ගෝඨාභයගෙන් පැය 03ක් ප්‍රශ්ණ කරයි
හිටපු ජනාධිපති ගෝඨාභය රාජපක්ෂ මහතාගෙන් මධ්‍යම අපරාධ විමර්ශන කාර්යාංශය ඊයේ (09) පැය 3ක පමණ කාලයක් ප්‍රශ්න කර ප්‍රකාශයක් සටහන් කරගෙන තිබේ.
ගෝඨාභය රාජපක්ෂ මහතාගේ පෞද්ගලික ලේකම්වරයා ලෙස කටයුතු කරමින් විශ්‍රාමික ජනාධිපති වැය ශීර්ෂය යටතේත්, ජනාධිපති ලේකම් කාර්යාලයේ විශේෂ ව්‍යාපෘති අධ්‍යක්ෂ ජනරාල් ලෙසත් වැටුප් දෙකක් එකවර ලබාගනිමින් රුපියල් මිලියන 220කට අධික රාජ්‍ය මුදල් අවභාවිත කිරීම සම්බන්ධයෙන් පොදු දේපොළ පනත යටතේ අත්අඩංගුවට ගෙන රක්ෂිත බන්ධනාගාරගත කර සිටින නව ජනතා පෙරමුණේ නායක සුගීෂ්වර බණ්ඩාර මහතා සම්බන්ධයෙන් කෙරෙන විමර්ශනයකට අදාළව මෙම ප්‍රශ්න කිරීම සිදුව ඇත.
ගෝඨාභය රාජපක්ෂ මහතාගෙන් ඒ සම්බන්ධයෙන් මෙයට පෙරද ප්‍රශ්න කර ප්‍රකාශ සටහන් කරගෙන තිබුණි. එහිදී ගෝඨාභය රාජපක්ෂ මහතා විසින් ලබාදී ඇති කටඋත්තරවල පරස්පර තත්ත්වයක් ඇති වී තිබේ. එය අධිකරණයේදී පවා අභියෝගයට ලක්ව ඇත. මේ තත්ත්වය මත ගෝඨාභය රාජපක්ෂ මහතාගෙන් ඊයේ ප්‍රශ්න කරනු ලැබුවේ ඔහු විසින් අවස්ථා දෙකකදී ලබාදී ඇති ප්‍රකාශ දෙකකින් නිවැරදි ප්‍රකාශය කුමක්දැයි තහවුරු කර ගැනීමට බව මධ්‍යම අපරාධ විමර්ශන කාර්යාංශයේ උසස් නිලධාරියෙක් පැවසීය.
උදෑසන 9.00ට පමණ ගෝඨාභය රාජපක්ෂ මහතා නාරාහේන්පිට පිහිටි මධ්‍යම අපරාධ විමර්ශන කාර්යාංශය හමුවේ පෙනී සිටීමෙන් අනතුරුව ප්‍රකාශ සටහන් කරගත් බවද එම නිලධාරියා වැඩිදුරටත් පැවසීය.
@දිනමිණ
Discover more from cmn.lk
Subscribe to get the latest posts sent to your email.
