ෂී ජින්පින් එනතුරු ට්‍රම්ප් ගුවන්තොටුපළේ බලාසිටී

සාමාන්‍යයෙන් ඇමරිකානු ජනාධිපතිවරයෙක් විදේශීය නායකයෙකු පිළිගැනීමට ගුවන් තොටුපළට යන්නේ ඉතා කලාතුරකිනි. නමුත් ඩොනල්ඩ් ට්‍රම්ප් සැප්තැම්බර් 23 වන බදාදා මෙම සම්ප්‍රදාය බිඳ දැමුවේ වොෂින්ටන් ඩී.සී. අසල ඇන්ඩෲස් ගුවන් හමුදා කඳවුරේ තම ගුවන් යානයෙන් බැස එන චීන ජනාධිපති ෂී ජින්පින් එනතුරු බලා සිටීමෙනි. එක්සත් ජාතීන්ගේ සැසිය ඇමතීමට එන ට්‍රම්ප් හා ෂී ජින් පින් හමුව වඩාත් කතා බහට ලක්වන හමුවක් වූ බව විදේශ මාධ්‍ය වාර්තා කර සිටි. මෙම හමුවේදී කෘතීම බුද්ධිය, ඉරාන යුද්ධය, ජාත්‍යන්තර වෙළඳාම, යන කරුණු රාජ්‍ය නායකයින් දෙදනා අතර කතා බහට ලක් වීමට නියමිතය.

මෙම පිළිගැනීමේ තවත් අරමුණ වූයේ වොෂින්ටනය සහ බීජිං අතර වෙළඳ සටන් විරාමය දීර්ඝ කිරීම බව මාධ්‍ය තව දුරටත් පෙන්වා දෙයි.

“අප රටවල් දෙක ප්‍රතිවාදීන්ට වඩා හවුල්කරුවන් බවට පත් විය යුතුයි. චීන සහ ඇමරිකානු ජනතාව දිගු කලක් මිත්‍රශීලී හුවමාරු භුක්ති විඳි අතර අපගේ අවශ්‍යතා සමීපව බැඳී ඇත” යයි චීන ජනාධිපති ෂී ජින්පින් නිල ෂින්හුවා ප්‍රවෘත්ති ඒජන්සිය හට පැවසූ බව එහි වාර්තාවක සඳහන් කර සිටි.

මෙම ප්‍රකාශ පැමිණෙන්නේ නායකයින් දෙදෙනා අතර බෙහෙවින් අපේක්ෂිත සාකච්ඡාවලට පැය කිහිපයකට පෙරය. මෙම සාකච්ඡා තුල වෙළඳාම, තාක්ෂණික තරඟකාරිත්වය – විශේෂයෙන් කෘතිම බුද්ධි ක්ෂේත්‍රයේ – සහ ඉරානය සඳහා බීජිං සහාය ආවරණය කරනු ඇතැයි අපේක්ෂා කෙරේ.

“අප රාජ්‍යයන් දෙක අතර ද්විපාර්ශ්වික සබඳතා සහ නව ගෝලීය තත්ත්වයන් ඇතුළු ප්‍රධාන කරුණු පිළිබඳව ජනාධිපති ට්‍රම්ප් සමඟ ගැඹුරු සාකච්ඡා පැවැත්වීමට මා බලාපොරොත්තු වනවා. ස්ථාවර සම්බන්ධතාවයක්, සාධාරණ සීමාවන් තුළ තරඟකාරිත්වයක්, කළමනාකරණය කළ හැකි වෙනස්කම් සහ සාමකාමී දැක්මක් ඇති කර ගැනීම සඳහා දෙරට එක්ව කටයුතු කළ යුතුයි ” යයි චීන ජනාධිපතිවරයා තවදුරටත් අවධාරණය කර සිටියේය.

චීන ජනාධිපතිවරයා එක්සත් ජනපදයට පැමිණියේ වසර දහයකට වැඩි කාලයකට පසුව වන අතර පසුගිය වසරේ ඩොනල්ඩ් ට්‍රම්ප් නැවත බලයට පත්වීමෙන් පසු ඔහු සමඟ සිදුකරන ඔහුගේ තුන්වන හමුව මෙය වේ. වසර අවසන් වීමට පෙර චීනයේ APEC සමුළුවේදී සහ ෆ්ලොරිඩාවේ G20 සමුළුවේදී තවත් රැස්වීම් දෙකක් පැවැත් වීමට නියමිතව ඇත.

ඇමරිකානු ජනාධිපතිවරයා චීන ජනාධිපති වරයා වෙනුවෙන් දැවැන්ත පිළිගැනීමේ උත්සවයක් සංවිධානය කර තිබූ අතර, එය රතු පලසක් සහ සම්පූර්ණ නිල ඇඳුමින් සැරසුණු හමුදා නිලධාරීන් සමඟ සම්පූර්ණ කර තිබිණි. නමුත් ඇන්ඩෲස් ගුවන් හමුදා කඳවුරට ඉහළින් පියාසර කරන ලද මිලිටරි ගුවන් යානයක බිහිරි ශබ්දය හේතුවෙන් හදිසියේම ඇමරිකානු ජාතික ගීය යට යාම ඇමරිකානු ජනාධිපතිවරයාට විශේෂයෙන් බාධා කරන බවක් පෙනෙන්නට තිබුණද, ඔහුගේ චීන සහකරු එහිදී ඇමරිකානු ජාතික ගීයට නොසැලී ගෞරව කල බව වාර්තා වේ.

ධවල මන්දිරයේදී ඩොනල්ඩ් ට්‍රම්ප්ගෙන් ලැබුණු අතිවිශිෂ්ට පිළිගැනීමක් ලැබීමෙන් පසු, සැප්තැම්බර් 24 බ්‍රහස්පතින්දා ඇමරිකා එක්සත් ජනපදය සහ චීනය ඔවුන්ගේ එදිරිවාදිකම් වගකීමෙන් කළමනාකරණය කිරීමට තීරණය කර ඇත. විශේෂයෙන් කෘතිම බුද්ධි ක්ෂේත්‍රය තුළ බීජිං සහ වොෂින්ටනයට IA සංවර්ධනය කිරීමේ “හැකියාව සහ වගකීම” යන දෙකම ඇති අතර එය “මානව පාලනය” යටතේ තබා ගනිමින් එය “ජනතාවගේ යහපැවැත්මට සේවය කිරීමට දෙරට අතර එකඟතා ඇති කර ගැනීමට අපේක්ෂා කරයි.

මේ අතර මාධ්‍ය වෙත අදහස් දක්වමින්, ඩොනල්ඩ් ට්‍රම්ප් කියා සිටියේ තමා හා චීනය අතර පැවැති සාකච්චා වලදී දෙරට අතර සැබෑ ශ්‍රේෂ්ඨ මිත්‍රත්වයක්” ගොඩනඟා ගත් බවත්, “අන්‍යෝන්‍ය ගෞරවය සහ අපගේ ජනතාවගේ වැදගත් අවශ්‍යතා මත එම රාජතාන්ත්‍රික සම්බන්ධතා ප්‍රවර්ධනය කර ගැනීමට අපේක්ෂා කරනු ලබන බවත්ය.

චීන ජනාධිපති වරයාගේ රාජ්‍ය සංචාරය සැප්තැම්බර් 24 දා සවස ජනාධිපති ආර්යා මෙලනියා ට්‍රම්ප් විසින් පවත්වනු ලබන අතිවිශිෂ්ට රාත්‍රී භෝජන සංග්‍රහයකින් අවසන් වීමට නියමිතය. ඒ සඳහා ආරාධනා ලැබූ අමුත්තන් අතර OpenAI ප්‍රධාන විධායක නිලධාරී සෑම් ඇල්ට්මන් සහ එලොන් මස්ක් (ටෙස්ලා, ස්පේස්එක්ස් සහ එක්ස්) ඇතුළු ඇමරිකානු තාක්ෂණයේ ප්‍රකටයෝ සහබාගි වී සිටි අතර ෂී ජින්පින් කිසිදු ව්‍යාපාරික නායකයෙකු ඒ සඳහා රැගෙන ගොස් නොතිබුණු බව මාධ්‍ය වාර්තා කර සිටි.

අපේක්ෂා කළ පරිදි, එක්සත් ජනපදය සහ චීනය ජනවාරි 10 වන දින දක්වා ඔවුන්ගේ වෙළඳ සටන් විරාමය දීර්ඝ කිරීමට තීරණය කර ඇති බව එක්සත් ජනපද භාණ්ඩාගාර ලේකම් ස්කොට් බෙසන්ට් මේ අතර මාධ්‍ය වෙත පැවසීය.

කෙසේ වෙතත්, මෙම සටන් විරාමය ආර්ථික, තාක්‍ෂණික, මිලිටරි සහ උපායමාර්ගික යන බහුවිධ එදිරිවාදිකම්වල නියැලී සිටින සුපිරි බලවතුන් දෙදෙනා අතර ඇති සියලුම ආරවුල් විසඳා නැති බව දේශපාලන නිරීක්ෂකයින් පෙන්වා දෙයි.

ඉරාන සමග ගැටුමෙන් එක්සත් ජනපදය දුර්වල වී ඇති බව චීනය විශ්වාස කරන අතර, මැද පෙරදිග, යුරෝපය සහ ආසියා-පැසිෆික් කලාපයේ එක්සත් ජනපද යුධ හා ආර්ථික සන්ධානවල සමහර දුර්වලතා හෙළි කර ගනිමින් යුරෝපා සංගමය, ඉන්දියාව, මැද පෙරදිග, රුසියාව හා කැනඩාව සමග වෙළඳ සම්බන්ධතා ප්‍රවර්ධනය කර ගෙන ඇත. එහි දී චීනය ශක්තිමත් වී එක්සත් ජනපදයේ ප්‍රතිරූපයට දැඩි ලෙස හානි සිදුවී ඇති අතර, මෙය චීනයට යම් ආකාරයකින් ප්‍රතිලාභ ලබා දී චීනය වඩාත් වගකිවයුතු සහ පුරෝකථනය කළ හැකි හවුල්කරුවෙකු බවට පත් වී ඇති බව ඔවුන් තව දුරටත් පෙන්වා දෙයි.

ජීවන වියදම ඉහළ යාම සහ මැද පෙරදිග වැඩි වැඩියෙන් ජනප්‍රිය නොවන ගැටුම හේතුවෙන් අනුමත ශ්‍රේණිගත කිරීම් පහත වැටෙමින් පවතින රිපබ්ලිකන් ජනාධිපතිවරයා, නොවැම්බර් මාසයේ මධ්‍ය කාලීන මැතිවරණයෙන් පසු කොංග්‍රසයේ පාලනය අහිමි වීමේ අවදානමක් ද ඇත.

එසේම පෙබරවාරි මාසයේ පවත්වන ලද ඇමරිකාවේ පොලිටිකෝ මත විමසුමකට අනුව, කැනඩාව, ජර්මනිය, ප්‍රංශය සහ එක්සත් රාජධානිය යන රටවල මහජන මතයේ විශාල කොටසක් චීනය එක්සත් ජනපදයට වඩා විශ්වාසදායක සහකරුවෙකු ලෙස සලකති. කැනඩාවේ, ප්‍රතිචාර දැක්වූවන්ගෙන් 57% ක් එක්සත් ජනපදයට වඩා චීනය මත යැපීම වඩා හොඳ යැයි විශ්වාස කරන අතර, එක්සත් රාජධානියේ 42% ක්, ජර්මනියේ 40% ක් සහ ප්‍රංශයේ 34% ක් ලෙස දැක්වේ.

“චීනයට සාමය සහ තෙල් අවශ්‍යයි, ට්‍රම්ප්ට අවශ්‍ය වන්නේ ඉක්මන් ලාභය සහ දුර්ලභ පාංශු ඛනිජ. මෙම යෝධයන් දෙදෙනා යුද්ධයක යෙදී නැත, ඔවුන්ට ඔවුන්ගේ පැවත්ම වෙනුවෙන් තවමත් එකිනෙකා අවශ්‍ය වේ” යයි ප්‍රංශ BFM මාධ්‍ය වේදියෙක් මේ අතර පෙන්වා දෙයි.

@Lankatruth.com