පුලුවන් නම් පලාත් සභා තියලා ජන බලය බලන්න – සජිත් ප්‍රේමදාස

සමගි ජන බල­වේ­ගය සහ එක්සත් ජාතික පක්ෂය යන පක්ෂ දෙක මේ වන විට එක්වී ඇති බව විපක්ෂ නායක සජිත් ප්‍රේම­දාස මහතා පව­සයි.

විපක්ෂ නාය­ක­ව­රයා මේ බව පැව­සුවේ ලෝක කම්කරු දිනය දා (01) කොළඹ මාලි­ගා­වත්ත පී.ඩී. සිරි­සේන ක්‍රීඩාං­ග­ණ­යේදී පැවති මැයි දින රැලි­යේදී අද­හස් දක්ව­මිනි.

‘වික­ල්පයේ මැයි දිනය’ සහ ‘පච මදි­වට හොරු’ යන තේමා යටතේ රැලිය සංවි­ධාන කර තිබුණි.

එහිදී විපක්ෂ නාය­ක­ව­රයා පැව­සුවේ සමගි ජන බල­වේ­ගයේ මැයි දින රැලි­යට හිටපු ජනා­ධි­පති රනිල් වික්‍ර­ම­සිංහ මහතා සුබ­පැ­තුම් පණි­වු­ඩ­යක් යොමු කර ඇති බවත් ඒ සඳහා තමන් සිය ස්තූතිය පළ කරන බවත්ය. එමෙන්ම අදාළ සුබ­පැ­තුම් පණි­වු­ඩය මඟින් හිටපු ජනා­ධි­ප­ති­ව­රයා සඳ­හන් කර ඇති පරිදි සමගි ජන බල­වේ­ගය සහ එක්සත් ජාතික පක්ෂය එක්ව ගම­නක් යෑම සඳහා කමි­ටු­වක් පත් කළ යුතු බව සඳ­හන් කර ඇති නමුත් පක්ෂ දෙක මේ වන විට එක්ව ඇති බැවින් එම කමිටු අවශ්‍ය නොවන බව ද සඳ­හන් කළේය.

රනිල් වික්‍ර­ම­සිංහ මහතා නිකුත් කර ඇති සුබ පැතුම් පණි­වු­ඩයේ වැඩි­දු­ර­ටත් පවසා ඇත්තේ වර්ත­මාන රජයේ නියම ස්වරූ­පය පෙන්ව­මින් හොර­කම්, වංචා, දූෂණ, තර්ජන ගර්ජන මනාව ඔප්පු කළ කාල­ප­රි­ච්ඡේ­ද­යක් ලෙස පසු­ගිය වර සැල­කිය හැකි බවත් ගල්අ­ඟුරු වංචාව, මහා භාණ්ඩා­ගා­රයේ අමෙ­රි­කානු ඩොලර් ලක්ෂ 25ක මංකො­ල්ලය ඒ අත­රින් මෑත­කා­ලයේ සිදුවූ මහා පරි­මාණ හොර­කම් බවයි.

තවද එක්සත් ජාතික පක්ෂය සහ සමගි ජන බල­වේ­ගය එකට ගම­නක් යෑම සඳහා සාකච්ඡා කිරී­මට පත් කළ කමි­ටුවේ වැඩ කට­යුතු ද ඉදි­රි­යට ගෙන යන ලෙසත් සිහි­පත් කර­මින් සමගි ජන බල­වේ­ගයේ මැයි දින රැලි­යට සිය සුබා­සිං­සන එක් කර­මින් හිටපු ජනා­ධි­පති රනිල් වික්‍ර­ම­සිංහ මහතා පක්ෂයේ මහ­ලේ­කම් රංජිත් මද්දු­ම­බ­ණ්ඩාර මහතා වෙත අදාළ ලිපිය යොමු කර තිබේ.

සමගි ජන බල­වේග මැයි දින රැලි­යේදී වැඩි­දු­ර­ටත් අද­හස් දැක්වූ විපක්ෂ නායක සජිත් ප්‍රේම­දාස මහතා මෙසේ ද පැව­සීය.

අද මේ රජය ආය­තන සිය­ල්ලක්ම විනාශ කර, අධ්‍යා­ප­න­යත් විනාශ කරලා. වරායේ ආර­ක්ෂා­වට ගැහුවා කන්ටේ­නර් පන්නලා. ගල්අ­ඟුරු හොර­කම් කර බාල ගල්අ­ඟුරු ගෙනාවා. අද­ටත් ඒ ගැන නිසි වග­කී­මක් කවු­රුත් අර­ගෙන නෑ. අපේ රටේ සම්පත් ඩොලර් ලක්ෂ 25ක් හොරා­කාලා තියෙ­නවා. කවු­රුත් ඒක ගැන වග­කී­මක් බාර­ගෙන නෑ. මේක වැඩ බැරි ආණ්ඩු­වක් කියන එක තවත් අමු­තු­වෙන් ඔප්පු කරන්න ඕන නෑ. මේ ආණ්ඩුව කිව්වේ හොරු අල්ල­නවා කියලා. හොරු අල්ල­න­වායි කියපු ආණ්ඩුව අද කරන්නේ හොරු හද­නවා. සමගි ජන බල­වේ­ගයේ අපේ සන්ධා­නය නොසි­ටින්න අද­ටත් පාසල් ළමයි අසභ්‍ය වීඩියෝ බල­නවා. සමගි ජන බල­වේ­ගය නොසි­ටින්න අද­ටත් වරා­යෙන් කන්ටේ­නර් පන්න­නවා. සමගි ජන බල­වේ­ගය නොසි­ටින්න අද­ටත් විදු­ලි­බල ඇමැති ඒ පුටුවේ ඉඳ­ගෙන බාල ගල්අ­ඟුරු ව්‍යාපෘ­තිය ක්‍රියා­වට නංව­නවා. සමගි ජන බල­වේ­ගය, සමගි ජන සන්ධා­නය නොසි­ටින්න අද­ටත් භාණ්ඩා­ගා­ර­යෙන් බිලි­යන ගණන් හොර­කම් කර­නවා.

මේ මැයි දිනේට අපි එන­කොට අනෙ­කුත් මැයි දින­ව­ලට වඩා වෙනස්. ජන­තා­වගේ මුහුණු දිහා බැලු­වාම අලුත් බලා­පො­රො­ත්තු­වක් තිබෙ­නවා, අලුත් අපේ­ක්ෂා­වක් තිබෙ­නවා කියා පේනවා. නියත වශ­යෙන්ම සමගි ජන­බ­ල­වේග නාය­ක­ත්වය තුළ මේ පච වැඩ කරන ආණ්ඩුව වෙනු­වට වැඩ කරන, රට දියුණු කරන රාජ්‍ය පාල­න­ය­කට අපි මුල පුර­නවා කියන එක මම ප්‍රකාශ කරන්න කැමැ­තියි.

රටට අවශ්‍ය ජන­තා­වට විස­ඳුම්, ජන­තා­වට මුහු­ණ­දෙන ගැට­ලු­ව­ලට උත්තර. අපි සූදා­නම් මේ උත්තර සප­යන්න. අපේ රටේ ගොවි, ධීවර, කම්කරු, ග්‍රාමීය, නාග­රික, වතු ප්‍රජාව දුගී දුප්පත් ජන­තාව අද අන්ත අස­ර­ණ­භා­ව­යට පත්වෙලා. කාන්තා පර­පුර, තරුණ පර­පුර, ළමා පර­පුර, ළදරු පර­පුර අද අන්ත අස­ර­ණ­භා­ව­යට පත්වෙලා. මැද පන්ති­යට, වෘත්ති­ය­වේ­දීන්ට, වෘත්ති­ක­යන්ට අද තමන්ගේ ප්‍රශ්න­යට විස­ඳු­මක් නැහැ. දිට්වා සුළි කුණා­ටු­වෙන් වහ­ලයේ තිබුණු ටක­රම අහිමි වුණු අය ලක්ෂ 10 බලා­පො­රො­ත්තු­වෙන් ඉන්නවා. ඉඩ­මක්, නි‍ෙව­සක් අහිමි වුණ අයට දෙන­වායි කියපු රුපි­යල් කෝටිය ලැබෙ­න­කම් බලා­ගෙන ඉන්නවා. දිට්වා සුළි කුණා­ටු­වෙන් විප­තට පත්වුණු ජන­තාව අම­තක කළ දේශ­පා­ලන සංස්කෘ­ති­යක් අද රටේ තිබෙන්නේ. අපි දේශ­පා­ලන පක්ෂ­යක් හැටි­යට අලුත් වෙන්න ඕනෑ, නවී­ක­ර­ණය වෙන්න ඕනෑ. සුපු­රුදු රාමු­වට කොටු වෙලා 76 වස­රක පරණ දේශ­පා­ලන ක්‍රමය වෙනු­වට විස­ඳුම් ලබා­දෙන වැඩ­පි­ළි­වෙ­ළ­කට යොමු­වෙන්න ඕනෑ. ඒ නිසා සක්වල, හුස්ම වැඩ­ස­ට­හන් අපි ඉදි­රි­ය­ටත් ක්‍රියා­ත්මක කර­නවා. ස්මාර්ට් රටක් ගොඩ­න­ඟන්න සුහුරු ක්‍රම­වේද අපි ක්‍රියා­ත්මක කර අලුත්ම ව්‍යාපෘ­ති­යක් හැටි­යට පාසල් පද­නම තුළ AI අධ්‍යා­ප­නය ලබා දෙන්නත් අපි ඒ වැඩ­පි­ළි­වෙ­ළත් ආරම්භ කර­නවා.

සමගි ජන බල­වේ­ගය, සමගි ජන සන්ධා­නය අනිත් විප­ක්ෂත් සමඟ එකතු වෙලා අපි බොරු සහ­තික තිබුණු කථා­නා­යක සති කිහි­ප­ය­කින් ගෙදර යැව්වා. බාල ගල්අ­ඟරු අපේ රටේ ලක්වි­ජය බලා­ගා­ර­යට යොමු කළ ඇමැ­ති­ව­ර­යා­වත් ගෙදර යැව්වා. ලේක­ම්වත් ගෙදර යැව්වා. විවිධ කණ්ඩා­යම් ඉන්නවා රජයේ කොන්ත්‍රාත් කර­නවා. ආණ්ඩු වෙනු­වෙන් විප­ක්ෂය ගැන එක එක කතා කිය­නවා. ඵල ඇති රුක­ටයි ගල් ගහන්නේ. පැහැ­දි­ලිව මම කියන්න කැමැ­තියි රට ගොඩ­න­ඟන එකම බල­වේ­ගය සමගි ජන බල­වේ­ග­යයි, සමගි ජන සන්ධා­න­යයි. අපි මේ රටේ ප්‍රග­ති­ශීලී සිය­ලුම දෙනාත් සමඟ අත්වැල් බැඳ­ගෙන ජවිපෙ පාල­න­යෙන් කඩා වැටුණු අපේ මේ දේශය ගොඩ­ග­න්නවා ගොඩ­ග­න්න­වා­මයි.

අපි ඉතා­මත්ම සතුටු වෙනවා, රනිල් වික්‍ර­ම­සිංහ මහතා අද අපේ මේ මැයි රැලි­යට සුබ­පැ­තුම් පණි­වි­ඩ­යක් එකතු කළා. ඒකට අපි ස්තූති­වත්ත වෙනවා. එතුමා යෝජනා කර තියෙ­නවා. එකට වැඩ කරන්න කමි­ටු­වක් අව­ශ්‍යයි කියලා. දැන් කමිටු අවශ්‍ය නෑ. දැන් දෙගොල්ලේ එකතු වෙලා හමා­රයි. අපි එකට වැඩ කරන්නේ මොකද සම­හර විට ඔය කමි­ටු­වල මේ එක­තු­වීම වළ­ක්වන්න ඇතුළු වන බොහොම සුළු කොට්ඨා­ස­යක් ඉන්නවා. ඒ අයගේ බලා­පො­රො­ත්තුව අපේ මේ එක­තුව කඩා­ක­ප්පල් කර­න්නයි. අපි ඒ කඩා­ක­ප්ප­ල්කාරී කුම­න්ත්‍ර­ණ­කා­රීන්ට ඉඩ තබන්නේ නෑ. අපි අනි­වා­ර්ය­යෙන්ම එකට එකතු වෙලා තමයි ඉදි­රි­යට යන්නේ.

මම අභි­යෝ­ග­යක් ඉදි­රි­පත් කරන්න කැම­තියි. පුළු­ව­න්නම් පළාත් සභා ඡන්දය තියන්න. කල් අර­ගෙන නෙමෙයි දැන්ම තියන්න. මේක ප්‍රකා­ශ­යක් නෙමෙයි මේක අභි­යෝ­ග­යක්. මේ අති­සා­ර්ථක මැයි දින රැලිය ඔබ සියලු දෙනා­ගේම ශක්ති­යෙන් සාර්ථක මැයි රැලි­යක් බවට පත්වුණා. පළාත් සභා මැති­ව­රණ තිබු­ණොත් ලබන වසරේ මැයි රැලිය තියන්නේ අපේ මහ ඇමැ­ති­ව­රුත් එක්ක කියන එක මම ප්‍රකාශ කරන්න කැමැ­තියි.

සමගි ජන බල­වේ­ගයේ සියලු පක්ෂ සාමා­ජි­ක­යන්, නිල­ධාරි මණ්ඩ­ලය ඇතුළු දිව­යිනේ නන්දෙ­සින් පැමිණි විශාල පක්ෂ පාක්ෂි­කයෝ පිරි­සක් මේ අව­ස්ථා­වට එක්ව සිටි­යහ.

@දිනමිණ