කැලේ නැතිව අපේ පරම්පරාවට ජීවිතයක් නෑ – ඌරුවරිගයේ වන්නිලා ඇත්තෝ
ලංකා ඉතිහාසයේ ප්‍රථම වතාවට ආදිවාසී ගම්මානයට ජනාධිපතිවරයකු පැමිණීම හා ආදිවාසී දින සැමරුමකට සහභාගි වීම ඉතිහාසගත වන බව දඹාන ආදිවාසී නායක විශ්ව කීර්ති ශ්‍රී වනස්පති ඌරුවරිගයේ වන්නිලා ඇත්තන්, ආදිවාසී ගම්මානයේ මොරබැද්දේදී ප්‍රකාශ කර සිටියේය.
ලෝක ආදිවාසී දිනය පෙරේදා ( 09 ) දිනට යෙදී තිබුණි. එහි ජාතික සැමරුම මහියංගණ, දඹාන, කොටබකිණිය, මොරබැද්ද නම් වනගත කොටසක, රාජ්‍ය අනුග්‍රහයෙන් ජනාධිපති අනුර කුමාර දිසානායක මැතිතුමන්ගේ ප්‍රධානත්වයෙන් එදින පැවැත්විණ.
එහිදී ඌරුවරිගයේ වන්නිලා ඇත්තන් මෙසේද පැවසීය.
“පෙරහර ඉවර වෙලා අර රෙදි පිළි ගැලවුවාම අලි නිකම්ම අලි විතරයි. පෙරහරේ ගෙනියනකොට නම් ලයිට් දාලා ලස්සනට අන්දලා අරගෙන යනවා. අන්න ඒ තැනට අපේ පරම්පරාව පත් වෙලා තියෙනවා දැන්. ඇත්තටම මට පුදුම සතුටක් තියෙන්නේ. අද දවස ලංකා ඉතිහාසයේ මේ රටේ ජනාධිපතිවරයෙක් මේ කැලෑවට ඇවිත් මේ උත්සවයට සහභාගි වන ප්‍රථම අවස්ථාව මේක වීම ගැන. මම හිතනවා මේ තැන ඇත්තටම ලෝකෙටම ආදර්ශයක් ගෙන එන සිදුවීමක් වෙයි කියලා. මේක හරිම වැදගත්. ඒ වගේම මම විශ්වාස කරනවා, අපේ පරම්පරාවටත් ඉදිරි කාලයේ යම් හෝ යහපතක් සිද්ධවෙයි කියලා මගේ හිතේ තියෙනවා.
ආදිවාසී දිනය කියලා දිනයක් වෙන් කරලා ඒකට එක එක අවුරුදුවල විවිධ තේමාවක් වෙන් කරනවා. මේපාර තේමාව වෙලා තියෙන්නේ ආදිවාසී ජනතාව සහ කෘත්‍රිම බුද්ධිය – කෘත්‍රිම බුද්ධිය හැසිරවීම තුළින් ‘ආදිවාසී අයිතිවාසිකම් ආරක්ෂා කිරීම සහ ඔවුන්ගේ අනාගතය හැඩගැස්වීම’ (Indigenous Peoples and AI: Defending Rights, Shaping Futures) කියන එකයි. හැබැයි මම විශ්වාස කරනවා මේ දියුණුවයි මේ තාක්ෂණයයි කියන ඒවා හින්දාමයි අපේ පරපුර විනාශ වෙන්නේ කියලා. ඉතින් මේ ගැන අපි තවත් සංවිධාන වෙලා ඉදිරියට ගමන් කළොත් සමහර වෙලාවට අපිට මේ තියෙන තැනත් නැතිවෙන්න ඉඩකඩ තියෙනවා. ඒ මොනවා සිද්ධ වුණත් ඇත්තටම මම සතුටට පත් වෙනවා, ලෝකය දියුණුවෙන් දියුණුවට පත්වෙන්න වෙන්න ලෝකය වෙනස් වෙනවා, මිනිස්සු වෙනස් වෙනවා, මිනිස්සු ළඟ තියෙන හොඳ සිරිත් විරිත් විනාශයට පත් වෙනවා, මේ පරිසරය විනාශයට පත් වෙනවා. එහෙම කාලෙක මේ ආදිවාසී පරම්පරාවන් උදෙසා ලෝක එක්සත් ජාතීන්ගේ සංවිධානය මඟින් 1984දී ආදිවාසීන් වෙනුවෙන් දිනයක් වෙන් කරලා, ආදිවාසීන් ආරක්ෂා කිරීම සඳහා නීති රීති හැදීම පිළිබඳව. ඒ ගැන මම බෙහෙවින්ම සතුටට පත්වෙනවා. ලෝකයේ විවිධ කර්තව්‍යයන් අරබයා විශේෂ දිනයන් ප්‍රකාශයට පත් කරලා තියෙනවා. එහෙම දිනයක් විශේෂයෙන් වෙන් කරන්න වෙලා තියෙන්නේ මිනිස්සු සංවර්ධනය කිය කියා ඉදිරියට යද්දී මිනිස්සුන්ට හැම දෙයක්ම අමතක වෙනවා. එහෙම මිනිස්සුන්ට අමතක වෙන ලෝකයේ එකම එක දිනයන් හරි ඒ වෙනුවෙන් වෙන් කරලා තිබීම වැදගත් කියලා මම හිතනවා.
ජනාධිපතිතුමනි, මේ රටේ ආදිවාසී පරම්පරාව ගැන කියද්දී මේ රටේ විවිධ වූ ස්ථානවල ඒ අය ජීවත් වෙලා තියෙනවා. මේ රටේ මුල් කාලේ ජීවත්වෙලා තියෙන්නේ යක්ෂ, නාග, දේව, රාක්ෂ කියන ගෝත්‍ර 04ක්. මේ ගෝත්‍ර 04ට තමයි කියන්නේ සිවු හෙළයෝ කියලා. ඒ කියන්නේ මේ රටේ ජීවත් වෙලා තියෙන්නේ හෙළයෝ. අපේ රට ලොකු ඉතිහාසයක් තියෙන රටක්. මොකකින් හරි වැරදිලා තාමත් අපි කතා කරන්නේ අවුරුදු 2600ක ඉතිහාසයක් ගැන විතරයි. මම කියන්න දන්නේ නෑ ඒ වැරැද්ද කොහොම වුණාද කියලා. විජය රජතුමන් මේ රටට පැමිණිලා මේ රට දියුණුවට පත් කරා කියනවා නම්, ඒ කතාව විශ්වාස කරන්න අමාරුයි. විජය රජ්ජුරුවෝ මේ රටට එනකොට තම්මැන්නාවේ කුවේණි කපු කටිමින් හිටියා කියනවා. හැබැයි කපු කටින්න තරම් කුවේණි දියුණු තත්ත්වයක හිටියා නම් මේ රටේ නොදියුණු මිනිස්සු හිටියා කියන එක බොරුවක්. එක්කෝ ඒ අය කපු මේ රටේ වගා කරලා තියෙන්න ඕ‍ෙන. එහෙම නැත්නම් කපු වෙන රටකින් මේ රටට ගෙන්වාගෙන තියෙන්න ඕ‍ෙන. රට රටවල් එක්ක ගනුදෙනු කරන්න නම් ඒ අය හොඳ දියුණු තත්ත්වයක ඉන්න ඕ‍ෙන. මෙන්න මෙහෙම කාලෙක ඉඳලා පැවත එන පරපුරක, මේ රට දියුණුවෙන් දියුණුවට පත්වේගෙන එනකොට මේ රටේ නිදහසේ ජීවත් වෙච්ච අපේ පරම්පරාවේ මිනිසුන්ට ඒ නිදහස අහිමි වුණා. මගේ පියා ජීවත් වෙලා හිටිය කාලේ විශාල සටනක් කරන්න වුණා. ආදිවාසී පරම්පරාවේ අයිතිවාසිකම් ආරක්ෂා කරගන්න. හැබැයි ඒ කාලවල්වල පත් වෙලා තිබුණු ආණ්ඩු හා ඒ ආණ්ඩු කරවූ ප්‍රධානීන් ඒ පිළිබඳ සැලකිල්ලක් දැක් වූයේ නෑ. ජනාධිපතිතුමනි, මම විශ්වාස කරනවා, රූපයක් හදනකොට ඒ රූපය ලස්සන කරන්න නම් ඒ රූපයට විවිධ වර්ණ එකතු කළොත් පමණයි ඒ පින්තූරයේ ලස්සන වැඩිවෙන්නේ. හැබැයි සුදු පාටින් පමණක් ඒ රූපය හැදුවොත් ඒ රූපයේ එතරම් ලස්සනක් පෙනෙන්නට නෑ. අන්න ඒ වගේ තමයි රටක් හැටියට රටක ජීවත් වෙන ඒ ඒ පරම්පරාවල විවිධ වූ සංස්කෘතින් ඉදිරියට පවත්වාගෙන යන කණ්ඩායම් එකතු වුණොත්, ඒ කණ්ඩායම් සමගියෙන් ඉන්නවානම් පමණයි ඒ රට ලස්සන වෙන්නේ. ඒ රට දියුණු කරන්න, සංවර්ධනය කරන්න කවදාවත් අමාරු වෙන්නේ නෑ. අද දවසේ වෙලා තියෙන්නේ මම මේ ජාතියේ කියනවා. අහවලා අර ජාතියේ කියනවා. අනිත් කෙනා පහත් ජාතිය කියනවා. තවත් කෙනෙක් උසස් ජාතියේ කියනවා.
ජනාධිපතිතුමනි, මම මේ රැහේ නායකයා බවට පත්වෙන්නේ 1998 වෙසක් මාසේ 28 වැනි දින. ඒ දිනයේ ඉඳලාම මම උත්සාහ කළේ මගේ දරුවෝ ජීවත් කරවන්න නෙවෙයි. මට විට කන්න කීයක් හෝ මුදල් එකතු කරගන්න නෙවෙයි. මම මහන්සි වුණේ මගේ පරපුරේ කණ්ඩායම් ජීවත් වෙන්නේ කොහෙද? ඒ අය කොච්චර ඉන්නවාද? අද වෙනකොට ඒ අය කොච්චර ප්‍රමාණයක් විනාශ වෙලා ඉන්නවාද කියලා හොයලා බලන්නයි. ඒහෙම හොයලා බලලා මම මුලින්ම අපේ කණ්ඩායම් එකතුකර ගත්තා. ඒ අයට තියෙන ගැටලු පිළිබඳ සොයා බැලුවා. එහෙම බැලුවොත් ජනාධිපතිතුමනි මට පැවරුණා හැම අමාත්‍යාංශයකම වැඩ කරන්නත්, හොයලා බලන්නත්. මට අධ්‍යාපන අමාත්‍යාංශයේ වැඩ කරන්නත් වුණා, වනජීවී අමාත්‍යාංශයේ වැඩ කරන්නත් සිද්ධ වුණා. අමාත්‍යවරයකුට වඩා වැඩියෙන් වැඩ කොටසක් කරන්න මට සිද්ධ වුණා. මම කැළෑවේ ජීවත් වෙන්නේ. මට පරපුර ගැන, වැඩ සොයා බලන්න තමයි තිබෙන්නේ. මොන දේ සිද්ධ වුණත් රටක් විදියට මම පරපුරේ නායකයා හැටියට මේ හැමෝම ගැන හොයා බලන්නත් ඕ‍ෙන. 1983න් පස්සේ, වතුර වළක ජීවත් වෙච්ච මාළු ටිකක් ගොඩ දාලා ජීවත්වෙයල්ල කියලා කියන්නාක් වගේ තැනට පත් වෙලා තියෙනවා අපේ පරම්පරාව දැන්. වතුර නැතුව මාළුවාට ජීවත් වෙන්න බෑ වගේම කැලේ නැතිව අපේ පරම්පරාවට ජීවිතයක් නෑ.
සමහර කාලවලට මට ආරාධනා ලැබෙනවා ආදිවාසීන් 25ක් අරං අරහෙට මෙහාට එන්න කියලා. මමත් ඒ අය අරගෙන යනවා. බොහොම ලස්සනට අපි සැම පිළි ගැනීමට ලක් කරනවා ඒ අය. ඒ අයගේ වැඩෙත් ඉතා සාර්ථකව කරගන්නවා. හැබැයි අපි නැවත ගමට ආවාට පස්සේ අපි ගැන කිසිදු සොයා බැලිල්ලක් නෑ. අපි ගැන නැවත මතකයක් ඒ කිසිවෙකුටවත් නෑ. නැවතත් කවද‍ාහරි පෙර පරිදි අපේ පරපුරේ අය මොනවා හරි උත්සවයකට ඕනෑ වුණොත් පමණයි අපිව මතක් වෙන්නේ. මම මේකට කියන්නේ “පෙරහරේ ගෙනියන අලි වගේ ” කියලා. පෙර හර ඉවර වෙලා අර රෙදි පිළි ගැලවුවාම ඒ අලි නිකම්ම අලි විතරයි. පෙරහරේ ගෙනියනකොට නම් ලයිට් දාලා ලස්සනට අන්දලා අරගෙන යනවා. අන්න ඒ තැනට අපේ පරම්පරාව පත් වෙලා තියෙනවා දැන්. මම මේ පරපුර වෙනුවෙන් මහා විශාල කාර්යභාරයන් රැසක් සිද්ධකරලා තියෙනවා.
පසුගිය ආණ්ඩුව තිබ්බ කාලයේ මම පාර්ලිමේන්තුවට යෝජනාවක් ගෙනාවා, ආදිවාසී පරම්පාරව වෙනුවෙන් අලුතෙන් නීති රීති වෙනස් කරලා, අලුතෙන් පනතක් හදලා ආදිවාසී පරම්පරාවේ අයිතිවාසිකම් ආරක්ෂා කරලා දෙන්න කියලා. ඇත්ත වශයෙන්ම ඒ ගැන සාකච්ඡා සිද්ධ කරලා නීතිපති දෙපාර්තමේන්තුවටත් යවලා හැම වැඩක්ම කරලා ඉවර වෙද්දී ඒ තිබ්බ ආණ්ඩුව වෙනස් වුණා. ඉන්පස්සේ වත්මන් ආණ්ඩුවේ අග්‍රාමාත්‍යතුමිය හමුවෙලා මේ පනත ගැන මම කතා කළා. අග්‍රාමාත්‍යතුමිය මට පොරොන්දුවකුත් දුන්නා මාස 03ක් ඇතුළත නිමා කරලා දෙනවා කියලා. හැබැයි දැන් මාස 06ක් ගතවෙලා තියෙනවා. තාම ඒ ගැන මොනවත් වෙලා නෑ.
ඇත්තටම මට පුදුම සතුටක් තියෙන්නේ, අද දවස ලංකා ඉතිහාසයේ මේ රටේ ජනාධිපතිවරයෙක් මේ කැලෑවට ඇවිත් මේ උත්සවයට සහභාගිවන ප්‍රථම අවස්ථාව මේක වීම ගැන. මම හිතනවා මේ තැන ඇත්තටම ලෝකෙටම ආදර්ශයක් ගෙන එන සිදුවීමක් වෙයි කියලා. මේක හරිම වැදගත්. ඒ වගේම මම විශ්වාස කරනවා අපේ පරම්පරාවටත් ඉදිරි කාලයේ යම් හෝ යහපතක් සිද්ධවෙයි කියලා මගේ හිතේ තියෙනවා. හිටපු ආණ්ඩුවෙන් හේනානිගල ආදිවාසී ගම්මානයේ කෞතුකාගාරයක් හැදුවා. මේ වන විට ඒක වවුලන් රජ කරන තැනක් බවට පත්වෙලා තියෙනවා. 2026 අවුරුද්දේ ඒ තැන වැඩි දියුණු තත්ත්වයට පත් කරලා ඒ තැනේදී නැවතත් මේ විදියට අපි සැම හමුවෙලා කතාබහ කරලා වැඩ කරන්න ශක්තිය, ධෛර්යය ලැබේවා කියා මම ප්‍රාර්ථනා කරනවා.
අතිගරු ජනාධිපතිතුමන් ඇතුළු මේ මැති ඇමැතිවරුන් සැමට මම අදහන කළුබණ්ඩාර දෙවියන්ගේ ඇතුළු කන්දේ දෙවියන්ගේ පිහිට ආරක්ෂාව ලැබේවා “ යැයි ප්‍රකාශ කර සිටියහ.
බුද්ධශාසන ආගමික කටයුතු අමාත්‍ය ආචාර්ය හිනිදුම සුනිල් සෙනෙවි මහතා සභාව ආමන්ත්‍රණය කරමින්,
“ මිනිසුන් හැටියට ගත්තාම අප සියලු දෙනාගේම අතීත උරුමය, අපේ තියෙන සමානකම් ගැන, පරිසරය සොබාදහම සමඟ ජීවත්වන හිතෛෂී ප්‍රවේශය ගැන, රජය එබඳු ජනප්‍රජාවක් ගැන කල්පනා කරන්නට ඕන ප්‍රවේශය කුමක්ද කියන එක ගැන ඔබතුමා දක්වපු අදහස් මං හිතන්නේ අපේ විශේෂ ඇගයීමට ගෞරවයට පාත්‍ර විය යුතුයි.
ලෝක ආදිවාසී දිනය යෙදී තිබෙන්නේ අද එහෙම නැත්නම් අගෝස්තු 09 දිනට. 1982 වසරේ ඉඳලා ඇතිවුණු කතාබහක් නිසා ඇත්තටම 1984 ඉඳලා තමයි නිවැරදිව ඒ තීරණය ගත්තේ. ඒකත් ගත්තෙ එක්සත් ජාතීන්ගේ මැදිහත්වීමෙන්. අගෝස්තු 09 ජාත්‍යන්තර වශයෙන් මේ ජගත් ආදිවාසී දිනය හැටියට සැමරෙන්නේ එහි ප්‍රතිඵලයක් විදිහටයි.
මම පරීක්ෂා කරලා බැලුවා ඊයේ තොරතුරු කිහිපයක්. ලෝක ආදිවාසීන් ප්‍රමාණය ගත්තොත් මිලියන 476ක විතර ප්‍රමාණයක් රටවල් 90ක් නියෝජනය කෙරෙන භාෂා 7000කට අධික ප්‍රමාණයක් කතා කරන, අදහස් පළ කරන සංස්කෘතීන් 5000ක් ඉක්මවා ගියපු සංස්කෘතික විවිධත්වයක් ගැබ්වුණු විෂයක් මේක. ලෝක ජනගහනයෙන් 06% ක පමණ නියෝජනයක් මේ ගෞරවනීය ජනප්‍රජාවට හිමිවෙනවා.
දඹාන ප්‍රමුඛ ශ්‍රී ලංකාවේ අපේ ආදිවාසීන්ගේ උරුමය සහ අතීත ප්‍රවේණි පිළිබඳව කරපු පර්යේෂණ රාශියක් තිබෙනවා. වෛද්‍ය විද්‍යාත්මක, කායික විද්‍යාත්මක පැත්තෙන් ගත්තත්, පුරාවිද්‍යා ඉතිහාසය පැත්තෙන් ගත්තත්, ඒ වගේම මේ ඇත්තන්ගේ භාෂා භාවිතයන් පිළිබඳව කරපු වාග් විද්‍යාත්මක පර්යේෂණ පැත්තෙන් ගත්තත් ඔබ සියලු දෙනාගේ මතකයට නැ‍ෙඟනවා ඇති. 1911 වගේ අවුරුද්දක, මීට අවුරුදු සීයකට එපිට පළ කරන ලද විශේෂ ග්‍රන්ථයක් තමයි සී. ජේ. සෙලිග්මාන් සහ බ්‍රෙන්ඩා සෙලිග්මාන් කියන යුවළ පළ කරපු සුප්‍රකට පර්යේෂණ ග්‍රන්ථය. එතනින් පස්සේ ආචාර්ය නන්ද දේව විජේසේකර, ඒ වගේම පී. බී. මීගස්කුඹුර වගේ හුඟක් අය වැදි භාෂාව පැත්තට නැඹුරු වුණා. ඒ පිළිබඳ පර්යේෂණ රාශියක් සිදු වූ අතර මේ ගෞරවනීය පුරවැසියන් ගැන ග්‍රන්ථ රැසක් පළ කරලා තිබෙනවා.
අද වන්නිලා ඇත්තන්, විශේෂයෙන් සඳහන් කළා අප සියලු දෙනාගේ රුධිරය රතුපාටයි ඇට, මස්, ලේ, නහර සමානයි අපේ සිතුම් පැතුම් එක වගේ නේද කියන එක. ඒක මම හිතන්නේ අපේ රජයේ ගරු ජනාධිපතිතුමා නිතර සඳහන් කරන, ශ්‍රී ලාංකේය ජාතිය දැන් අප ගොඩනැඟිය යුතුයි කියන අපේ අභිප්‍රායට පුදුමාකාර තල්ලුවක් වටිනාකමක් පිළිගැනීමක් ඇති කරන අදහසක්. මේ සභාවේ ඉන්නවා ඌවේ අපේ මහා සාහිත්‍යවේදී නිශ්ශංක විජයමාන්න සොහොයුරා. නිශ්ශංක විජයමාන්නයන් පළ කළා ජනාධිපතිතුමනි, කඳඅරනී කියලා නවකතාවක්. කඳඅරණී කියන්නේ මී පැණි. කඳඅරණිගේ දිය තන ඒ කියන්නේ මී පැණි. ඒ නවකතාවේ ඔහු පරීක්ෂා කරනවා, අපි වග වාසගම් ගොඩකට බෙදිලා වෙන වෙනම අනන්‍යතා එක්ක කටයුතු කළත් ඔබේ නවකතාවේදී සාහිත්‍යාත්මකවත් ඉතිහාසයට පුරාවිද්‍යාවට සම්බන්ධයක් හදාගෙනත් පරීක්ෂා කරනවා. බෙදී ගිහිල්ලා හිටියට අපේ සමාරම්භය එකම ඥාති සනුහරයක් හැටියට එකට තිබුණු හැටි. ඔබ මේ පරිසරය දැක්කා මේ ඓතිහාසික භූමියක් වරිග සභාව රැස්වෙන විශිෂ්ට භූමිය. ඊයේ රාත්‍රියත් නායක ඇත්තෝ මෙතන රැස්වුණා ඔබතුමාගේ නායකකාරකාදීන් එක්ක. සොබාදහමත් එක්ක තියෙන තැනක්. ග්‍රීසියේ මහාචතුරස්‍රවල මිනිසුන් එකතු වෙලා, නායකයින් එකතුවෙලා අදහස් පළ කර ගත්තු තැන් අපට මතක් වෙනවා. මෙතන තිබෙන විද්‍යුත් මාධ්‍ය උපකරණ සහ මෙවලම් හැරුණහම මේ හැමදේම කැඩෙන බිඳින දිරා යන පොළොවට එකතුවෙන දේවල්. එනිසා මේ ජීවිතවලින් මොනතරම් විද්‍යාවටත් ඉගෙන ගන්න තියෙනවාද කියලා හිතෙනවා.
ඉතින් මට මතකයි මීට අවුරුදු විසි දෙකකට විසිතුනකට එපිට සබරගමුවේ විශ්ව විද්‍යාලයේදී මා වැඩ කරන කාලේ නිතර දෙවේලේ නායකඇත්තන් මුණගැහෙන්න එන්නේ, අපි සබරගම විශ්වවිද්‍යාලයේ ආදිවාසී ජන අධ්‍යයන කේන්ද්‍රයක් පටන් ගත්තා. ආදිවාසී අධ්‍යයනය පිළිබඳ ආචාර්ය උපාධි පිරිනැමෙන ආයතනයක් ඒක. එතන අධ්‍යයන කටයුතු කරපු මහාධිකරණ විනිසුරුවරයෙක් සුමුදු ප්‍රේමචන්ද්‍ර මහත්මයා. ආදිවාසී නීතිය පිළිබඳ එයාගේ ආචාර්ය උපාධිය කළා. අපේ තියෙන නීති පද්ධතිය ඇතුළේ අසාධාරණයට ලක්වෙලා මං හිතන්නේ සෙනෙවිරත්න ඇත්තෝ බන්ධනාගාරයක හිටපු සිදුවීම් ගොඩක් මුල් කරගෙන එතුමා මැදිහත් වුණා, මේ නීතිය පිළිබඳව ප්‍රතිසංස්කරණ කරන්න.
අපේ නායක ඇත්තෝ සිහිපත් කරපු පරිදි ඔබතුමා කණ්ඩායමක් සමඟ පාර්ලිමේන්තුවට ඇවිල්ලා අගමැතිතුමිය ඇතුළු අප සියලු දෙනා මුණගැසිලා, ඒ ආදිවාසී පනත, නිර්දේශ පිළිබඳ වාර්තාව අපට දුන්නා. මං හිතන්නේ කාලයක් තිස්සේ ගත්ත උත්සාහයක් ඔබතුමා කිව්වා වගේම. ජනාධිපතිතුමනි, ඒ නිර්දේශ අද වෙනකොට නීතිපති දෙපාර්තමේන්තුවට කෙටුම්පත් ආයතනයට යොමු කරලා, සමන්ත ඇමැතිතුමත් මමත් අද ඒ ගැන සාකච්ඡා කළා පරිසර නියෝජ්‍ය අමාත්‍යතුමා සමඟ. එතුමා මෙතන ඉන්නවා. ඒ සම්බන්ධ නීති කෙටුම්පත් අංශය මේ වෙනකොට උනන්දුවෙන් ඒ ගැන වැඩ කරනවා. ඒක ඉතාම සංකීර්ණව ඒ වගේම ප්‍රවේශමෙන් කළ යුතු කටයුත්තක්. මොකද මේ ජීවිත වගේම සොබාදහම, ප්‍රඥප්ති, ජාත්‍යන්තර වශයෙන් අප රටක් හැටියට එකතුවෙලා ඉන්න ප්‍රඥප්ති රාශියක් සලකලා බලලා ඉතාම සාධාරණ හා විචක්ෂණ විදියට ඒ පනත සකස් කර ගත යුතුව තිබෙනවා. ඉතාම ඉක්මනින් ඒ කටයුතු සිදු වෙමින් තියෙනවා. ඒ කටයුතු තවදුරටත් ඉක්මන් කරලා අපි සාර්ථක කරගන්න ඕන බව මම කියනවා.
බුද්ධශාසන ආගමික කටයුතු අමාත්‍ය ආචාර්ය හිනිදුම සුනිල් සෙනෙවි මහතා, වැවිලි සහ ප්‍රජා යටිතල පහසුකම් අමාත්‍ය සමන්ත විද්‍යාරත්න මහතා, සංචාරක නියෝජ්‍ය අමාත්‍ය මහාචාර්ය රුවන් රණසිංහ මහතා, පරිසර නියෝජ්‍ය අමාත්‍ය ඇන්ටන් ජයකොඩි මහතා, වැඩබලන පොලිස්පති ප්‍රියන්ත වීරසූරිය මහතා, ජාතික ජන බලවේගයේ බදුල්ල දිස්ත්‍රික් පාර්ලිමේන්තු මන්ත්‍රි සුදත් බලගල්ල මහතා, බදුල්ල දිස්ත්‍රික් පාර්ලිමේන්තු මන්ත්‍රි දිනිඳු සමන් මහතා, මහියංගණ ප්‍රාදේශීය සභා සභාපති නීතිඥ උපේක්ෂා විජේතුංග මහත්මිය, බදුල්ල දිස්ත්‍රික් ලේකම් ප්‍රභාත් අබේවර්ධන මහතා, මහියංගණ ප්‍රාදේශීය ලේකම් ඩබ්ලිව්. එම්. විමංස සෙනෙවිරත්න මහතා, සහකාර ප්‍රාදේශීය ලේකම් අශානි විජේසේකර මහත්මිය ඇතුළු අමාත්‍යාංශ නිලධාරීන් නිලධාරිනියන් හා රාජ්‍ය නිලධාරීන්, ආදිවාසීන්, ගම්වාසීන් රැසක් උත්සව සභාව සඳහා සහභාගි වී සිටියහ.
@දිනමිණ
