පාලන මිළ නිසා සහල් මෝල් හිමියන් බෙදීමක
සහල් මෝල් හිමියන් පාලන මිලට සහල් අලෙවි කිරීම සම්බන්ධයෙන් බෙදී වෙන්වී ඇති බවක් පෙනෙන්නට ඇති අතර ඇතැමුන් පාලන මිලට සැපයීමට එකඟ වන අතර තවත් සමහරු එය ප්‍රතික්ෂේප කර ඇත්තේ එයින් තමන්ට පාඩු සිදුවන බව පවසමිනි.
නාඩු වී කිලෝවක් රුපියල් 122 ට මිලදී ගැනීමට නොහැකි බවත් එනිසා සහල් කිලෝවක් රුපියල් 220 ට අලෙවි කිරීමට නොහැකි බව පොළොන්නරුව දිස්ත්‍රික්කයේ සහල් නිෂ්පාදකයින් පවසති.
බලයට පත් ආණ්ඩුවට සහයෝගයක් වශයෙන් තමා 28 වෙනිද සිට සියලුම සහල් පාලන මිලට ලබාදීමට කටයුතු කරන බව අරලිය සහල් ව්‍යාපාරයේ අධිපති ඩඩ්ලි සිරිසේන පවසයි.
ප්‍රධාන පෙළේ සහල් මෝල් හිමිකරුවෙකු වන ඩඩ්ලි සිරිසේන පසුගිය දා (28) ප්‍රකාශ කළේ අනුර කුමාර දිසානායක ජනාධිපතිවරයාගේ අඛණ්ඩ වැඩපිළිවෙලට සහය දැක්වීම සඳහා පාලන මිලට සහල් ලබාදීමට තම සංගමය තීරණය කළ බවය.
වෙළඳපොලේ පවතින නාඩු සහල් හිඟයට හේතු වී ඇත්තේ නාඩු වී නිෂ්පාදනයේ දුර්වලතාවය බව ඔහු පෙන්වා දුන්නේය. ගොවීන් නාඩු වී වගා කිරීම අඩු කර ඇති බවත්, වී වගා කරන්නන්ගෙන් සියයට 80කට වැඩි ප්‍රමාණයක් කිරි සම්බා වගාවට යොමු ව ඇති බවත් ඔහු පැවසීය.
“මෙය සිදු කර ඇත්තේ ඔවුන්ගේ ආදායම වැඩි කර ගැනීම සඳහායි,”
ඔහු කියා සිටියේ වී වගාවේ මෙම අසමතුලිතතාවය වළක්වා ගැනීමේ අවශ්‍යතාවය ඔහු අවධාරණය කළේය.
මේ අතර, මහා පරිමාණ සහල් නිෂ්පාදක ඩඩ්ලි සිරිසේනගේ ප්‍රකාශයට එකඟ නොවන බවත් පාලන මිලට සහල් අලෙවි කළ නොහැකි බවත් මරඳගහමුල සමස්ත ලංකා මධ්‍ය හා කුඩා පරිමාණ සහල් වෙළෙඳුන්ගේ සංගමය ඊයේ මාධ්‍ය වෙත ප්‍රකාශ කළේය.
ඩඩ්ලි සිරිසේන මහතාගේ ප්‍රකාශය අනුව කටයුතු කළහොත් සුළු හා මධ්‍ය පරිමාණ සහල් මෝල් හිමියන් සහ සහල් ව්‍යාපාරිකයන් දැඩි අසීරුතාවයකට පත්වන බව මරඳගහමුල සහල් වෙළෙඳුන්ගේ සංගමයේ සභාපති බී.කේ.රංජිත් පවසයි.
දැනට වී මිල රුපියල් 130 ත් 132 ත් අතර පවතින බවත්, අධික පාඩු ලබමින් පාලන මිලට සහල් අලෙවි කිරීමට නොහැකි බවත් ඔහු පෙන්වා දුන්නේය.
ගොවීන් අධික පොලියට පුද්ගලික ණය දෙන්නන්ගෙන් ණය ලබාගෙන ඇති බවත්, එම ණය පියවීමට මාර්ගයක් නොමැතිව ගොවීන් අසරණ වන බවත් ඔහු එහිදී පැවසීය.
ඒ අනුව සහල් මිල ස්ථීර ලෙස පහත හෙළීම සඳහා ඵලදායී යාන්ත්‍රණයක් සකස් කරන ලෙස සමස්ත ලංකා මධ්‍ය හා කුඩා පරිමාණ සහල් වෙළෙඳුන්ගේ සංගමයේ සභාපතිවරයා රජයෙන් ඉල්ලා සිටියේය.
@slleader.lk
