‘ප්‍රජාශක්ති‘ ජාතික ජන බලවේගය ශක්තිමත් කිරීමක් – සජිත් ප්‍රේමදාස
වත්මන් ආණ්ඩුවේ ‘ප්‍රජාශක්ති‘ වැඩසටහන රටට ප්‍රතිලාභයක් ලබාදීම නොව ජාතික ජන බලවේගය ශක්තිමත් කිරීමක් බව විපක්ෂ නායක සජිත් ප්‍රේමදාස මහතා පාර්ලිමේන්තුවේ දී පෙරේදා (15) ප්‍රකාශ කළේය.
විසර්ජන පනත් කෙටුම්පත (2026) අය – වැය කාරක සභා අවස්ථාවේ විවාදයට එක්වෙමින් ඒ මහතා මේ බව සඳහන් කළේය. ජනාධිපති, අගමැති කාර්යාලය, උපරිමාධිකරණවල විනිශ්චයකාරවරු, අමාත්‍ය මණ්ඩල කාර්යාලය, රාජ්‍ය සේවා කොමිෂන් සභා කාර්යාලය, අධිකරණ සේවා කොමිෂන් සභාව, ජාතික පොලිස් කොමිෂන් සභාව, පරිපාලන අභියාචන විනිශ්චය අධිකාරිය, අල්ලස් හෝ දූෂණ චෝදනා විමර්ශන කොමිෂන් සභාව, මුදල් කොමිෂන් සභා කාර්යාලය ඇතුළු ආයතන 25ක වැය ශීර්ෂ සම්බන්ධයෙන් මෙම විවාදය පැවැත්විණි.
එහිදී වැඩිදුරටත් අදහස් පළකළ විපක්ෂ නායක සජිත් ප්‍රේමදාස මහතා,
ඡන්දය කාලයේ 16,600ක් ගුරුවරුන්ට පත්වීම් දෙනවා කියලා ඡන්දයෙන් පස්සේ ඒක නොකරන එකේ තර්කය කුමක්ද? ‘පොහොසත් රටක් – ලස්සන ජීවිතයක්‘ කියන ප්‍රතිපත්තිය කියවා බලන්න. ඡන්දයෙන් දිනලා නොකරන එකේ තර්කය කුමක්ද? මේ ප්‍රතිපත්ති ප්‍රකාශනයේ තිබෙන රැකියා විරහිත උපාධාධාරීන් 35,000කට රැකියා දෙනවා කියනවා. ගුරුවරු 20,000ක් බඳවා ගන්නවා කියනවා. මේ ප්‍රතපත්තිය තුළ ඡන්දය දිනන්න මෙහෙම කියලා මේවා නොකරන එකේ තර්කය කුමක්ද?
කාදිනල් හිමියන්ගේ උපන් දිනය අදයි. අපි එතුමාට සුබ පතනවා! දීර්ඝායුෂ ප්‍රාර්ථනා කරනවා! කරන සේවය ඉදිරියටත් කරගෙන යන්න ප්‍රාර්ථනා කරනවා. එතුමාට පොරොන්දු වුණා, පාස්කු ප්‍රහාරයේ මහ මොළකරුවන් අල්ලනවා කියලා. නමුත් ඡන්දය ගත්තාට පස්සේ මහ මොළකරු අල්ලා තිබෙනවාද? එහි තර්කය කුමක්ද?
ජනතාව මුහුණ දෙන ගැටලු පිළිබඳව පාර්ලිමේන්තුවේ දී අවධානය යොමු වියයුතු වෙනවා. 52%ට වඩා ක්ෂුද්‍ර, සුළු හා මධ්‍ය පරිමාණ ව්‍යවසායකයන් විශාල සේවාවක් කරනවා. 2020 – 2022 කාලයේදී ඔවුන්ගේ කර්මාන්ත 263,000ක් වැසී තිබෙනවා. 2023 – 2025 කාලයේ තවත් 150,000ක් ව්‍යවසායකයන්ගේ ආයතන වැසී තිබෙනවා.
@දිනමිණ
