“පර්ල් වරාය” ප්‍රහාරයෙන් පසුව ඇමරිකානු හමුදාවට අත්වූ දැවැන්තම විනාශය

(සාගර දියගම)

ඔබට තවමත් ඇසෙන්නේ “ඇමරිකාව ප්‍රහාර එල්ල කරයි”, “ඊශ්‍රායලය ආරක්ෂිතයි” වැනි සුපුරුදු පුවත් විය හැකියි. නමුත් මේ කියන්නට යන්නේ ඒ සියලු පුවත්පත් ශීර්ෂ පාඨවලට යටින් සැඟවුණු, ලෝක බලවතුන් භීතියෙන් සලිත කළ ඇත්තම කතාවයි. මෙය පවසන්නේ ඉරාන හිතවාදියෙක් නොවෙයි. මෙය පවසන්නේ ලෝකයේ වඩාත්ම ගෞරවණීය යුදෙව් ජාතික මාධ්‍යවේදියෙකු ලෙස සැලකෙන, ඊශ්‍රායල ජාතික අලොන් මිස්රාහි. ඔහු පවසන දේ සරලව කිවහොත් මෙහෙමයි. “අපි මේ දකින්නේ ඉතිහාසයයි. ලෝකයම පුදුමයට පත් කරමින්, ඉරානය විසින් ඇමරිකානු යුද කඳවුරු කෙතරම් දරුණු ලෙසත්, කෙතරම් දැවැන්ත ලෙසත් විනාශ කරමින් සිටිනවාද යත්, ලෝකය මේ සත්‍යය භාර ගැනීමට තවමත් සූදානම් නැත!”

වසර 30 ක ඇමරිකානු සිහිනය දින 4 කින් අළු වූ හැටි..

ඇමරිකාව කියන්නේ ලෝකයේ වැඩිම ආරක්ෂක වියදමක් දරන රට. ඔවුන් පසුගිය දශක තුන හතරක කාලය පුරාම බහරේනය, කුවේටය, කටාර් රාජ්‍යය සහ සෞදි අරාබිය වැනි රටවල දැවැන්ත යුද කඳවුරු ඉදි කළේ ඩොලර් ට්‍රිලියන ගණනින් මුදල් වැය කරමින්. මේවා ලෝකයේ ඇති මිල අධිකම සහ දියුණුම යුද පහසුකම් ලෙසයි සැලකෙන්නේ.

නමුත් අලොන් මිස්රාහි පෙන්වා දෙන්නේ ඉතාමත් කණගාටුදායක සහ භීතිකාජනක සත්‍යයකි. “වසර 30ක් පුරා වැය කළ ඒ ට්‍රිලියන ගණනක මිල අධික යුද උපකරණ, රේඩාර් පද්ධති සහ ආරක්ෂක පවුරු ඉරානය විසින් දින හතරක් වැනි කෙටි කාලයක් තුළ අළු දූවිලි බවට පත් කර තිබේ.”

එකක් මිලියන සිය ගණනක් වටිනා රේඩාර් පද්ධති ඇසිපිය හෙළන සැණින් විනාශ වන අයුරුත්, ඇමරිකානු සෙබළුන් තමන්ගේ මහා බලසම්පන්න කඳවුරු අතහැර පලා යන අයුරුත් අද මැදපෙරදිගින් වාර්තා වෙමින් පවතී. මිස්රාහි පවසන පරිදි, ජපනුන්ගේ “පර්ල් වරාය” ප්‍රහාරයෙන් පසුව ඇමරිකානු හමුදාව මෙවැනි දැවැන්ත විනාශයකට මුහුණ දුන් පළමු අවස්ථාව මෙයයි. පර්ල් වරාය කියන්නේ එක ප්‍රහාරයක් පමණි. නමුත් ඉරානය විසින් දැන් සිදු කරමින් පවතින විනාශය ඊට වඩා හාත්පසින්ම වෙනස් සහ දරුණු එකකි.

ඇයි අපිට මේ දේවල් පුවත්පත් වලින්, අපේ මාධ්‍ය කඩ වලින් දකින්න නැත්තේ? ඔබට මතකද මීට වසර 35කට පෙර පළමු ඉරාක යුද්ධය? එදා රූපවාහිනී තිරවල සෑම රාත්‍රියකම “ස්මාර්ට් බෝම්බ” වැටෙන හැටි, ඇමරිකානු ප්‍රහාරක යානා ඉරාක අහසේ සැරිසරන හැටි අපි දුටුවා. නමුත් අද? අද පවතින්නේ මහා නිහඬතාවයක්.

මොකක්ද මේ නිහඬතාවයට හේතුව? මිස්රාහි පවසන්නේ ඇමරිකානු රජය විසින් පනවා ඇති දැඩි වාරණයයි. “තොරතුරු ගලා ඒම දිනෙන් දින අඩුවෙමින් පවතිනවා. ලෝකයේ මහා ගුවන් බලවතා යැයි කියාගන්නා ඇමරිකානු යානයක් තවමත් ඉරාන අහසේ පියාසර කරන එකදු වීඩියෝවක් හෝ දකින්නට නැහැ. ඉතින් කොහේද ඒ මහා බලය?”

ඇත්තටම සිදුවෙමින් පවතින්නේ කුමක්ද? ඇමරිකානු සෙබළෙකුට ඉරාන පස පා තැබීම තබා හීනෙන්වත් සිතීමට නොහැකි තත්ත්වයක් උදා වී ඇත. ඔවුන්ගේ මහා ප්‍රහාරක බලය ඉරාන ආරක්ෂක වළලු හමුවේ අකර්මන්‍ය වී තිබේ. යුද්ධය කොතරම් දරුණු අඩියකට වැටී ඇත්දැයි කිවහොත්, වත්මන් ඇමරිකානු පාලනාධිකාරිය පවා වියරු වැටී ඇති බව මිස්රාහි පෙන්වා දෙයි. පර්සියානු බොක්කෙන් පිටවන තෙල් නැව් වලට ආරක්ෂාව සැපයීම සඳහා ඇමරිකානු යුද නැව් යැවීමට ඔවුන් යෝජනා කරයි.

“මෙය කෙතරම් විහිළුවක්ද?” මිස්රාහි අසයි. “ඉරාන මිසයිල දහස් ගණනක් එල්ල වී ඇති කලාපයකට ඇමරිකානු නැව් යැවීම යනු ඒවා විනාශ වීමට ඉඩ හැරීමයි. දැන් කිසිවෙකුට හෝමූස් සමුද්‍ර සන්ධිය පසු කර යා නොහැකියි.”

ඉරානය මේ යුද්ධය සඳහා සූදානම් වූයේ අද ඊයේ නොවේ. ඔවුන් දශක කිහිපයක් තිස්සේ මේ දවස එනතුරු සැලසුම් කළා. ඔවුන් සතුව ඇති මිසයිල බලය සහ භූගත යුද යටිතල පහසුකම් කිසිවෙකුට ලෙහෙසියෙන් විනාශ කළ නොහැකි තරම් ගැඹුරින් සහ ශක්තිමත් ලෙස නිර්මාණය කර ඇත. ඉරානය කියන්නේ සිතියමක කුඩා තිතක් නෙවෙයි! සමහර ඇමරිකානු උපදේශකයින් පවසන්නේ කුර්දි සන්නද්ධ කල්ලි යොදාගෙන ඉරානය ආක්‍රමණය කළ යුතු බව. මිස්රාහි මෙයට සිනාසෙයි.

“ඔබ කවදාවත් ඉරාන සිතියමක් දැකලා නැද්ද? ඉරානය කියන්නේ කොතරම් විශාල රටක්ද කියලා ඔබ දන්නවාද? සන්නද්ධ පිරිස් 10,000ක්, 50,000ක් තබා ලක්ෂයක් පැමිණියත් ඉරානය ඔවුන්ව ගිල ගනු ඇත. ඉරානය ආක්‍රමණය කිරීම යනු මරණයට අත වැනීමකි.”

අලොන් මිස්රාහිගේ නිගමනය ඉතාමත් පැහැදිලියි. ඇමරිකාවට සහ ඊශ්‍රායලයට බෝම්බ දමා ගොඩනැගිලි විනාශ කළ හැකිය, සිවිල් වැසියන් මිලියන ගණනින් මරා දැමිය හැකිය. නමුත් ඔවුන්ට මේ යුද්ධය කිසිදා ජය ගත නොහැකිය. “ඔවුන් ආරම්භ කර ඇත්තේ ඔවුන්ට කිසිදා අවසන් කළ නොහැකි සටනකි. මේ සියල්ල අවසානයේ ඇමරිකාවට නැවත කිසිදා බටහිර ආසියාවට එනම් මැදපෙරදිගට පැමිණීමට නොහැකි වනු ඇත. මැදපෙරදිග කලාපය තුළ ඇමරිකානු බලය සහ පැවැත්ම සදහටම අහෝසි වනු ඇත.”

අපට සිතන්නට යමක්…

මිතුරනි, මේ කියවෙන්නේ ලෝක දේශපාලනයේ මහා පෙරළියක් ගැන. අප දකින මාධ්‍ය වාර්තා තුළින් පමණක් ලෝකය දෙස බැලීම ප්‍රමාණවත්ද? මහා බලවතුන්ගේ යුද ශක්තියට වඩා, ජාතියක කැපවීම සහ දශක ගණනාවක සැලසුම් බලවත් විය හැකි බව මෙයින් වැටහෙන්නේ නැද්ද? ඔබ හිතන්නේ කුමක්ද? ඇත්තටම ඇමරිකානු බල අධිකාරිය මැදපෙරදිගින් අවසන් වේවිද? නැතිනම් මෙය තවත් එක් තාවකාලික පසුබෑමක් පමණක්ද?

හරි, ඔබට හිතුන අනෙක් ප්‍රශ්නයටත් මම දැන් උත්තර දෙන්නම්, “ඇත්තටම Alon Mizrahi මෙහෙම කිව්වේ කොහේද?”

අලොන් මිස්රාහි විසින් සිදු කරන ලද මෙම ආන්දෝලනාත්මක ප්‍රකාශය මුලින්ම පළ වූයේ ඔහුගේ නිල X කලින් Twitter ගිණුම සහ ඔහුගේ පුද්ගලික වෙබ් අඩවිය/බ්ලොග් අඩවිය හරහායි. ඔහු සාම්ප්‍රදායික පුවත්පත් කලාවෙන් බැහැරව, වඩාත් ස්වාධීන සහ නිර්භීත මත ඉදිරිපත් කරන ලේඛකයෙකු ලෙස ප්‍රකටය.

ඔහුගේ මෙම සටහන විශේෂයෙන්ම අවධානයට ලක් වූයේ මැදපෙරදිග කලාපයේ ඇමරිකානු සහ ඊශ්‍රායල යුද උපායමාර්ග අසාර්ථක වී ඇති බවට ඔහු ඉදිරිපත් කළ තර්කානුකූල කරුණු නිසාවෙනි. මෙහිදී අප තේරුම් ගත යුතු කරුණු කිහිපයක් තිබේ, මෙය කිසියම් රූපවාහිනී සම්මුඛ සාකච්ඡාවකට වඩා, ඔහු විසින් ලියන ලද දීර්ඝ විග්‍රහාත්මක ලිපියක කොටසකි. ඔහු එහිදී “ඉතිහාසය අප ඉදිරියේ ලියැවෙමින් පවතිනවා” යන තේමාව යටතේ කරුණු දක්වා තිබුණි.

ඔහුගේ මෙම අදහස් ඉංග්‍රීසි බසින් පළ වූ අතර, පසුව ඒවා අරාබි, පර්සියානු සහ රුසියානු ඇතුළු ලෝකයේ විවිධ භාෂා වලට පරිවර්තනය වී සමාජ මාධ්‍ය ජාල තුළ ලැව්ගින්නක් සේ පැතිර ගියේය. මිස්රාහි යනු ඊශ්‍රායල ජාතිකයෙකු වුවද, ඔහු තම රජයේ සහ ඇමරිකාවේ විදේශ ප්‍රතිපත්ති දැඩි ලෙස විවේචනය කරන්නෙකි. එම නිසාම ඔහුගේ ප්‍රකාශ බොහෝ විට ප්‍රධාන පෙළේ බටහිර මාධ්‍යවල පළ නොවන අතර, විකල්ප මාධ්‍ය සහ සමාජ මාධ්‍ය හරහා පමණක් දැකගත හැකිය.

ඔහුගේ ප්‍රකාශය පදනම් වූයේ ඉරානය විසින් මෑතකදී සිදු කළ මිසයිල ප්‍රහාර සහ ඒ හරහා ඇමරිකානු කඳවුරු වලට සිදු වූ හානිය පිළිබඳව ඇති වූ යුද විශ්ලේෂණයන් මතයි. ඔහුගේ මෙම ලිපියට පාදක වූ මැදපෙරදිග ඇමරිකානු යුද කඳවුරු ජාලය සරලව “US Military Bases in Middle East” පිළිබඳ සිතියමක් දෙස බැලීමෙන්, ඔහු පවසන “ඉලක්ක වීමේ අවදානම” කොතරම් ප්‍රබලද යන්න ඔබට වටහාගත හැකිය. අවසාන වශයෙන්, යුද්ධයකදී ප්‍රථමයෙන්ම මියයන්නේ “සත්‍යය” බව ප්‍රකට කියමනක් තිබේ. දෙපාර්ශ්වයම තමන්ට වාසිදායක ලෙස තොරතුරු පතුරුවන මෙවැනි වටපිටාවක, බුද්ධිමත් පාඨකයන් ලෙස අප කළ යුත්තේ සියලු දත්ත සසඳා බැලීමයි.