ලක් අම්මා වෙනුවෙන් ආ දමිතට වුනු දේ
රත්නපුර දිස්ත්‍රික් නාමයෝජනා ලැයිස්තුවෙන් හදිසියේ නම ඉවත් කිරීම සම්බන්ධයෙන් රංගන ශිල්පිනි දමිතා අබේරත්න මහත්මිය රත්නපුර තේරීම් භාර නිලධාරිවරයාට සහ මැතිවරණ කොමිසමට ඊයේ (11) පැමිණිලි කර තිබේ.
මහමැතිවරණය සඳහා සමගි ජන බලවේගයෙන් රත්නපුර දිස්ත්‍රික්කයට නාමයෝජනා ලබාදීමට රංගන ශිල්පීනි දමිතා අබේරත්න මහත්මිය ඊයේ (11) පෙරවරුවේ රත්නපුර දිස්ත්‍රික් ලේකම් කාර්යාලයට පැමිණ සිටි අවස්ථාවේදී නාමයෝජනා ලයිස්තුවේ ඇයගේ නම සඳහන් නොවීම නිසා අපේක්ෂාභංගත්වයට පත්ව ඇත. එම දිස්ත්‍රික්කයේ අනෙකුත් අපේක්ෂකයන්ගේ සහ ප්‍රබලයන්ගේ විරෝධය හමුවේ නාමයෝජනා ලැයිස්තුවෙන් ඇයගේ නම ඉවත් කර ඇති අතර දිස්ත්‍රික් නායක හේෂා විතාරණගේ එම නම නොමැතිව නාම යෝජනා ලයිස්තුව රත්නපුර දිස්ත්‍රික් ලේකම් සහ තේරීම් භාර නිලධාරී වසන්ත ගුණරත්න මහතා වෙත භාර දෙන ලදි.
ඇයගේ නම සඳහන් නොවීම නිසා එහිදී උණුසුම්කාරි තත්ත්වයක් හටගත් අතර තමාට අසාධාරණයක් සිදුව ඇතැයි පවසමින් ඇය ඒ සම්බන්ධයෙන් රත්නපුර දිස්ත්‍රික් ලේකම් කාර්යාලයට සහ මැතිවරණ කොමිසමට පැමිණිලි කර තිබේ. දමිතා අබේරත්න මහත්මිය ඊයේ (11) උදෑසන නාමයෝජනා භාර දෙන අවස්ථාවේ දී රත්නපුර දිස්ත්‍රික් ලේකම් කාර්යාලයට පැමිණ පැය භාගයක පමණ කාලයක් එහි රැඳී සිටීමෙන් පසු නික්ම ගියාය.
නාමයෝජනා පත්‍ර භාරදීමෙන් පසු සමගි ජන බලවේගයේ රත්නපුර දිස්ත්‍රික් නායක හේෂා විතානගේ මහතා පැවසුවේ දමිතා අබේරත්න මහත්මිය සජබ වෙනුවෙන් විශාල මෙහෙවරක් ඉටු කළත් රත්නපුරට පිටතින් ආනයනය කිරීමේ අවශ්‍යතාවක් නොමැති බවයි. රත්නපුර දිස්ත්‍රික්කය කාන්තා නියෝජනයක් අවශ්‍ය නිසා රත්නපුර දිස්ත්‍රික් සජබ පළාත් පාලන මන්ත්‍රීනියන්ගේ සංසදයේ ලේකම්වරිය වන රිද්මා ධර්මවර්ධන මහත්මියට නාමයෝජනා දුන් බවද හෙතෙම කීවේය.
@දිනමිණ
