මියගිය සංඛ්‍යාව 69දක්වා ඉහළට

34ක් අතුරුදන්

219,282ක් අවතැන්

මනම්පිටිය පාලමේ කොටුවූ 13ක් ගුවන් හමුදාවෙන් මුදාගැනෙති

කතරගමටත් ජල ගැලීම් දේවාල සියල්ල යටවෙයි

පේරාදෙණිය සරසවිය නැවත දැනුම් දෙනතුරු වසා දැමේ

කමාන්ඩෝ පුහුණුවට පැමිණි සිසුහු මුදා ගැනෙති

තුන්වැනි දිනටත් සෝමාවතියට යන පාර යටවෙයි

කොළඹත් තැන තැන යටවෙයි

කලාවැවේ පාලම මත උඩින් ජල පහරට අසුවූ බස් රථයේ සිටි පිරිස මුදාගනී

මහනුවර මරණ 50ක්

කැලණි ගඟෙනුත් මහා ගංවතුර අවදානමක්

මොරගහකන්ද පාලම කැඩී යයි

දිවයිනට බලපා ඇති අයහපත් කාලගුණ තත්ත්වය හේතුවෙන් ඇතිවූ ආපදා තත්ත්වයෙන් ඊයේ (28දා) ආපදා කළමනාකරණ මධ්‍යස්ථානය විසින් නිකුත් කරන ලද විශේෂ වාර්තාව අනුව පුද්ගලයන් 69 දෙනකු ජීවිතක්ෂයට පත්ව ඇත.

පස් කඳු කඩා වැටීම්, අධික සුළං, ගංවතුර වැනි ආපදා හේතුවෙන් මොවුන් මෙලෙස ජීවිතක්ෂයට පත්ව තිබේ.

ඊට අමතරව පුද්ගලයන් 33 දෙනකු අතුරුදන්වී ඇති අතර පුද්ගලයන් 14 දෙනකුට තුවාල සිදුව තිබේ.

මේ අතරට හසලක සිදුවූ නාය යෑමකින් පස් දෙනකු මියගොස් ඇති අතර, 12 දෙනකු අතුරුදන්වූ සිදුවීම ද ඇතුළත්වය.

මෙම ආපදා තත්ත්වය හේතුවෙන් දිවයිනේ දිස්ත්‍රික් 20 ක ප්‍රාදේශීය ලේකම් කොට්ඨාස 152 ක් බලපෑමට ලක්ව ඇත.

පවුල් 12,313 ක පුද්ගලයන් 43,991ක් ආපදා තත්ත්වයෙන් ඍජුවම බලපෑමට ලක්ව ඇති අතර නිවාස 04 ක් පූර්ණ වශයෙන් සහ තවත් නිවාස 665ක් අර්ධ වශයෙන් හානියට පත්ව තිබේ.

එම බලපෑමට ලක්වූ පුද්ගලයන්ගෙන් සුරක්ෂිතතා මධ්‍යස්ථාන 52ක පවුල් 12ක පුද්ගලයෝ 3684 දෙනෙක් රැඳී සිටිති. සිය ඥාති පවුල්වල සිටින මුළු පවුල් සංඛ්‍යාව 1097 කි.

දැනට පවතින අධික වර්ෂාපතනය හමුවේ ගංඟා ද්‍රෝණි ආශ්‍රිත පහත් බිම් ප්‍රදේශවලට මහ ගංවතුර තත්ත්වයක් ඇතිවී ඇති අතර තවදුරටත් එම ජල මට්ටම් ඉහළ යන බව වාරිමාර්ග දෙපාර්තමේන්තුව කියා සිටී.

ඒ අනුව මහවැලි, කැලණි, කළු වළවේ යන ප්‍රධාන ගංඟා මෙන්ම, දැදුරු ඔය, මහ ඔය, කලා ඔය, මල්වතු ආදී ප්‍රධාන ජලාශ්‍ර ඇළ වේලි සියල්ල උතුරා යන තත්ත්වයක පවතින බවද කියයි.

එබැවින් ගංඟා දෙපස පහත් බිම්වල වෙසෙන සියලුම ජනයා හැකි ඉක්මනින් ආරක්ෂිත ස්ථාන වෙත ගමන් කිරීම කළ යුතු බවත් ගංවතුර තත්ත්වය නැරඹීමට හෝ එහි පයින් ගමන් නොයන ලෙසද ඉල්ලා සිටිති.

මේ අතර දිවයිනට බලපා ඇති ‘දිට්වා’ සුළිකුණාටුව ඊයේ (28දා) උදේවරුව වනවිට මඩකලපුව සිට කිලෝමීටර් 60ක් දකුණු දෙසින් කේන්ද්‍රගත වී උතුරට බරව, වයඹ දෙසට ගමන් කළ බව සඳහන් වේ.

සුළිකුණාටු තත්ත්වය හේතුවෙන් තවදුරටත් දිවයිනට, තද සුළං, තද වැසි ඇති වන අතර මුහුදු ප්‍රදේශ දැඩි ලෙස රළු වන බවද කාලගුණ විද්‍යා දෙපාර්තමේන්තුව සඳහන් කරයි.

එබැවින් මුහුදු ප්‍රදේශවල සුළඟේ වේගය පැයට කිලෝමීටර 60ත් 70ත් අතර ප්‍රමාණයක් දක්වා ඉහළ යා හැකි අතර එය විටින් විට අඩු වැඩි වන බවද කියයි.

පුත්තලම සිට කොළඹ, ගාල්ල, හම්බන්තොට, මඩකළපුව, ත්‍රිකුණාමලය හරහා කන්කසන්තුරය දක්වා වෙරළට ඔබ්බෙන් වන මුහුදු ප්‍රදේශවල මුහුදු රළ උස මීටර් 2.5ත් 3.5 ත් අතර ප්‍රමාණයකට ඉහළ යා හැකි බවද පවසයි.

මේ අතර පවතින අයහපත් කාලගුණික තත්ත්වය හේතුවෙන් පේරාදෙණිය විශ්වවිද්‍යාලය නැවත දැනුම් දෙනතුරු වසා දමා ඇතැයි විශ්වවිද්‍යාල ප්‍රතිපාදන කොමිෂන් සභාව පවසයි.

පවතින අධික වැසි තත්ත්වය හේතුවෙන් එහි නේවාසිකාගාර ජලයෙන් යටවී තිබීම නිසා මෙලෙස වසා දමා තිබේ.

කොළඹ – නුවර මාර්ගය කෑග්ලල මීවිටිය ප්‍රදේශයේ නායයෑමේ අවදානමක් ඊයේ (28දා) මතුවී තිබුණි.

මේ හේතුවෙන් කොළඹ නුවර මාර්ගය එම ප්‍රදේශයෙන් වසා දැමීමට දිස්ත්‍රික් සම්බන්ධීකරණ කමිටුව තීරණය කර තිබේ.

එබැවින් කොළඹ නුවර මාර්ගයේ රථවාහන ධාවනය කරන පිරිස කෑගල්ල ප්‍රදේශයෙන් විකල්ප මාර්ග භාවිත කරන ලෙසත්, අත්‍යවශ්‍ය කරුණක් හැරුණු විට එම ප්‍රදේශය හරහා ගමන් කිරීමෙන් වළකින ලෙස ආපදා කළමනාකරණ මධ්‍යස්ථානය ජනතාවගෙන් ඉල්ලා සිටියි.

මේ අතර, නාවලපිටිය පැරණි දුම්රිය අංගනය පාරේ නිවසක් මතට ඊයේ (28දා) පස්කන්දක් කඩා වැටීමෙන් එකම පවුලේ තිදෙනකු මරුමුවට පත්වී තිබේ.

මෙලෙස ජීවිතක්ෂයට පත්ව තිබුණේ බිරිඳ, නැන්දම්මා සහ මාස තුනක බිලිඳෙක් බව නාවලපිටිය පොලිසිය පවසයි.

නාවලපිටිය ප්‍රදේශයට ඇදහැළුණු අධික වර්ෂාවත් සමග නිවසට පස් කන්ද කඩා වැටී තිබේ.

පසුව ප්‍රදේශවාසීන් හා නාවලපිටිය පොලිස් නිලධාරීන් එක්ව අනතුරට පත්වූවන් බේරා ගැනීමට විශාල උත්සාහයක් දැරුව ද අධික වර්ෂාව හේතුවෙන් එය ව්‍යර්ථ වී තිබිණි.

අයහපත් කාලගුණය හේතුවෙන් ඊයේ වනවිට නාවලපිටිය ප්‍රදේශයේ පුද්ගලයන් 5 දෙනකු ජීවිතක්ෂයට පත්වී පවුල් 50 කට ආසන්න පිරිසක් ආරක්ෂක කඳවුරු කරා යොමු කළ බව නාවලපිටිය ප්‍රාදේශීය ලේකම් රම්‍යා ජයසුන්දර මහත්මිය පැවැසුවාය.

දක්ෂිණ අධිවේගී මාර්ගයේ කඩුවෙල පිටවීමේ ස්ථානය ඊයේ (28දා) ජලයෙන් යටවී තිබිණි.

කඩවත දෙසින් පැමිණෙන රථවාහන මෙම තත්ත්වයට මුහුණ දී තිබූ අතර, මේ හේතුවෙන් රියැදුරන්ට විකල්ප මාර්ග භාවිතා කරන ලෙස ප්‍රවාහන, මහාමාර්ග සහ නාගරික සංවර්ධන අමාත්‍යාංශය පවසයි.

මහවැලි ගඟ පිටාර ගැලීමෙන් පොළොන්නරුව, මනම්පිටිය, ගල්ලෑල්ල ඇතුළු එම ප්‍රදේශ රැසක් ජලයෙන් යටවී තිබිණි. කදුරුවෙල නගරය සම්පූර්ණයෙන්ම ජලයෙන් යටවී තිබිණි.

මහවැලි ගඟ පිටාර ගැලීමෙන් ඓතිහාසික සෝමාවතිය පුදබිමට ගමන් ගන්නා මාර්ගය ද ඊයේ (28දා) තුන්වැනි දිනයටත් වසා දමා තිබිණි.

සෝමාවතිය සුංගාවිල මාර්ගය, ස්ථාන 2කින් ජලයෙන් යටවී තිබීම නිසා එම මාර්ගය ද වසා දැමීමට ඊයේ පොලිසිය තීරණය කළේය.

කලාවැව පිටාර ගැලීමේ වීඩියෝවක් ද සමාජ මාධ්‍ය තුළ සංසරණය වෙමින් පැවැතිණි.

ගංවතුර හේතුවෙන් පොළොන්නරුව මනම්පිටිය පාලම මත කොටුවී සිටි පුද්ගලයෝ 13 දෙනකු හිඟුරක්ගොඩ ගුවන් හමුදා කඳවුරට අයත් ගුවන් යානයකින් ඊයේ මුදාගනු ලැබූහ.

මහනුවර ගැටඹේ විහාර භූමිය ද වැසි ජලයෙන් සම්පූර්ණයෙන්ම ඊයේ යටවී තිබිණි.

මහනුවර නගරයේ විලියම් ගොපල්ලව මාර්ගය ද ජලයෙන් යටවී තිබිණි. අධික වැසි සමග ලග්ගල ප්‍රදේශයේ ඇල මාර්ගයට වැටුණු ත්‍රීරෝද රථයක්ද ප්‍රදේශවාසීන් විසින් බේරාගන්නා ලදී. අධික ජල පහර නිසා එය අසීරුවෙන් බේරාගෙන ඇත.

මැණික් ගගේ ජල මට්ටම ඉහළ යෑම නිසා කතරගම ප්‍රදේශයේ ස්ථාන කිහිපයක්ම ජලයෙන් යටවී තිබිණි.

දේවාල සියල්ලක්ම යටවී තිබිණි. මෙම ගංවතුර තත්ත්වය නිසා කතරගම වෙළෙඳුන් දැඩි අසරණ තත්ත්වයට පත්ව තිබිණි.

කැලණි ගඟේ ජල මට්ටම ඉහළ යෑම නිසා මල්වාන, කඩුවෙල, කොළොන්නාව, කැලනිමුල්ල ඇතුළු ප්‍රදේශ රැසක් ජලයෙන් යටවී තිබිණි.

ආපදාවට ලක්ව සිටි ජනතාව මුදාගැනීම සඳහා විශේෂ බෝට්ටු සේවාවක්ද යොදවා තිබිණි.

ගංවතුර තත්ත්වය හේතුවෙන් මල්වාන නගරයේ කඩ සාප්පු සියල්ල වසාදමා තිබිණි.

තඹුත්තේගම ලුණුඔය පිටාර ගැලීමෙන් පුද්ගලයෝ රැසක් පීඩාවට පත්ව සිටියහ.

ගම්පොළ

අධික වර්ෂාව හේතුවෙන් ගම්පොළ නගරය මුළුමනින්ම ජලයෙන් යටවී තිබිණි. ගම්පොළ බස් නැවතුම්පළ, ගම්පොළ දුම්රිය ස්ථානය යටවී තිබිණි. නිවාස ද යටවී පැවැතිණි.

අධික වැසි හේතුවෙන් රත්නපුර නගරය ද ඊයේ දහවල් වනවිට ජලයෙන් යටවෙමින් පැවැතිණි.

කුඩාඔය පිටාර ගැලීමෙන් තණමල්විල ඌව කුඩාඔය කොමාන්ඩෝ පුහුණු පාසලට පිවිසෙන මාර්ගය සම්පූර්ණයෙන්ම ජලයෙන් යටවී තිබිණි.

එම පුහුණු පාසලේ පුහුණුවට පැමිණ සිටි පිරිසක් ද මුදාගනු ලැබූහ.

@දිවයින