ඉරාන යුද්ධයට මේ වන විට ඩොලර් බිලියන 37.5ක් වැයකරලා – පෙන්ටගනය කියයි

ඉරානය සමඟ පවතින හමුදාමය ගැටුම් වෙනුවෙන් අමෙරිකා එක්සත් ජනපදය මෙතෙක් අමෙරිකානු ඩොලර් බිලියන 37.5ක් (රාත්තල් බිලියන 28ක්) පමණ වැයකර ඇති බව අමෙරිකානු ආරක්ෂක ලේකම් පීට් හෙග්සෙත් ප්‍රකාශ කර තිබේ. මෙය ඉකුත් මැයි මාසයේ කරන ලද තක්සේරුවට වඩා ඩොලර් බිලියන 8ක පමණ සැලකිය යුතු වැඩිවීමකි. සෙනෙට් සභා අරමුදල් කාරක සභාව හමුවේ කරුණු දක්වමින් ආරක්ෂක ලේකම්වරයා පෙන්වා දුන්නේ, පෙන්ටගනයේ ඉදිරි මෙහෙයුම් සඳහා තවත් ඩොලර් බිලියන 87ක අතිරේක ප්‍රතිපාදන වහාම අනුමත කිරීමට මන්ත්‍රීවරුන් පියවර ගත යුතු බවයි. එම ඉල්ලූ මුදලෙන් ඩොලර් බිලියන 67ක්ම මැදපෙරදිග පවතින මෙහෙයුම් වෙනුවෙන් වෙන් කිරීමට නියමිතය.

පසුගිය සතියේ අමෙරිකාව සහ ඉරානය අතර ගැටුම් නැවත ආරම්භ වීමෙන් සහ එම කලාපයේදී අමෙරිකානු සෙබළුන් තිදෙනෙකු ජීවිතක්ෂයට පත්වීමෙන් පසුව, හෙග්සෙත් කැපිටොල් හිල් හි සෙනෙට් කාරක සභාව හමුවේ පෙනී සිටි පළමු අවස්ථාව මෙය විය. කෙසේ වෙතත්, මෙම සාකච්ඡාව අතරතුර යුද විරෝධී විරෝධතාකරුවන්ගෙන් කිහිප වරක්ම බාධා එල්ල වූ අතර, අවසානයේ එය ආරක්ෂක ලේකම්වරයා සහ ඩිමොක්‍රටික් සෙනෙට් සභිකයෙකු අතර ඇති වූ උණුසුම් වචන හුවමාරුවකින් කෙළවර විය. ඉදිරි මුදල් වර්ෂය වෙනුවෙන් පෙන්ටගනය සඳහා ඩොලර් ට්‍රිලියන 1.5ක මුදලක් වෙන්කරන ලෙස ධවල මන්දිරය මීට පෙර කොංග්‍රස් මණ්ඩලයෙන් ඉල්ලා තිබූ අතර, එය අනුමත වුවහොත් නූතන ඉතිහාසයේ අමෙරිකාව හමුදාව වෙනුවෙන් වෙන්කරන ඉහළම මුදල බවට පත්වනු ඇත.

කෙසේ වෙතත්, සෙනෙට් කාරක සභාවේ ජ්‍යෙෂ්ඨ ඩිමොක්‍රටික් සෙනෙට් සභික පැටි මුරේ ඇතුළු ප්‍රජාතන්ත්‍රවාදී මන්ත්‍රීවරුන් මෙම විශාල මුදල් ඉල්ලීම පිළිබඳව ප්‍රශ්න කරමින් කියා සිටියේ එය සාධාරණීකරණය කළ නොහැකි බවයි. මීට අමතරව, හෝමූස් සමුද්‍ර සන්ධිය සහ මැදපෙරදිග කලාපයේ උපායමාර්ගික ඉලක්ක වෙත අමෙරිකාව අඛණ්ඩව 11 වන දිනටත් ප්‍රහාර එල්ල කරමින් සිටින අතර, ඉරානය ද අමෙරිකානු සහ පක්ෂ බලඇණි වෙත ප්‍රති ප්‍රහාර එල්ල කරමින් සිටියි.

@දිනමිණ