජාතන්ත්‍රවාදය සමච්චලයට ලක් කිරීමක් බවට ද චෝදනා එල්ල කර තිබේ. ජනාධිපතිවරණයේ ප්‍රතිඵල ප්‍රකාශයට පත් කිරීමත් සමඟ රට පුරා සමියා සුහුලුට එරෙහිව විරෝධතා සහ ප්‍රචණ්ඩ ක්‍රියා ව්‍යාප්ත වී ඇතැයිද, පොදු ප්‍රවාහන බස් රථ ඇතුළු රජයේ වාහනවලට සහ ගොඩනැඟිලිවලට ගිනි තබමින් විරෝධතාකරුවන් සිය විරෝධත පළ කරද්දී තත්ත්වය පාලනය කිරීමට ඇඳිරි නීතිය පනවා ආරක්ෂක අංශ විසින් දැවැන්ත ප්‍රහාරයක් එල්ල කර ඇතැයි ද විදෙස් මාධ්‍ය සඳහන් කරයි.
@දිනමිණ
