ඥානසාර හිමි ජනාධිපති සමාවට සිද්ධ වුනේ මේකයි – මෛත්‍රීපාල සිරිසේන
ගලගොඩඅත්තේ ඥානසාර හිමියන්ට ජනාධිපති සමාව දීමට අදාළ ලිපිලේඛනවලට අත්සන් ලබා ගැනීමේදී තමා නොමඟ යැවීමක් සිදු කර ඇති බව හිටපු ජනාධිපති මෛත්‍රීපාල සිරිසේන මහතා පවසයි.
මේ නිසා ගලගොඩඅත්තේ ඥානසාර හිමියන්ට යළි බන්ධනාගාරගත වීමට සිදුව ඇති බවද තමන් ජනාධිපති ධුරය දරන සමයේ ජනාධිපති කාර්යාලයේ නීති අංශය භාරව සිටි ජ්‍යෙෂ්ඨ අතිරේක ලේකම්වරිය අතින් තාක්ෂණික දෝෂයක් හා වරදක් සිදුව ඇති බවද හිටපු ජනාධිපතිවරයා නිවේදනයක් නිකුත් කරමින් කියා සිටියි.
එවකට සිය නිලධාරීන් සිදු කළ වරදට ගෞරවනීය මහා සංඝරත්නයෙන් සමාව ඉල්ලා සිටින බවත් සිය නිවේදනයේ සඳහන් කර තිබේ. ගලගොඩඅත්තේ ඥානසාර හිමියන්ට සමාව දීමට නම් උන්වහන්සේට අදාළව පැවැති නඩු දෙකම අධිකරණ හා බන්ධනාගාර අමාත්‍යාංශයට යවා අනුමැතිය ලබාගත යුතු වුවත්, අමාත්‍යාංශයේ අනුමැතිය නොමැතිව සිය අත්සන පමණක් ලබාගැනීම මඟින් තමා නොමඟ යැවීමක් සිදුව ඇත්දැයි හෙතෙම එම නිවේදනයේ සඳහන් කර තිබේ.
ගලගොඩඅත්තේ ඥානසාර හිමි නැවත බන්ධනාගාරගත කිරීමේදී එම නඩු තීන්දුව දුන් ගරු අධිකරණයේ තීන්දු ප්‍රකාශයේ සටහන් වී ඇත්තේ උන්වහන්සේ නිදහස් කිරීමට ගරු අධිකරණයට සිදුවූ කරුණු අතර ජනාධිපති කාර්යාලයෙන් ගරු අධිකරණයට ඉදිරිපත් කළ ලිපි ලේඛනවල තාක්ෂණික දෝෂයක් සිදුවී ඇති බවයි. ගරු අධිකරණයේ තීරණය නිවැරදි අතර එම තීන්දුවට ‘මා ගරු කරමි’ යනුවෙන් ද එම නිවේදනයේ සඳහන් කර තිබේ.
මෙම චූදිත පූජ්‍ය ගලගොඩඅත්තේ ඥානසාර හිමියන්ට විරුද්ධව නඩු දෙකක් තිබී ඇත. එනම් හෝමාගම මහේස්ත්‍රාත් අධිකරණයේ B 7417/10 නඩුව අනුව අධිකරණයට බාධා කිරීමත්, ආණ්ඩුක්‍රම ව්‍යවස්ථාවේ 105 ව්‍යවස්ථාව යටතේ අධිකරණයට අපහාස කිරීමත්ය. අනෙක් නඩුව හෝමාගම මහේස්ත්‍රාත් අධිකරණයේම 40042 නඩුවයි.
‘ඉහත නඩු දෙකම පූජ්‍ය ගලගොඩඅත්තේ ඥානසාර හිමියන්ට සමාව දීම සඳහා අධිකරණ හා බන්ධනාගාර අමාත්‍යාංශයට යවා අනුමැතිය ගත යුතු බව ජනාධිපති කාර්යාලයේ සේවය කළ නීති අංශය භාර අතිරේක ජ්‍යෙෂ්ඨ ලේකම්වරිය තමා වෙත දන්වා සිටියද අදාළ එම ඉල්ලීම අධිකරණ හා බන්ධනාගාර අමාත්‍යාංශයට යවා නැත. ඒ අනුව ඉහත කී අමාත්‍යාංශයේ අනුමැතිය නොමැතිව මාගේ අත්සන පමණක් ලබාගෙන ඇත. එය තමා නොමඟ යැවීමකි’ යැයි ද හිටපු ජනාධිපතිවරයා සිය නිවේදනයේ සඳහන් කර තිබේ.
ඉහත හේතු මත පාක්‍යසෝති සරවනමුත්තු මහතාගේ රාජ්‍ය නොවන සංවිධානයක් මඟින් සන්ධ්‍යා එක්නැලිගොඩ මහත්මිය පැමිණිල්ලක් කර අධිකරණයට ඉදිරිපත් කර ඇති නඩුවක් මඟින් මෙම තීරණය ලැබී ඇත. මම ජනාධිපති ධුරය දරන කාලයේ මාගේ නීති අංශය භාර අතිරේක ජ්‍යෙෂ්ඨ ලේකම්වරිය මඟින් සිදුවී ඇති වරද අනුව පූජ්‍ය ගලගොඩඅත්තේ ඥානසාර හිමිට නැවත වරක් සිරගත වීමට සිදුවී ඇත. මෙම සිද්ධිය මාගේ නිලධාරීන් එවකට සිදු කළත් ගෞරවනීය මහා සංඝරත්න‍ෙයන් සිදුවී ඇති වරදට මා සමාව ඉල්ලා සිටිමි’ යැයි ද දක්වා තිබේ.
‘මෙම තොරතුරු මා විසින් අන්තර්ජාලයෙන් ලබාගත් අධිකරණ තීන්දුවේ පිටපතක් අධ්‍යයනය කිරීමෙන් පසු ලබාගත් බව කාරුණිකව දන්වා සිටිමි. රටේ ගෞරවනීය මහා සංඝරත්නය, මාධ්‍යවේදීන් සහ බොහෝ පිරිස් මාගෙන් මෙම නඩුවේ තාක්ෂණික දෝෂය කුමක්ද යන්න විමසන බැවින් මෙම නිවේදනය නිකුත් කිරීමට සිදුවූ බව කෘතඥතාපූර්වකව දන්වා සිටිමි’ යැයි ද සිය නිවේදනයේ වැඩිදුරටත් සඳහන් කර තිබේ.
@දිනමිණ
Discover more from cmn.lk
Subscribe to get the latest posts sent to your email.
