05 ශිෂ්‍යත්වය 10වෙනිදා
පහ වසර ශිෂ්‍යත්ව විභාගය මේ මස 10 දා රට පුරා විභාග මධ්‍යස්ථාන 2,728කදී පැවැත්වේ. ඒ අනුව පහ වසර ශිෂ්‍යත්ව විභාගයේ උපකාරක පන්ති පැවැත්වීම අනිද්දා (06) මධ්‍යම රාත්‍රී 12න් පසුව සපුරා තහනම් බව විභාග කොමසාරිස් ජනරාල් ඉන්දිකා කුමාරි ලියනගේ මහත්මිය පැවැසුවාය.
විභාග අපේක්ෂකයන් සඳහා උපකාරක පන්ති සංවිධානය සහ එම පන්ති මෙහෙය වීම, විෂයානුබද්ධ දේශනා, සම්මන්ත්‍රණ, වැඩමුළු පැවැත්වීම, මෙම විභාගය සඳහා අනුමාන ප්‍රශ්න ඇතුළත් ප්‍රශ්න පත්‍ර මුද්‍රණය කිරීම සහ ඒවා බෙදා හැරීම, විභාග ප්‍රශ්න පත්‍රවල ප්‍රශ්න ලබාදෙන බවට හෝ ඒ හා සමාන ප්‍රශ්න ලබාදෙන බවට පෝස්ටර්, බැනර්, අත්පත්‍රිකා විද්‍යුත් හෝ මුද්‍රිත මාධ්‍ය මඟින් හෝ සමාජ මාධ්‍ය මඟින් ප්‍රසිද්ධ කිරීම හෝ එවැනි දෑ ළඟ තබා ගැනීම මෙම තහනම යටතේ බලපැවැත්වේ.
2025 අගෝස්තු 12 දිනැති අංක 1927/49 දරන අතිවිශේෂ ගැසට් නිවේදනය මඟින් සංශෝධිත 1968 අංක 25 දරන ප්‍රසිද්ධ විභාග පනතෙහි 22 වගන්තිය යටතේ නිකුත් කර ඇති නියෝග ප්‍රකාරව පාසල්වලට සිසුන් තෝරා ගැනීමට සහ ශිෂ්‍යාධාර ප්‍රදානය සඳහා පහ වසර ශිෂ්‍යත්ව විභාගය පැවැත්වෙන අතර යම් අයෙක් හෝ ආයතනයක් හෝ වෙනත් පාර්ශ්වයක් විභාගය සම්බන්ධයෙන් පවතින නියෝග කඩ කළහොත් අදාළ පාර්ශ්වය වරදකරුවකු වන බව ද විභාග කොමසාරිස්වරිය ප්‍රකාශ කළාය.
@දිනමිණ
