අනෝජන් නිදහස්
(මහින්ද අලුත්ගෙදර)
මරණ දඬුවම නියමව සිටි ශ්‍රී ලාංකික තරුණයකු වන අනෝජන් සිවරාසා මහතා, සවුදි අරාබියානු ශ්‍රේෂ්ඨාධිකරණ තීන්දුවකින් පසුව නිදොස් කොට නිදහස් කිරීමට එරට ප්‍රාථමික අධිකරණයක් තීරණය කර තිබේ.
ජනාධිපති අනුර කුමාර දිසානායක මහතාගේ ඍජු මැදිහත්වීම සහ ශ්‍රී ලංකා රජය ක්‍රියාත්මක කළ සාර්ථක රාජ්‍යතාන්ත්‍රික මෙහෙයුම හේතුවෙන් එම තරුණයා නිදහස් කර ගැනීමට හැකි වූ බව විදේශ කටයුතු, විදේශ රැකියා සහ සංචාරක ඇමැති විජිත හේරත් මහතා ප්‍රකාශ කරයි.
මුහම්මද් නබිතුමාට අපහාස කිරීමක් ලෙස සැලකෙන ෆේස්බුක් සටහනක් හේතුවෙන් සවුදි අරාබි අභියාචනාධිකරණය විසින් මෙම ශ්‍රී ලාංකික තරුණයාට මරණ දඬුවම නියම කරන ලද අතර ඔහු නිදහස් කරගැනීම වෙනුවෙන් ශ්‍රී ලංකා විදේශ කටයුතු අමාත්‍යාංශය සහ සවුදි අරාබියානු විදේශ කටයුතු අමාත්‍යාංශය මෙන්ම ශ්‍රී ලංකාවේ සවුදි අරාබියානු තානාපති කාර්යාලය සහ සවුදි අරාබියාවේ ශ්‍රී ලංකා තානාපති කාර්යාලය සෘජුවම දායක වූ බවද ඒ මහතා පෙන්වාදෙයි.
නිවැරදි රාජ්‍යතාන්ත්‍රික මැදිහත්වීම හේතුවෙන් අනෝජන් සිවරාසා නමැති ශ්‍රී ලාංකික තරුණයා නිදහස්කර ගැනීමට හැකිව තිබෙන බව පෙන්වාදුන් ඇමැතිවරයා, ඉදිරි දින කිහිපය ඇතුළත ශ්‍රී ලංකාවට ගෙන්වා ගන්නා බවද ඒ වෙනුවෙන් ශ්‍රී ලංකා රජය සියලු ක්‍රියාමාර්ග ගන්නා බවද සඳහන් කරයි.
ශ්‍රී ලංකා ජනාධිපතිවරයාට, සෞදි අරාබියානු රජු සහ එරට රජයට, ශ්‍රී ලංකාවේ සෞදි අරාබියානු තානාපතිවරයා ඇතුළු කාර්ය මණ්ඩලයට මෙන්ම අනෝජන් සිවරාසා තරුණයා නිදහස් කර ගැනීම වෙනුවෙන් සහය ලබාදුන් විදේශ කටයුතු සහ විදේශ රැකියා නියෝජ්‍ය ඇමැති අරුන් හේමචන්ද්‍ර, පාර්ලිමේන්තු මන්ත්‍රී ෆයිසර් මුස්තාෆා, අතිරේක සොලිසිටර් ජනරාල් සහ ජනාධිපති නීතිඥ අසාද් නවාවි, ජනාධිපති නීතිඥ උපුල් කුමාරප්පෙරුම සහ නීතිඥ හෆීල් ෆාරිස් මහත්වරුන් ඇතුළු සැමට තම ප්‍රණාමය පිරිනමන බවද ඒ මහතා සඳහන් කළේය.
ඒ අනුව ශ්‍රී ලංකා විදේශ කටයුතු අමාත්‍යාංශය, සෞදි අරාබියාවේ ශ්‍රී ලංකා තානාපති කාර්යාලය සහ ශ්‍රී ලංකාවේ සෞදි අරාබියානු තානාපති කාර්යාලය ඒකාබද්ධව මේ සඳහා ක්‍රියාමාර්ග ගත් අතර පාර්ශ්ව රැසක ඒකාබද්ධ ක්‍රියාමාර්ගයක ප්‍රතිඵලයක් ලෙස මෙම තරුණයා නිදහස්කර ගැනීමට හැකිව තිබෙන බව විදේශ කටයුතු අමාත්‍යාංශය පවසයි.
Òඅනෝජන් සිවරාසා මහතාගේ පවුලේ සාමාජිකයන් ජනාධිපතිවරයා හමුවී මේ සම්බන්ධයෙන් සාකච්ඡා කළා. ඒ වගේම සෞදි අරාබියේ ශ්‍රී ලංකා තානාපතිවරයා සහ තානාපති කාර්යාල නිලධාරීන් එරට බලධාරීන් සමඟ සාකච්ඡා කළා. ඊට අමතරව ශ්‍රී ලංකා නීතීඥ කණ්ඩායමක් සෞදි අරාබියානු නීතීඥ කණ්ඩායම සමඟ එක්ව මේ සම්බන්ධයෙන් කටයුතු කළා.
මෙම නඩුවට අදාළව නීතිමය වියදම් රජය මඟින් දැරීමට තීරණය කළා. ඔහුගේ පවුලේ සාමාජිකයන් මීට පෙර දැරූ වියදම් ප්‍රතිපූර්ණය කිරීමට ද රජය තීරණය කර තිබෙනවා. එරට අධිකරණ ක්‍රියාදාමයට අපගේ ගෞරවය පිරිනමනවා. අපේ තානාපතිවරයාට සහ තානාපති කාර්යාල නිලධාරීන්ටත් විදේශ ලේකම් අරුණි රණරාජා මහත්මිය ප්‍රමුඛ සියලු නිලධාරීන්ටත් ශ්‍රී ලංකා විදේශ සේවා නියුක්ති කාර්යාංශයට, නීතිපති දෙපාර්තමේන්තුවටත් අපේ ගෞරවය පිරිනමනවාÓ යැයි විජිත හේරත් මහතා වැඩිදුරටත් පැවසීය.
මුහම්මද් නබිතුමාට අපහාස කිරීමක් ලෙස සැලකෙන ෆේස්බුක් සටහනක් හේතුවෙන් සෞදි අරාබි අභියාචනාධිකරණය විසින් අනෝජන් සිවරාසා නමැති ශ්‍රී ලංකික තරුණයාට මරණ දඬුවම නියම කරන ලද අතර අභියාචනාධිකරණ තීන්දුවට පෙර වසර පහක සිර දඬුවමක් සහ සෞදි රියාල් මිලියන 3ක දඩ මුදලක් පනවා තිබුණි. කෙසේ නමුත්, රජයේ නීතිපතිවරයා (public prosecutor) විසින් ගොනු කරන ලද අභියාචනයක් මත එම තීන්දුව අභියාචනාධිකරණය විසින් වෙනස් කර තිබෙන අතර අදාළ චෝදනාව ඉස්ලාමීය නීතිය යටතේ දෙවියන් වහන්සේට එරෙහිව කරන ලදැයි සැලකෙන ‘හද්‘ (Hadd) වර්ගයේ වරදක් ලෙස අධිකරණය විසින් වර්ගීකරණය කෙරිණි.
කල්මුණේ ප්‍රදේශයේ පදිංචිකරුවකු වූ අනෝජන් සෞදි අරාබියේ රැකියාවක් බලා පිටත්ව ගොස් ඇත්තේ, 2025 සැප්තැම්බර් 4 වැනිදා වන අතර පසුගිය ජූලි 27 වැනිදා මුහුණුපොත ඔස්සේ ඔහු පළ සටහනකින් ආගමික අපහාසයක් සිදුව ඇති බවට චෝදනා එල්ලවිය.
ඒ අනුව ඔහු සෞදි අරාබියේදී එරට පොලීසිය විසින් අත්අඩංගුවට ගෙන තිබූ අතර පසුව අධිකරණය හමුවට ඉදිරිපත් කර තිබුණි. අනෝජන් පළමුව අල්-අහ්සා අපරාධ අධිකරණය හමුවට ඉදිරිපත් කර තිබූ අතර එහිදී ඔහුට වසර පහක සිර දඬුවමක් සහ සෞදි රියාල් මිලියන තුනක දඩයක් නියම කර තිබිණි. මුල් තීන්දුවට එරෙහිව අභියාචනයක් ඉදිරිපත් කිරීමෙන් අනතුරුව එම දඬුවම මරණ දඬුවමක් බවට සංශෝධනය කළ බව වාර්තා විය. ඒ අනුව ඔහු සෞදි අරාබියේ දම්මාම් මධ්‍යම බන්ධනාගාරයේ රඳවා තැබීමට එරට බන්ධනාගාර නිලධාරීහු පියවර ගත්හ. මෙවැනි පසුබිමක සෞදි අභියාචනාධිකරණය මඟින් අනෝජන් සිවරාසා වෙත පනවන ලද මරණ දඬුවමට එරෙහිව සෞදි අරාබියේ ශ්‍රේෂ්ඨාධිකරණය හමුවේ අභියාචනයක් ගොනු කෙරිණි.
කෙසේ වුවද මෙම තීන්දුවෙන් අනතුරුව, සෞදි ශ්‍රේෂ්ඨාධිකරණය වෙත අභියාචනයක් සකස් කිරීමට සහය වීම සඳහා ශ්‍රී ලාංකික නීතිඥ කණ්ඩායමක් සෞදි අරාබිය වෙත ගමන් කළ අතර මෙම කණ්ඩායම සිවරාසාගේ නඩුව මෙහෙයවන නීතිඥවරුන් සමඟ සාකච්ඡා වට කිහිපයක් පැවැත්වීය. නීතිමය කරුණු ඉදිරිපත් කිරීම් (legal submissions) අවසන් කොට සෞදි ශ්‍රේෂ්ඨාධිකරණය එරට ඉහළම අධිකරණ ආයතනය වන බැවින් පහළ අධිකරණවල තීන්දු ප්‍රධාන වශයෙන් නීතිමය සහ ක්‍රියා පටිපාටිමය පදනම් මත සමාලෝචනය කිරීම සඳහා අභියාචනයක් ඉදිරිපත් කෙරිණි.
සෞදි අරාබිය බලා පිටත්ව ගිය ශ්‍රී ලාංකික නීතීඥ කණ්ඩායම සහ සෞදි අරාබියානු නීතිඥ කණ්ඩායම් දෙකක් අතර පැවැති දීර්ඝ සාකච්ඡා වට කිහිපයකින් අනතුරුව මෙම අභියාචනය ඉදිරිපත් කෙරිණි. මෙම ශ්‍රී ලාංකික නීති කණ්ඩායමට අතිරේක සොලිසිටර් ජනරාල් සහ ජනාධිපති නීතිඥ අසාද් නවාවි, ජනාධිපති නීතිඥ ෆයිසර් මුස්තාපා, ජනාධිපති නීතිඥ උපුල් කුමාරප්පෙරුම සහ නීතිඥ හෆීල් ෆාරිස් යන මහත්වරු ඇතුළත් වූහ.
සෞදි අරාබියේ ශ්‍රී ලංකා තානාපති අමීර් අජ්වාඩ්, ජෙඩාහි ශ්‍රී ලංකා කොන්සල් ජනරාල් විනිසුරු මොහොමඩ් ලෆාර් සහ සිල්මි රියාස්දීන් යන මහත්වරු ද මෙම ක්‍රියාවලියට සහභාගි වූහ. සිවරාසාගේ නඩුවට අදාළ කටයුතු කෙරෙමින් පැවැති අතරතුර තානාපති අමීර් අජ්වාඩ් මහතා බන්ධනාගාරයට ගොස් අනෝජන් සිවරාසාගේ සුවදුක් විමසීය. කෙසේ වුවද ශ්‍රී ලංකා රජයේ සහ පාර්ශ්ව රැසක ඉල්ලීම සලකා බැලූ සෞදි අරාබියානු ශ්‍රේෂ්ඨාධිකරණය අනෝජන් සිවරාසාට පනවා තිබූ මරණ දඬුවම අත්හිටුවීමට පියවර ගත් අතර පසුව එම තරුණයා නිදොස් කොට නිදහස් කිරීමට එරට මහාධිකරණය තීරණය කර තිබේ.
@දිනමිණ
Discover more from cmn.lk
Subscribe to get the latest posts sent to your email.
