කළුකුමාර දිෂ්ටිය එලවන්න දැරිවියකට අතවර කරලා – පූසාරි අත්අඩංගුවට
කළුකුමාර දිෂ්ටිය වැසී ඇති බව කියමින් යන්තරයක් දැමීමට ශාන්තිකර්මයක් කරන මුවාවෙන් ලුණුගල හොප්ටන් ප්‍රදේශයේ 14 හැවිරිදි බාලවයස්කාර පාසල් දැරියක දූෂණය කරමින් දැරිය සති පහක ගැබිනියක් කළැයි සැකපිට ලුණුගල ප්‍රදේශයේ පත්තිනි දේවාලයක පූසාරියකු ඊයේ (12) අත්අඩංගුවට ගත් බව ලුණුගල පොලිසිය පවසයි.
නමුණුකුල සී.වී. දෙවන කොටසේ පදිංචි, ලුණුගල හොප්ටන් ප්‍රදේශයේ පත්තිනි දේවාලයක පූසාරියකු ලෙස කටයුතු කරන 30 හැවිරිදි අවිවාහක පූසාරියකු මෙසේ අත්අඩංගුවට ගනු ලැබිණැයි පොලිසිය පවසයි.
පූසාරියා අතින් දූෂණයට ලක්වූ බව කියන ලුණුගල හොප්ටන් පරණ ස්ටෝරුව බී කොටසේ පදිංචි ලුණුගල ප්‍රදේශයේ පාසලක 8 වසරේ ඉගෙනුම ලබන 14 හැවිරිදි බාලවයස්කාර පාසල් දැරිය බදුල්ල ශික්ෂණ රෝහලට ඇතුළත් කළ බව ද පොලිසිය පවසයි.
මෙම දැරියගේ මව නොමැති බවත් දැරිය ඇයගේ වැඩිමහල් 16 හැවිරිදි නිවුන් සහෝදරයන් දෙදෙනා, පියා සහ මිත්තණිය (පියාගේ මව) සමඟ ලුණුගල හොප්ටන් 19 කනුව පරණ ස්ටෝරුව බී කොටසේ වතු නි‍ෙවසක පදිංචිව සිටින බවත් පොලිසිය පවසයි.
දැරිය මෑතක පටන් නොරිස්සුම් ගතියකින් තරහා යමින් විවිධ දේ දොඩවමින් කෑගසමින් හැසිරීමට පටන් ගෙන ඇති අතර, ඒ සම්බන්ධයෙන් දැරියගේ මිත්තණිය ලුණුගල හොප්ටන් පත්තිනි දේවාලයේ පූසාරියා හමුවී ඒ බව පවසා ඇති බව පොලිසිය සඳහන් කළේය.
මෙම දැරියට කළුකුමාර දිෂ්ටිය වැසී ඇති බවත්, ශාන්තිකර්මයක් මාර්ගයෙන් යන්තරයක් දමා එම කළුකුමාර දිෂ්ටිය ඉවත් කළ යුතු බවට පූසාරියා මිත්තණියට පවසා ඇත.
ඒ අනුව දැරියගේ පියා සමඟ මිත්තණිය කථා බස්‍ කරගෙන අදාළ පුසාරිවරයාට එම ශාන්තිකර්මය කිරීමට භාර දී ඇතැයි පොලිසිය පවසයි. පූසාරිවරයා පත්තිනි දේවාලයේ ආවතේව කටයුතු සිදු කරන පුද්ගලයකු සමඟ දැරියගේ නි‍ෙවසට පැමිණ කළුකුමාර දිෂ්ටිය එළවා දැමීමෙ අදාළ ශාන්තිකර්මය රාත්‍රි සිදු කිරීමට පටන් ගෙන තිබේ.
එසේ පූසාරිවරයා දැරියට නිවසේ සාලයේ සිට කළුකුමාර දිෂ්ටිය පලවා හැරීමට ශාන්තිකර්මය සිදු කරන අතර තුරේ අලුයම පූසාරිවරයා දැරියට යන්තරයක් දැමීමට ඇති බව පවසා නිවැසියන්ට නිවසෙන් පිටතට යන ලෙස පවසා නිවසේ දොර වසා දැරිය නිවසේ කාමරයට ගෙන ගොස් ඇයව දූෂණය කර ඇතැයි පොලිසිය වැඩිදුරටත් සඳහන් කළේය.
අනතුරුව ශාන්තිකර්මය නිමවී පූසාරියා ගොස් ඇති අතර, ටික දිනකින් උදරාබාධ අමාරුවක් හේතුවෙන් මිත්තණිය විසින් දැරිය බදුල්ල ශික්ෂණ රෝහලට ඇතුළත් කර ඇති බවත් පොලිසිය පවසයි.
බදුල්ල ශික්ෂණ රෝහලේ වෛද්‍යවරුන් දැරිය පරීක්ෂා කර බලා ඇය ස්ත්‍රි දූෂණයකට ලක්වී සති පහක ගැබිනියක බවට අනාවරණය කිරීමෙන් අනතුරුව මේ සම්බන්ධයෙන් ලුණුගල පොලිසියට දැනුම් දීමෙන් පසු ලුණුගල පොලිසිය ලුණුගල හොප්ටන් පත්තිනි දේවාලයේ අදාළ පූසාරිවරයා සැකපිට මෙසේ අත්අඩංගුවට ගනු ලැබිණැයි උසස් පොලිස් නිලධාරියකු පැවසීය.
@දිනමිණ
