ජනතා විරෝධතා මැද සමියා දිවුරුම් දෙයි
අඛණ්ඩව දෙවැනි වරටත් ටැන්සානියාවේ ජනාධිපතිවරණය ජයගත් එරට පළමු කාන්තා ජනපති සමියා සුලුහු හසන් දැඩි ආරක්ෂක රැකවල් මැද ඊයේ දිව්රුම් දුන් බව විදෙස් මාධ්‍ය වාර්තා කරයි. ඇය දෙවැනි ධුර කාලය ආරම්භ කරනු ලැබුවේ ඇගේ ජයග්‍රහණය ප්‍රතික්ෂේප කරමින් විපක්ෂය සහ දහස් සංඛ්‍යාත ජනතාව වීදි බැස සිදු කළ විරෝධතාව අතරතුරදීය. මහජනතාවට දොරටු වසා පැවති අධි ආරක්ෂිත උත්සවයක් අතරතුර 65 හැවිරිදි රාජ්‍ය නායිකාව දිව්රුම් දීම සිදු කර ඇති අතර, එම උත්සවය ආවරණය කිරීම සඳහා රාජ්‍ය මාධ්‍යයට පමණක් අවසර ලැබී තිබූ බව ද වාර්තා වේ.
නව ජනපතිනිය පසුගියදා පැවති ජනාධිපතිවරණයේදී 98%ක ඡන්ද ප්‍රතිශතයක් ලැබූ බව එරට මැතිවරණ කොමිසම නිවේදනය කළ අතර, දුෂිත මැතිවරණයක් පැවැත්වූ බවට චෝදනා කරමින් එරට විපක්ෂය ආරම්භ කළ විරෝධතාව පසුව රට පුරා පැතිරී යෑමෙන් ප්‍රචණ්ඩත්වයට හැරුණු බව ද වාර්තා වේ. විරෝධතාකරුවන් පාලනය කිරීම සඳහා පොලීසිය හා ආරක්ෂක අංශ ජීව උණ්ඩ භාවිත කළ බවට චෝදනා එල්ල වී ඇතැයි ද, 700කට අධික විරෝධතාකරුවන් පිරිසක් ජීවිතක්ෂයට පත් වී ඇතැයි ද තොරතුරු වාර්තා වී තිබේ. එහෙත් එම වාර්තාව ජනාධිපතිනිය ප්‍රතික්ෂේප කර ඇතැයි විදෙස් මාධ්‍ය සඳහන් කරයි.
@දිනමිණ
