මාතෘ භූමියත් පක්ෂයත් දිනවීමට යළි එක්වෙන්න, ගිය අය යලි එන්න – මහින්ද රාජපක්ෂ
(මහින්ද අලුත්ගෙදර)
යම් යම් මතවාද පසෙකලා මාතෘ භූමිය සහ පක්ෂය දිනවීමට යළි එක්වන්නැයි ශ්‍රී ලංකා පොදු ජන පෙරමුණේ නායක, හිටපු ජනාධිපති මහින්ද රාජපක්ෂ මහතා සිය පක්ෂයෙන් වෙන්ව ගිය මන්ත්‍රී කණ්ඩායමට ආරාධනා කර තිබේ.
පසුගිය කාලයේ මෙන් එකාවන්ව එක්ව වැඩ කළ හැකි බව පෙන්වාදෙන හිටපු ජනාධිපතිවරයා ඒ අනුව යළි පක්ෂයට එක්වන්නැයි ආරාධනා කරයි.
හිටපු ජනාධිපතිවරයා මේ බව පැවැසුවේ බත්තරමුල්ල, නෙළුම් මාවතේ පිහිටි ශ්‍රී ලංකා පොදු ජන පෙරමුණු පක්ෂ මූලස්ථානයේදී ඊයේ (07) පෙරවරුවේ පැවති 2024 ජනාධිපතිවරණ අපේක්ෂකත්වය නිල වශයෙන් ප්‍රකාශයට පත්කිරීමේ උත්සවය අමතමිනි.
එහිදී වැඩිදුරටත් අදහස් පළ කළ හිටපු ජනාධිපතිවරයා මෙලෙස ද කීවේය.
“අපි ඉදිරි ජනාධිපතිවරණයෙන් අනිවාර්යයෙන් ජයග්‍රහණය කරනවා. මම දේශපාලනයට පැමිණ වසර 50කට වැඩියි. 1970දී මම දේශපාලනයට පැමිණියා. මගේ දේශපාලන අත්දැකීම් අනුව මෙවර ජනාධිපතිවරණයෙන් අපි ජයග්‍රහණය කරනවා. ජයග්‍රහණය කරනවා කිව්වම ඒ සම්බන්ධයෙන් සතුටු වෙන්න පුළුවන් අපේක්ෂකයන් ඉන්නවා. නාමල් රාජපක්ෂ ඊට වඩා ප්‍රබලයි. පොහොට්ටුවෙන් ගිය මන්ත්‍රී කණ්ඩායමට ද යළි එන්න කියා අපි ආරාධනා කරනවා. ඇතැමුන් අනිවාර්යයෙන් එනවා. පොහොට්ටුවෙන් ගිය පිරිසට මම ආරාධනා කරනවා අපි සමඟ එක්ව කටයුතු කරන්න කියලා.
පොහොට්ටුවට ආදරය කරන ජනතාව නාමල් රාජපක්ෂ පිළිගනු ඇතැයි මම විශ්වාස කරනවා. රටේ තරුණයන් ටික තරුණ නායකත්වය සමඟ ගමන් කරයි. ඒ අය උදව් කරන්න ඕනෙ. වැඩ කරන්න ඕනෙ. එයාලගේ වගකීමක් ඒක. අරගලය විසින් ඉල්ලුවේ මෙරටට තරුණ නායකත්වයක්. දැන් අපි ඒ අවස්ථාව දී තිබෙනවා. ළඟින්ම සිටි පිරිසක් අපෙන් වෙන්ව යෑම සම්බන්ධයෙන් කනගාටුවක් තිබෙනවා. නමුත් දේශපාලනයේ ස්වාභාවය එහෙමයි. එනවා. යනවා. නමුත් මම වෙනස් වුණේ නෑ.”
ශ්‍රී ලංකා පොදු ජන පෙරමුණේ ජාතික සංවිධායක, ජනාධිපති ධුර අපේක්ෂක නාමල් රාජපක්ෂ මහතා
“මා කෙරෙහි විශ්වාසය තැබීම සම්බන්ධයෙන් පක්ෂයේ සාමාජිකයන්ට මෙන්ම දේශපාලන මණ්ඩලයට මාගේ ගෞරවය පිරිනමනවා. මේ අභියෝගාත්මක කාලයේ මේ වගකීම භාරදීම පිළිබඳව ද ස්තූතිවන්ත වෙනවා. පැහැදිලිවම අභියෝග භාර ගන්න අපි සූදානම්. නායකත්වය සහ තරුණයන් අවශ්‍ය වන්නේ අභියෝග පවතින වෙලාවට. අපි පාක්ෂිකයන් මෙන්ම ප්‍රතිපත්ති කෙරෙහි විශ්වාස කරනවා. මේ රටේ තරුණ පරම්පරාව අපේක්ෂා කරන නූතන පරම්පරාවේ දේශපාලන බලවේගයක් විදියට ශ්‍රී ලංකා පොදු ජන පෙරමුණ මවුපියන්ගේත්, තරුණයන්ගේත් අපේක්ෂා මල්පල ගන්වන්න කටයුතු කරනවා.
ශ්‍රී ලංකා පොදු ජන පෙරමුණේ ජාතික සංවිධායකවරයා විදියටත්, ජනාධිපති අපේක්ෂකයා විදියටත් අපෙන් ගිය සියලු දෙනාට ගෞරවයෙන් ආරාධනා කරනවා අපත් එක්ක එකතු වෙන්න කියලා. ඒ ගියේ අපත් එක්ක එකට සිටි අයයි. අපි ළඟ හිත් අමනාපකම් තිබෙන්න ඇති. වෙනස්කම් තිබෙන්න ඇති. අපි කාගෙත් අඩුපාඩු ඇති. ඒවා හදාගෙන ඉදිරියට යමු. ඒ සියලු දෙනාටම අපි ආරාධනා කරනවා. පැහැදිලිවම ශ්‍රී ලංකා පොදු ජන පෙරමුණ ජයග්‍රහණය කරනවා. මගේ ජයග්‍රහණය කියන්නේ පක්ෂයේ ජයග්‍රහණයක්. පක්ෂයේ ජයග්‍රහණය කියන්නේ රටේ ජයග්‍රහණය. අපි අභියෝගවලට මුහුණ දෙන්න සූදානම්.
අපේ ගනුදෙනුව තිබෙන්නේ පාක්ෂිකයන් සමඟයි. පාක්ෂිකයා සහ ජනතාව ජයග්‍රහණය කරන්න, රටේ ඒකීයත්වය ආරක්ෂා කරමින් රට ජයග්‍රහණය කරන්න අපි කටයුතු කරනවා. පොහොට්ටුවේ පෙති ගලවන්න උත්සාහ කරන්න පුළුවන්. නමුත් පොහොට්ටුව පිපෙන්නෙත් මඩේ. නැට්ට හෝ මල හෝ තිබෙන්නේ ජනතාව ළඟයි. යම් යම් අය උත්සාහ කරන්න පුළුවන්. නමුත් ජනතාව අවසන් තීන්දුව ගනී. මට වගකීමක් පැවරී තිබෙනවා. ඒ වගකීම ඉටු කරනවා.”
ශ්‍රී ලංකා පොදු ජන පෙරමුණේ මහලේකම්, පාර්ලිමේන්තු මන්ත්‍රී නීතිඥ සාගර කාරියවසම් මහතා
“2024 ජනාධිපතිවරණය සඳහා ශ්‍රී ලංකා පොදු ජන පෙරමුණේ විජයග්‍රාහී ජනාධිපති ධුර අපේක්ෂකයා නිල වශයෙන් ප්‍රකාශයට පත් කරනවා. අපේ ජනාධිපති ධුර අපේක්ෂකයා තෝරා පත්කර ගැනීමේදී මූලික කරුණු කිහිපයක් දැඩිව සැලකිල්ලට ගෙන තිබෙනවා. එම සැලකිලිමත්භාවයේ ප්‍රමුඛ අපේක්ෂාව වූයේ ජනාධිපතිවරණය ජයගැනීම සහ ජයග්‍රහණයෙන් පසුව මාතෘ භූමියේත්, පොදු මහජනතාවගේත්, සමස්ත ශ්‍රී ලාංකේය සමාජ පද්ධතියේත් යහපත සහ දියුණුවයි. ඒ අනුව 2024 ජනාධිපතිවරණයේදී ශ්‍රී ලංකා පොදු ජන පෙරමුණේ අපේක්ෂකත්වය පිළිබඳ අවසන් නිගමනයකට එළැඹීමේදී දැඩිව අප විසින් අවධානයට ගත් කරුණු කිහිපයක් තිබෙනවා.
ස්වදේශික සංස්කෘතික හර පද්ධතීන් පිළිගෙන ඊට ගරු කරමින් කටයුතු කළ හැකි සහ සමස්ත ශ්‍රී ලාංකේය ජන හදවත් දිනා ගත හැකි ආකර්ෂණීය නැවුම් නායකත්ව ලක්ෂණවලින් හෙබි අයකු වීම, තත්කාලීන සමාජ, ආර්ථික සහ දේශපාලනික තත්ත්වයන් පිළිබඳ ප්‍රාමාණික අවබෝධයකින් යුතුව රට හමුවේ පවතින අභියෝග ජය ගනිමින් පොදු ජාතික අභිලාෂ ජයග්‍රහණය කළ හැකි අයකු වීම, මහින්ද චින්තන ජාතික න්‍යාය පත්‍රයේ මූලික ප්‍රමිතීන් අනුගමනය කරමින් අප රට සතු ජාතික සම්පත් සහ අනන්‍යතාව සුරක්ෂිත කර පෝෂණය කරමින් අනාගතවාදී දැක්මකින් යුතුව දියුණු ජාතික ආර්ථිකයක් වෙත මව්බිම ඔසවා තැබිය හැකි අලුත් නායකයෙක් වීම අවශ්‍ය වෙනවා.
ඊට අමතරව අභියෝග රැසක් මැද ශ්‍රී ලංකා පොදු ජන පෙරමුණ බිහිකළ සහ පසුගිය ජාතික මැතිවරණ තුනේදීම අද්විතීය ජයග්‍රහණ වෙත අප පක්ෂය ඔසවා ලැබූ මිලියන සංඛ්‍යාත ජන සමූහයේ පොදු ජන අපේක්ෂා යථාර්ථයක් බවට පත්කළ හැකි අයකු වීම, නූතන ලෝකයේ අතිනවීන ප්‍රවණතා පිළිබඳ යාවත්කාලීන දැනුමක් සහිතව ගෝලීය සමාජ සහ ආර්ථික පසුතලයෙහි ශ්‍රී ලංකා ජනරජයේ නාමය අනගිභවනීය අනන්‍යතාවක් ලෙස සටහන් තැබිය හැකි අලුත් නායකයකු වීම ආදිය ගැඹුරින් විමර්ශනයට ලක්ව තිබෙනවා. මේ සියලු කරුණු සැලකිල්ලට ගැනීමෙන් අනතුරුව 2024 ජනාධිපතිවරණයට ශ්‍රී ලංකා පොදු ජන පෙරමුණේ විජයග්‍රාහී ජනාධිපති අපේක්ෂකයා ලෙස නාමල් රාජපක්ෂ මහතා නම් කරන බව ප්‍රකාශ කරනවා.”
ශ්‍රී ලංකා පොදු ජන පෙරමුණේ නිර්මාතෘ බැසිල් රාජපක්ෂ, රාජ්‍ය ඇමැතිවරුන් වන ඉන්දික අනුරුද්ධ, ඩී. වී. චානක, මොහාන් ප්‍රියදර්ශන ද සිල්වා, ප්‍රසන්න රණවීර, තේනුක විදානගමගේ, පාර්ලිමේන්තු මන්ත්‍රීවරුන් වන ගාමිණී ලොකුගේ, ජොන්ස්ටන් ප්‍රනාන්දු, සරත් වීරසේකර, සංජීව එදිරිමාන්න, තිස්ස කුට්ටිආරච්චි, නිපුණ රණවක, ජයන්ත කැටගොඩ යන මහත්වරුන් ඇතුළු විශාල පිරිසක් මේ අවස්ථාවට එක්ව සිටියහ.
@දිනමිණ
