ඉතිහාසයේ තියුණු පරීක්ෂාවට ලක්වන මනුෂ්‍යත්වය
සියවස් කිහිපයක ඉතිහාසය තුළ සමස්ත ශ්‍රී ලංකාවම දරුණු ස්වභාවික ආපදාවකට පත්ව සිටින මෙම මොහොත ඉතිහාසයේ තියුණුම පරීක්ෂාවකට සියලුම දෙනා ලක්කෙරෙන අවස්ථාවක් බව නිරීක්ෂකයන් පෙන්වා දෙති.
අතිශය පටු දේශපාලන ප‍්‍රචාර ඇතුළු අන්තවාදී ප‍්‍රචාර මෙන්ම ජනතාව නොසන්සුන් කිරීමට තුඩු දෙන ප‍්‍රචාර ඉතාමත් සීමිත පිරිසක් විසින් ගෙනයමින් සිටිති. සමාජ මාධ්‍ය මෙන්ම ප‍්‍රධාන ධාරාවේ මාධ්‍යද කටකතාද උපයෝගී කර ගනිමින් විකෘති සහ අසත්‍ය ප‍්‍රචාර ගෙනයන්නන් මානව විරෝධී ලෙස ඉතිහාසයට එක්වන බව නිරීක්ෂකයන් වැඩිදුරටත් පෙන්වා දෙයි. රටක් හැටියට ජනතාවගේ මූලිකම අවශ්‍යතා පවා සැපයීම අභියෝගයට ලක්වී ඇති මේ අවස්ථාවේ එවැනි මානව විරෝධීන්ගේ ප‍්‍රචාර සහ කි‍්‍රයාකලාපද ඉතා හොඳින් හඳුනාගැනීමට වටපිටාව සැකසී ඇති බව එම විචාරකයන් වැඩිදුරටත් අවධාරණය කරයි.
පානීය ජලය, විදුලිය, සෞඛ්‍යය, නිවාස සහ ප‍්‍රවාහනය දැඩි ලෙස අකර්මණ්‍ය වී තිබේ. පානීය ජන සැපයීමේදී ජලය ලබා ගන්නා මූලාශ‍්‍ර විනාශ වීම, පොම්පාගාර විනාශ වීම, පිරිපහදු මධ්‍යස්ථාන විනාශ වීම, බෙදා හැරීම් මධ්‍යස්ථාන විනාශ වීම, සහ නල පද්ධති විනාශ වීම වශයෙන් සමස්ත පද්ධතියම අකර්මණ්‍ය වී ඇති ස්ථාන රැසක් වාර්තා වේ. එමෙන්ම ඇතැම් රෝහල් ජලයෙන් යටවීම හෝ නාය යෑම් තර්ජන හමුවේ ඉවත් කර ගැනීමට සිදුවී තිබේ. විදුලිය බෙදා හැරීමේ උප පොළවන් ජලයෙන් යටවී ඇති අතර රැහැන් මතට ගස් කඩා වැටීම හෝ නාය යෑම් නිසා සම්ප්‍රේෂණ මාර්ග බිඳ වැටීම සිදුවී ඇත.
නිවාස සැඩ පහරට ගසාගෙන යෑම, නාය යෑම, ජල ගැල්මට හසුවීම හෝ ආරක්ෂිත ස්ථාන කරා යොමුවීම කරුණු මගින් අවතැන් වීම් රැසක් සිදුවී ඇත. මෙවැනි තත්වයක් මුළු රටටම බලපාන ආකාරයට සිදුවී තිබෙන්නේ සියවස් කිහිපයකට පසුව බව ඉතිහාසය අධ්‍යයනය කරන්නන් පෙන්වා දෙයි. මෙම සමස්ත පසුබිම තුළ මෙරට සියලූම ජනතාව ඉතිහාසයේ තියුණුම පරීක්ෂාවකට ලක්වී සිටින බවත් ඉවසීමෙන්, අන්තවාදී ප‍්‍රචාරවලට නොරැවටීමෙන් සිටීම මෙන්ම පොදු කටයුතු වෙනුවෙන් උපරිම දායකත්වය ලබාදීම මේ මොහොතේ සාමූහිකව සිදු කළ යුතු බව සමාජ මාධ්‍ය ඔස්සේ බොහෝ දෙනෙකු පෙන්වා දී තිබේ.
@Lanks Truth
