මත්ද්රව්ය රැගෙන ආ චීවරධාරීන් 23දෙනා නැවතත් රක්ෂිත බන්ධනාගාරයට
තායිලන්තයේ සිට කුෂ් හා හෑෂ් මත්ද්රව්ය මෙරටට රැගෙන ඒමේ සිද්ධිය සම්බන්ධයෙන් අත්අඩංගුවට ගනු ලැබූ චීවරධාරීන් විසි තුන්දෙනා එළැඹෙන මැයි 26 වැනිදා දක්වා රක්ෂිත බන්ධනාගාරගත කරන ලෙස මීගමුව අතිරේක මහේස්ත්රාත් සුබානි අබේසේකර මහත්මිය ඊයේ (12) නියෝග කළාය.
තායිලන්තයේ සංචාරයක නිරත වූ චීවරධාරීන් විසිදෙදෙනෙකු අප්රේල් 25 වැනිදා මෙරටට පැමිණි අවස්ථාවේ කටුනායක ගුවන්තොටුපොළේදී අත්අඩංගුවට පත්වුණේ ඔවුන් රැගෙන ආ ගමන් මලුවල තිබී ‘කුෂ්’ සහ ‘හෑෂ්’ මත්ද්රව්ය කිලෝග්රෑම් 112ක් හමුවීමත් සමඟය.
ඔවුන්ගෙන් සිදුකළ ප්රශ්න කිරීම්වලදී අනාවරණය වී තිබුණේ අමිතානන්ද නම් චීවරධාරියකු විසින් මෙම නීතිවිරෝධි ක්රියාව මෙහෙයවා ඇති බවයි.
ඒ අනුව අමිතානන්ද නම් චීවරධාරියාද ගම්පහ මීගහවත්ත ප්රදේශයේ විහාරස්ථානයක සැඟව සිටියදී අත්අඩංගුවට ගනු ලැබීය.
එමෙන්ම මෙම පිරිස මෙහෙය වූ බව කියන මින්පෙර අවස්ථාවලදී ද මත්ද්රව්ය මෙරටට ගෙන ඒම සඳහා ඊට ආධාර අනුබල දුන් මහමුද් මොහොමඩ් නමැති පුද්ගලයකු කොළඹ ප්රදේශයේදී ඉකුත් 8 වැනිදා අත්අඩංගුවට ගෙන තිබේ. එම පුද්ගලයා මීගමුව මහේස්ත්රාත් අධිකරණයට ඉකුත් 9දා ඉදිරිපත් කළ අතර 14 වැනිදා දක්වා තවදුරටත් රඳවා ප්රශ්න කරන ලෙසද මීගමුව අතිරේක මහේස්ත්රාත්වරිය නියෝග කළාය.
සැකකරුවන් පිරිස දින 14ක කාලයක් රක්ෂිත බන්ධනාගාරගතව සිටි අතර බන්ධනාගාර නිලධාරීන් විසින් මෙහි ප්රධාන සැකකාර අමිතානන්ද නම් චීවරධාරියා සහ සෙසු චීවරධාරීන් විසිදෙදෙනා ඊයේ (12) පෙරවරුවේ මීගමුව මහේස්ත්රාත් අධිකරණයට ඉදිරිපත් කරනු ලැබීය.
අනතුරුව මීගමුව අතිරේක මහේස්ත්රාත් සුබානි අබේසේකර මහත්මිය හමුවේ නීති කෘත්යය කැඳවූ අවස්ථාවේ පොලිස් මත්ද්රව්ය කාර්යාංශයේ නිලධාරීන් පැමිණ සිටියේ නැත. එහිදී එම නිලධාරීන් පැමිණෙනතුරු එම නීති කෘත්යය ආරම්භ කිරීම හතර වාරයක් කල් තැබීය. එහිදී වෙනත් නඩු සඳහා පැමිණ සිටි මත්ද්රව්ය කාර්යාංශයේ නිලධාරීන්ට කියා සිටියේ මෙම නඩු සඳහා පැමිණෙන නිලධාරීන් ප්රමාද වීමට හේතුව සොයා බලන ලෙසයි. එහිදී එම නිලධාරීන් සඳහන් කළේ අදාළ නිලධාරීන් තවමත් අධිකරණයට පැමිණෙමින් සිටින බවයි. 11.30 වන තුරු අදාළ නිලධාරීන් අධිකරණයට නොපැමිණි නිසා නඩු විභාගය ආරම්භ කිරීමට මහේස්ත්රාත්වරිය නියෝග කළාය. නඩු 22ක් ඇති බැවින් පළමු නඩුව ආරම්භ කළ අවස්ථාවේ දී මහේස්ත්රාත්වරිය නියෝග කළේ පොලිස් මත්ද්රව්ය කාර්යාංශයේ ස්ථානාධිපති පොලිස් පරීක්ෂක සිල්වා මහතා, උප පොලිස් පරීක්ෂක රාජපක්ෂ මහතා, කාන්තා උප පොලිස් පරීක්ෂක ලක්මාලි මහත්මිය යන අය 26 වැනිදා අධිකරණයට පැමිණ විවෘත අධිකරණයේදී නොපැමිණීමට හේතුව දැක්විය යුතු බවයි.
කෙසේ වෙතත් එම නියෝග ලබා දුන් අවස්ථාවේ කාන්තා උප පොලිස් පරීක්ෂක ලක්මාලි මහත්මිය අධිකරණයට පැමිණියාය. එහිදී මහේස්ත්රාත්වරිය දැඩි ලෙස දෝෂාරෝපණය කරමින් විමසා සිටියේ දැන් වේලාව කීයද? යැයි කියාය. ඊට පිළිතුරු දෙමින් ලක්මාලි මහත්මිය සඳහන් කළේ 11.45 යැයි කියාය. එහිදී මහේස්ත්රාත්වරිය විමසා සිටියේ අධිකරණ කටයුතු 9.00ට පටන් ගන්නා බැවින් මෙසේ ප්රමාද වීම අධිකරණය හෑල්ලුවට ලක් කිරීමක් බවයි, “මේක සාමාන්ය නඩුවක් නෙවෙයි, ඔයලා එනකං අධිකරණයට බලන් ඉන්න බෑ. මේ නඩුව වෙනස් සංවේදී නඩුවක්. මේ නඩුවේ විත්තිකරුවන් දෙස බලන්න. ඒ සාමාන්ය අය නෙවෙයි, භික්ෂූන් වහන්සේලා. මං සියලුම නිලධාරීන්ට තරයේ අවවාද කරනවා, සියලුම දෙනා ඉදිරි දිනයේ අධිකරණයට නොපැමිණි හේතු දැක්විය යුතුයි මේ සම්බන්ධයෙන්” යැයි මහේස්ත්රාත්වරිය වැඩිදුරටත් සඳහන් කළාය.
එහිදී අධිකරණයට කාන්තා උප පොලිස් පරීක්ෂක ලක්මාලි මහත්මිය වැඩිදුර විමර්ශන වාර්තාවක් ඉදිරිපත් කරමින් කරුණු ඉදිරිපත් කළ අතර, සැකකාර ස්වාමින් වහන්සේ වෙනුවෙන් පෙනී සිටි නීතිඥවරුද කරුණු ඉදිරිපත් කළහ.
ඒ අනුව ඉදිරිපත් වූ කරුණු සලකා බැලීමෙන් අනතුරුව මීගමුව අතිරේක මහේස්ත්රාත් සුබානි අබේසේකර මහත්මිය එළැඹෙන මැයි මස 26 වැනි දින දක්වා රක්ෂිත බන්ධනාගාරගත කරන ලෙස නියෝග කළාය. එමෙන්ම අඹගස්මුල්ලේ පුණ්යරතනට සහ බෙල්පිටියේ ධම්මරක්ඛිත යන හිමිවරුන් දෙදෙනාට ගුවන් ගමන් තහනමක් පනවනු ලැබීය. දැනට රැඳවුම් නියෝග ලබා සිටින මහමුද් මොහොමඩ් නමැති විත්තිකරුද 14 වැනිදා මීගමුව මහේස්ත්රාත් අධිකරණයට ඉදිරිපත් කරන ලෙසත්, ලබන 26 වැනිදා චන්ද්රකුමාර නමැත්තා මීගමුව මහේස්ත්රාත් අධිකරණයට ඉදිරිපත් කරන ලෙසත් බන්ධනාගාර අධිකාරිවරයාට එහිදී නියෝගයක් නිකුත් කෙරිණි.
@දිනමිණ
Discover more from cmn.lk
Subscribe to get the latest posts sent to your email.
