ඉරාන නෞකාවක් ඇමරිකාව පැහැරගනී

ඉරානයට ධජය සහිත භාණ්ඩ ප්‍රවාහන නෞකාවක් අමෙරිකානු නාවික හමුදාව විසින් සිය භාරයට ගෙන තිබේ.

මේ සම්බන්ධව සිය Truth Social ගිණුමේ සටහනක් තබමින් අමෙරිකානු ජනාධිපති ඩොනල්ඩ් ට්‍රම්ප් සඳහන් කර ඇත්තේ එම නෞකාවට නතර කරන ලෙස අනතුරු අඟවා තිබූ නමුත් ඊට ප්‍රතිචාර නොදැක්වීමෙන් පසු අමෙරිකානු නාවික හමුදාව විසින් මෙම නෞකාව අල්ලා ගනු ලැබූ බවය.

අඩි 900කට ආසන්න දිගකින් යුත් මෙම නෞකාව ඉරාන ධජය සහිත TOUSKA නම් භාණ්ඩ ප්‍රවාහන නෞකාවක් බවත් එය සිය නාවික අවහිරය පසුකර යාමට උත්සාහ කළ බැවින් එය සිය භාරයට ගත් බව ට්‍රම්ප්ගේ එම සටහනේ සඳහන්ව තිබුණි.

එහිදී අදාළ නෞකාවට නවත්වන ලෙස අනතුරු ඇඟවීමක් සිදුකළ නමුත් ඔවුන් එම අනතුරු ඇඟවීම නොතකා ඔවුන් යාත්‍රා කිරීමෙන් අනතුරුව එම නෞකාවේ එන්ජින් කාමරයට ප්‍රහාරයක් එල්ල කර එය නැවැත්වූ බවත් අමෙරිකානු ජනාධිපතිවරයාගේ සටහනේ සඳහන්ව ඇත.

අදාළ නෞකාව ඉරාන වරායක් දෙසට යාත්‍රා කරමින් තිබී ඇති අතර අදාළ නෞකාව අමෙරිකානු නාවික හමුදා භාරයට ගැනීම සම්බන්ධව ඉරානයේද අවධානය යොමුව ඇත.

ඒ අනුව මේ සම්බන්ධව නිවේදනයක් යොමු කරමින් ඉරානය සඳහන් කර ඇත්තේ මෙම සිදුවීම සටන් විරාමය උල්ලංඝනය කිරීමක් බවත් සහ මෙය සන්නද්ධ මුහුදු කොල්ලකෑමේ ක්‍රියාවක් වන බවත්ය.

ඉරාන රාජ්‍ය මාධ්‍ය විසින් වාර්තා කර ඇති පරිදි ඉරානයේ ඉහළම හමුදා මූලස්ථානය වන කටම් අල් – අන්බියා හී ප්‍රකාශකයෙකු සඳහන් කර ඇත්තේ එක්සත් ජනපදය සටන් විරාමය උල්ලංඝනය කරමින් ඕමාන් මුහුදේදී ඉරානයේ වාණිජ නෞකාවකට වෙඩි තබා එහි නාවික පද්ධතිය අක්‍රීය කර ඇති බවය.

ඒ අනුව එක්සත් ජනපද නාවික හමුදාවේ මෙම සන්නද්ධ මුහුදු කොල්ලකෑමේ ක්‍රියාවට ඉරාන ඉස්ලාමීය ජනරජයේ සන්නද්ධ හමුදා ඉක්මනින් ප්‍රතිචාර දක්වනු ඇති බවත් ඉරානය අමෙරිකාවට අනතුරු ඇඟවීමක්ද සිදුකර තිබේ.

@sinhala.adaderana.lk