ප්‍රංශයේ ජනතා කෝපය ප්‍රචණ්ඩ වෙයි

ජීවන වියදම ඉහළ යාම, ඉන්ධන මිල වැඩිවීම සහ මහජන සේවා පිරිහීම සම්බන්ධයෙන් ඇති වූ ජනතාවගේ කෝපය හේතුවෙන් ප්‍රංශය පුරා නගරවල දරුණු කෝලාහල සහ පුළුල් විරෝධතා හටගත්තේය. දශක කිහිපයකට පසු රට තුළ වාර්තා වූ නරකම ප්‍රචණ්ඩකාරී තත්ත්වයන් අතරට මේවා එක්විය.

ලිමෝජස් (Limoges), මාර්සේයි (Marseille) සහ ලියොන් (Lyon) වැනි නගරවල නගර ශාලා සහ සංචාරක කාර්යාල ඇතුළු රාජ්‍ය ගොඩනැගිලි ඉලක්ක කර ගනිමින් විනාශ කිරීම් සහ ගිනිතැබීම් සිදු කෙරිණි. පැරිස් නගරයේදී විරෝධතාකරුවන් වෙළඳසැල් බිඳ දමා, සුඛෝපභෝගී බුටික් වෙළඳසැල්, බැංකු සහ ජංගම දුරකථන සාප්පුවක් කොල්ලකා, වාහන රැසකට ගිනි තැබීය.

අගමැති සෙබස්තියන් ලෙකෝනු (Sebastien Lecornu) ප්‍රචණ්ඩත්වය හෙළා දුටු අතර, මීළඟ ජනාධිපතිවරණයට පෙර අස්ථාවරත්වයක් ඇති කිරීමට උත්සාහ කරන “අන්ත වාමවාදීන්” සහ අපරාධකරුවන් මෙයට වගකිව යුතු බව ප්‍රකාශ කළේය. ජනාධිපති එමානුවෙල් මැක්‍රොන් ද රටේ ආයතන බිඳ දැමීමට උත්සාහ කරන අයට එරෙහිව සියලු දෙනා එක්වන ලෙස ඉල්ම සිටියේය. රට පුරා පුද්ගලයන් 1,200 ක් පමණ අත්අඩංගුවට ගෙන ඇත.

මෙම ගැටුම් හේතුවෙන් පොලිස් නිලධාරීන් 150 කට අධික පිරිසක් තුවාල ලැබූහ. එසේම, පොලිස් ප්‍රහාරක අත්බෝම්බයක් (stun grenade) අතට ගැනීමට උත්සාහ කිරීමේදී යෞවනයෙකුගේ අතක් ගැලවී යාම ඇතුළු බරපතල තුවාල සිදුවීම හේතුවෙන් පොලිස් උපක්‍රම දැඩි දෝෂදර්ශනයට ලක් විය.

ප්‍රංශයේ ඇති වූ මෙම නොසන්සුන්තාවයට සමානව, ජීවන වියදම් ඉහළ යාම හේතුවෙන් බෙල්ජියම, පෘතුගාලය සහ ඉතාලිය යන රටවලද කුඩා පරිමාණයේ විරෝධතා හටගත් අතර, ඇල්බේනියාවේ ජනතාව රජයේ දූෂණයට එරෙහිව වීදි බැස්සහ.

@දිනමිණ