ඊශ්‍රායල නව පාර්ලිමේන්තුව දිවුරුම් දෙයි – බලය තවමත් අවිනිෂ්චිතයි

ඊශ්‍රායලයේ නව පාර්ලිමේන්තුව දිවුරුම් දීමත් සමඟ නව රජයක් පිහිටුවීම සඳහා දේශපාලන අරගලය වඩාත් උණුසුම් වී තිබේ.

හිටපු හමුදා ප්‍රධානියකු වන විපක්ෂ නායක ගාඩි අයිසෙන්කොට් (Gadi Eisenkot) නව රජයක් පිහිටුවීම සඳහා ජනාධිපතිවරයාගේ ආරාධනය ලබාගෙන ඇති අතර, ඒ සඳහා ඔහුට දින 28ක කාලයක් හිමිව තිබේ. අවශ්‍ය නම් එය තවත් සති දෙකකින් දීර්ඝ කළ හැකිය.

ආසන 120කින් සමන්විත පාර්ලිමේන්තුවේදී අයිසෙන්කොට්ගේ පක්ෂ සන්ධානයට ආසන 48ක් ද, බෙන්ජමින් නෙතන්යාහුගේ සන්ධානයට ආසන 53ක් ද හිමිව තිබේ. ඒ අනුව කිසිදු පාර්ශ්වයකට තනිව බහුතර බලයක් ලබාගැනීමට හැකි වී නොමැත.

මෙහිදී ඊශ්‍රායලයේ අරාබි පක්ෂ දෙකක් ආසන 19ක් දිනාගැනීම විශේෂත්වයකි. එම පක්ෂවල සහාය නව රජයක් පිහිටුවීමේදී තීරණාත්මක විය හැකි නමුත්, ඒ සම්බන්ධයෙන් අයිසෙන්කොට්ගේ සන්ධානය තුළද මතභේද පවතී.

නෙතන්යාහු අරාබි පක්ෂවල සහාය මත පිහිටුවන රජයකට විරෝධය පළ කරමින් ජාතික සමගි රජයක් පිහිටුවීමට යෝජනා කර තිබේ. ඊට ප්‍රතිචාර දක්වමින් අයිසෙන්කොට්, නෙතන්යාහුගේ ප්‍රකාශ විවේචනය කර ඇත.

අල්ට්‍රා-ඕතඩොක්ස් යුදෙව් ප්‍රජාවගේ හමුදා සේවය, අරාබි පක්ෂවල සහාය සහ හමාස් සංවිධානය සම්බන්ධ ප්‍රතිපත්ති නව රජයක් පිහිටුවීමේ ප්‍රධාන බාධක බවට පත්ව තිබේ.

ඒ අනුව ඊශ්‍රායලයේ මීළඟ රජය පිහිටුවන්නේ කුමන පාර්ශ්වයද යන්න පිළිබඳව තවමත් අවිනිශ්චිත තත්ත්වයක් පවතී.

@sinhala.adaderana.lk