සාගර කාරියවසම් ජීවතුන් අතර ද? – උදය ගම්මන්පිල
ලංකා ඉතිහාසයේ වාර්ථාගත ඉන්ධන මිළ ඉහලයාමක් සිදු කළ මේ මොහොතේ සාගර කාරියවසම් මහතා ජීවතුන් අතර සිටියේ නම් අන්වාර්යයෙන්ම අමාත්‍ය ගාමිණී ලොකුගේ මහතාට ඉල්ලා අස්වන ලෙස මාධ්‍ය නිවේදනයක් නිකුත් කරන බව උදය ගම්මන්පිල මහතා පවසනවා.
ඒ මහතා මේ බව සදහන්කර සිටියේ පිවිතුරු හෙළ උරුමය පක්ෂ මූලස්ථානයේ ඊයේ (14) පැවති මාධ්‍ය හමුවට එක් වෙමින්.
එහිදී අදහස් දැක්වූ උදය ගම්මන්පිල මහතා,
ලංකා ඉතිහාසයේ ඉහළම ඉන්ධන මිල වැඩි කිරිම පසුගිය සිකුරාදා සිදුවුණා . පොහොට්ටුවේ මහලේකම් සාගර කාරියවසම් මැතිතුමා අද ජීවතුන් අතර සිටියා නම් එතුමා අනිවාර්යෙන්ම මා හිතමිත්‍ර ගාමිණි ලොකුගේ ඇමතිතුමාට ඉල්ලා අස් විය යුතු යැයි දැනුම් දෙමින් මාධ්‍ය නිවේදනයක් නිකුත් කරනවා . මම බලශක්ති ඇමති ධූරය දරන කාලෙ ජනාධිපතිතුමාගේ සහ අගමැතිතුමාගේ නිර්දේශය මත රුපියල් 7කින් ඩීසල් වැඩි කළහම මට වහාම ඉල්ලා අස්වෙන්න යැයි පොහොට්ටුවේ මහලේකම් සාගර කාරියවසම් මැතිතුමා දැනුම් දුන්නා නම් රුපියල් 55 කින් මිල වැඩි කරද්දී එතුමා ජීවතුන් අතර සිටියා නම් මොන ජංජාලයක් නටයි ද කියලා කාටවත්ම හිතාගන්න බෑ .
ඒ වගේම මෙවර සිදු වුණු දැවැන්ත ඉන්ධන මිල වැඩි කිරීමෙන් සාමාන්‍ය ජනතාවට දැරිය නොහැකි දැවැන්ත කම්පනයක් ඇති කරලා තියෙනවා . ඉන්ධන මිල මෙතරම් දැවැන්ත ලෙස වැඩිකිරීමට බලපෑ එකම හේතුව ලෝක වෙළඳ පොළේ මිල වැඩි කිරීම නෙමෙයි . තවත් හේතු ගණනාවක් බලපෑවා .
එක් ප්‍රධාන හේතුවක් තමයි විදේශ විනිමය නිසි ලෙස කළමනාකරණය නොකිරීම නිසා රුපියල වසරකට අධික කාලයක් කෘතිමව අල්ලගෙන සිටීම නිසා දැවැන්ත ලෙස රුපියල අව ප්‍රමාණය කරන්න සිදුවීම . රුපියල අවප්‍රමාණය උනේ එක පැත්තකින් විදේශ විනිමය සම්පත් නිසි ලෙස කළමනාකරණය නොකිරීම, රටේ උද්ධමනයට සරිලන පොලී අනුපාතයක් පවත්වා නොගැනීම ඒ වගේම අත්‍යවශ්‍ය නොවන ආනයන භාණ්ඩ සීමා නොකිරීම වැනි කාරණා ගණනාවක් නිසා.
ඒ වගේම ලෝක වෙළෙඳ පොළේ ඉන්ධන මිල ඉහළ යන විට එහි බර සම්පූර්ණයෙන්ම ජනතාව මත පටවන්නේ නැතිව එහි කොටසක් දරාගැනීමට හැකි යාන්ත්‍රණයක් නොතිබීමත් ඉන්ධන මිල මෙතරම් දැවැන්ත ලෙස ඉහළ යෑමට බලපෑවා.
සැබෑ ඉන්ධන මිල ස්ථායිකරණ අරමුදලක් ඇති කිරීමට යෝජනා කරමින් විතරක් නෙමෙයි ඊට අදාළ යාන්ත්‍රණය දැවැන්ත පර්යේෂණයක් සිදු කරලා 2021 මාර්තු මාසේ 15 වැනිදා මම අමාත්‍ය මණ්ඩලයට අමාත්‍ය මණ්ඩල පත්‍රිකාව ඉදිරිපත් කලා. මේ අමාත්‍ය මණ්ඩල පත්‍රිකාව මුදල් අමාත්‍යංශයෙන් බලවත් විරෝධයක් ආවා . අවසානයේ අගමැතිතුමාගේ ප්‍රධානත්වයෙන් අනු කමිටුවට මේක යොමු කළා. අනුකමිටුවේ නිර්දේශ මත අමාත්‍ය මණ්ඩලය අනුමත කළා. ඒ අනුව අපි අදාළ නීති සම්පාදනයට අවශ්‍ය පනත් කෙටුම්පතක් හදලා ඇමැති මණ්ඩලයට ඉදිරිපත් කළාම මුදල් අමාත්‍යංශයේ අධ්‍යයනය කරනවා යැයි කියමින් තවමත් ඒකට එකඟතාවය ලබා දුන්නේ නෑ. සැබෑ මිල ස්ථායිකරණ අරමුදලක් බිහිව තිබුණා නම් මේ බර ජනතාවට දරන්න වෙන්නේ නෑ .
ඒ විතරක් නෙමෙයි ඉන්ධන මිල මෙතරම් දැවැන්ත ලෙස ඉහළ දමනවා වෙනුවට ආණ්ඩුව විසින් ඉන්ධන මත අයකරන බදු ප්‍රමාණයෙන් යම් ප්‍රමාණයක් අඩු කරල ඉන්ධන මිල මෙතරම් ඉහළ නං වන්නැතුව ඉන්න තිබුණ. මේ වන විට ආණ්ඩුව ඉන්ධන මත අයකරන බදු වලින් එක දවසකට රුපියල් මිලියන 750 කට වැඩි මුදලක් උපයා ගන්නවා. ජනතාව මතම මේ බර පටවන්නේ නැතිව ආණ්ඩුවේ අනවශ්‍ය වියදම් කපා හරිමින් මේ බරෙන් කොටසක් ආණ්ඩුවට දැරීමේ හැකියාව තිබුණා . බරෙන් කොටසක් දරනවා නෙමෙයි බද්ද පොඩ්ඩක් අඩු කළා නම් ඒ සහනය ජනතාවට ලබා ගැනීමට හැකියාව තිබුන.
වැඩ බැරි බැසිල්ගේ බැරිකම සඟවා ගන්න අපට චෝදනා කරන්න එපා
ඊළඟට ඩීසල් හිඟයක් ඇති වුණේ ඩීසල් හිඟයක් ඇති වන බවට විෂය භාර අමාත්‍යවරයා ලෙස මම කලින් දැනුම්දීමක් කළ නිසා යැයි ආණ්ඩුවේ සමහර ඇමතිවරු මට චෝදනා නගනවා. ඇත්තටම ඩීසල් හිඟයක් ඇති වුණේ මගේ ප්‍රකාශයක් නිසා කියලා කියමුකො එහෙම නම් බෙහෙත් හිඟයක් ඇති වුණේ කොහොමද ? සිමෙන්ති යකඩ හිඟයක් ඇති වුණේ කොහොමද ? ගෑස් හිඟයක් ඇති වුණේ කොහොමද ? කිරිපිටි තිරිඟු පිටි හිඟයක් ඇතිවුණේ කොහොමද ? ඒ තර්කය අනුව නම් ගෑස් හිඟයක් ඇති වෙන බව මුදල් ඇමැති තුමා කලින් කියන්න ඕන. යකඩ සිමෙන්ති හිඟයක් ඇතිවෙන්න නම් ඉදිකිරීම් ඇමති විදිහට ගරු අගමැති තුමා භාණ්ඩ හිඟයක් ඇති වෙන බව කලින් කියන්න ඕන. ඒ වගේ ම ඖෂධ හිඟයක් ඇති වෙන්න නම් සෞඛ්‍ය ඇමැතිතුමා ඒ බව කලින් කියන්න ඕනෙ. තිරිඟු පිටි කිරි පිටි හිඟයක් ඇතිවෙන්න නම් වෙළෙඳ ඇමැති තුමා කලින් කියන්න ඕන. එහෙම උනේ නෑනෙ එහෙනම් මේ භාණ්ඩ හිඟයක් ඇති වුණේ කොහොමද ? ඉන්ධනද අනෙකුත් භාණ්ඩ ද සියල්ලම හිඟ වීමට බලපෑවේ එකම එක හේතුවක් පමණයි. ඒ තමයි ඩොලර් හිඟය . ඩොලර් හිඟය ඇතිවුණේ විදේශ විනිමය අනුපාතයන් සීමිත විදේශ විනිමය ප්‍රමාණයක් නිසි ලෙස කළමනාකරණය කිරීමට මුදල් ඇමතිවරයා අසමත් වුන නිසා . ඒ නිසා වැඩ බැරි බැසිල්ගේ බැරිකම සඟවා ගන්න අපට චෝදනා කරන්න එපා කියලා අපි ආණ්ඩුවට කියනවා .
මාධ්‍යවේදියා
විමල් වීරවංශ මැතිතුමාට එහෙම එරෙහිව පැරණි නඩු යළි එළියට එනවා නේද ?
පිළිතුර
නඩු දමාවි, හිරේ දමාවි, සමහර විට මරා දමාවි. අපව මරා දැමුවත් අපේ සටන නම් මරා දමන්නට අප ඉඩ තබන්නේ නැහැ. බැසිල් රාජපක්ෂ කියන අවලස්සන ඇමරිකානුවා යලි ඇමරිකාවට යන තුරුම අපේ සටන නවත්වන්නේ නැහැ. යන්නේ නැත්නම් අපි එලවනවා.
මේ පටන් ගත්තා විතරයි. අපි අභ්‍යන්තර සටනක් කළා. එය සාර්ථක වුණේ නැහැ. අපි ජනතාව සමග එකතුවෙලා ජනතාව පෙළගස්වනවා. ජනතාව පෝලිම් වල දුක් විඳින්නේ අවශ්‍ය හේතුවක් මත නෙවෙයි. හිතාමතා ආර්ථිකය කඩා වැට්ටවීමේ උපායන් නිසා. මේ ඇතිවුණු තත්වයක් නොවෙයි ඇති කළ තත්වයක්.
මාධ්‍යවේදියා
ජනාධිපතිතුමා කිව්වා පස් වෙනිදායින් පස්සේ විදුලි කැපීම නවතිනවා කියලා. ඒ වගේම වර්තමානයෙත් බලශක්ති ඇමැති වශයෙන් ඉන්න ගාමිණි ලොකුගේ අමාත්‍යවරයා කියනවා පෝලිම් තියන්නෙ නෑ කියලා. නමුත් මේ දෙකම සිද්ධ වෙලා නෑ.
පිළිතුර
මම ඉවත් වුනාම ප්‍රශ්නය විසඳෙනවා නම් මම ඉතා සතුටින් තනතුරෙන් ඉවත් වෙනවා . පස් වැනිදා සිට විදුලිය කපන්නේ නැතැයි කියලා මුලින්ම කිව්වෙ මුදල් ඇමතිතුමා. ඒ වගේම ජනවාරි තිස් වැනිදායින් පසු තෙල් සංස්ථාවේ තෙල් විදුලියට අවශ්‍ය නැත ඉන්දියානු තෙල් සමාගමෙන් තෙල් අරගෙන අඛණ්ඩව විදුලිය සපයනවා කියලා කිව්වෙත් මුදල් ඇමතිතුමා. ජනවාරි 30 වැනි දා සිට අඛණ්ඩ විදුලි සැපයුමක් කරනවයි කියපු මුදල් ඇමතිතුමාගේ ඒ බොරුව කවුරුහරි විශ්වාස කළා නම් විතරයි මාර්තු 5 වැනිදා සිට විදුලිය කපන්නෑ කියන බොරුවට කලබල වෙන්නේ . එතුමා දිවේ කටේ ගෑවෙන්නේ නැතුව බොරු කියන බව දන්න නිසා කවුරුවත් ඒ දින වකවානු ගැන සැලකිලිමත් වෙන්නේ නෑ . විශේෂයෙන්ම ඉදිරියේදී අපායේ ඉන්ටවල් වගේ පොඩි සහන කාලයක් උදා වෙනවා .
මාධ්‍යවේදියා
මේ යන ක්‍රමවේදයට මොකක්ද ඔබතුමාට ඉදිරිපත් කරන්න පුළුවන් වැඩපිළිවෙල .
පිළිතුර
අපි ඉවත් කරලා වේගයෙන් අපි කිව්ව දේවල් කරගෙන යනවා .ලිඛිතව සහ වාචිකව අමාත්‍ය මණ්ඩලයට මම කියලා තියෙනවා ජාත්‍යන්තර මූල්‍ය අරමුදලේ සහාය ලබාගන්න, රුපියල අව ප්‍රමාණය කරන්න , අත්‍යවශ්‍ය නොවන භාණ්ඩ සීමා කරන්න. සියල්ල නැතත් යම් ප්‍රමාණයකට සීමා කලා. ඒ වගේම අපි තවදුරටත් කිව්වා වීඩියෝ තාක්ෂණය භාවිතා කරලා ආන්ඩුවේ රැස්වීම් සිදුකරමින් කොළඹට නිලධාරීන් ගෙන් වීම වැළැක්වීමේ චක්‍රලේඛනයක් නිකුත් කරන්න කියලා. ඒක නිකුත් කළා. විදුලිය අරපිරිමැස්මෙන් භාවිතා කිරීම සඳහා ක්‍රියාමාර්ග ගන්නැයි කිව්වා. අපි එදා කිව්ව සියල්ලම ආණ්ඩුව අද කරමින් ඉන්නවා අපි ඉවත් කිරීමෙන් පස්සේ හරි.
මොනව වුණත් අද අපි කියූ දේවල් කරමින් ඉන්නවා. හැබැයි ආණ්ඩුව මතක තියාගන්න ඕන දේ තමයි පැනඩෝල් පෙත්තෙන් හොඳ කරගන්න තියන අමාරුව කල් මරලා මරණාසන්න උනාම පැනඩෝල් පෙති පොවල හරියන්නේ නෑ. ඒ නිසා සමහර වෙලාවට ලෙඩාව දොස්තර ගාවට අරන් ගියා ම දොස්තර කියනවා එදා මං කිව්ව බෙහෙත් දැන් දීල වැඩක් නෑ දැන් ලෙඩා මැරෙනවා අපිට කරන්න විකල්පයක් නෑ . නමුත් ප්‍රමාද වී හෝ අපේ නිර්දේශයන් ක්‍රියාත්මක කිරීමට ඉදිරිපත් වීම ගැන අපි සතුටු වෙනවා .
මෙම මාධ්‍ය හමුව සදහා පිවිතුරු හෙළ උරුමය ප්‍රධාන ලේකම් උපුල් විජේසේකර මහතා සහ මහජන නියෝජිත කටයුතු ලේකම් උපුල් කෝණාර මහතාද එක්විය.
– Media unit
