සෞඛ්ය ක්ෂේත්රය නවීන තාක්ෂණයෙන් බලගන්වන්න රුසියාවේ සහය
සෞඛ්ය සේවාව AI තාක්ෂණය ඇතුළු නවීන තාක්ෂණයෙන් බලගැන්වීමට සහ මෙරට වෛද්යවරුන්ට ඉහළ වෛද්ය අධ්යාපනයක් ලබාදීමට රුසියාව එකඟ වූ බව සෞඛ්ය හා ජනමාධ්ය ඇමැති වෛද්ය නලින්ද ජයතිස්ස මහතා පැවැසීය.
මෙරට ප්රාථමික සෞඛ්ය සේවා පද්ධතිය ඇතුළු සෞඛ්ය පද්ධතිය නංවාලීමට ද රුසියාවෙන් පූර්ණ සහය ලැබී ඇතැයි ඇමැතිවරයා පැවසුවේය.
තෙදින නිල සංචාරයක් සඳහා පෙරේදා (03) මෙරටට පැමිණි රුසියානු සමූහාණ්ඩුවේ සෞඛ්ය අමාත්ය මිහායිල් මුරාෂ්කෝ (Mr.Mikhail Murashko) මහතා ඇතුළු නියෝජිත පිරිස ඊයේ (04) සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස මහතා සහ සෞඛ්ය හා ජනමාධ්ය අමාත්යාංශයේ ප්රධාන නිලධාරීන් හමුවී මෙරට ප්රාථමික සෞඛ්ය සේවාව සහ තාක්ෂණික කරුණු කිහිපයක් පිළිබඳ විශේෂ සාකච්ඡාවක් පවත්වන ලදි. ඒ අවස්ථාවේ දී ඇමැතිවරයා මේ බව කියා සිටියේය.
සෞඛ්ය හා ජනමාධ්ය අමාත්යාංශයේදී පැවැති මෙම සාකච්ඡාව සඳහා සෞඛ්ය නියෝජ්ය අමාත්ය වෛද්ය හංසක විජේමුණි මහතා සහ ශ්රී ලංකාවේ රුසියානු තානාපති ලෙවාන් ජගාරෙයාන් මහතා ද එක්ව සිටි අතර, මෙහිදී ප්රාථමික සෞඛ්ය සේවාව සංවර්ධනය සහ AI තාක්ෂණය ඇතුළු නවීන තාක්ෂණයෙන් සෞඛ්ය සේවාව බලගැන්වීම පිළිබඳ වැඩි අවධානයක් යොමු කරමින් දෙපාර්ශ්වය අතර අදහස් හුවමාරු කර ගැනිණි.
මෙම සාකච්ඡාවේ දී දෙරට අතර පැවැති මීත්රශීලී සහයෝගිතාවන් සිහිපත් කළ රුසියානු සමූහාණ්ඩුවේ සෞඛ්ය අමාත්ය මිහායිල් මුරාෂ්කෝ (Mr.Mikhail Murashko) මහතා ඉදිරියේ දී මෙරට සෞඛ්ය පද්ධතිය දියුණු කිරීමට තම රටේ සහයෝගය ලබාදීමට බලාපොරොත්තු වන බවත්, ලාංකික සහෝදර ජනතාව වෙනුවෙන් වන මිත්රශීලී සහයෝගිතාවන් වර්ධනය කර ගනිමින් සහයෝගිතාවන් තවත් ඉහළ නැංවීමට බලාපොරොත්තු වන බව ද පැවසීය.
රුසියානු සමූහාණ්ඩුව ප්රාථමික සෞඛ්ය සේවාව සඳහා ප්රමුඛතාව ලබාදෙමින් සිය ජනතාවට ප්රශස්ත සෞඛ්ය සේවාවක් ලබාදීමට සැලසුම් සහගත ක්රමවේද රැසක් අනුගමනය කර තිබෙන බවත්, එහිදී ඊට අවශ්ය වෛද්ය උපකරණ ද AI තාක්ෂණය ඇතුළු නවීනතම තාක්ෂණය යොදා ගනිමින් නිෂ්පාදනය කර ඇති බවත් රුසියානු සෞඛ්ය අමාත්යවරයා සෞඛ්ය හා ජනමාධ්ය අමාත්යවරයා ඇතුළු නිලධාරීන් දැනුවත් කරන ලදි.
එහිදී කෘෂිකාර්මික ප්රදේශයන්හි හා නගරබද ජනතාවගේ විවිධ රෝග 42 ක් හඳුනා ගැනීම සහ විනිශ්චය (රසායනාගාර සේවා සහ ළමා රෝග) සඳහා AI තාක්ෂණය යොදාගනිමින් නිෂ්පාදනය කර ඇති නවීන තාක්ෂණික උපකරණ පද්ධතියක් පිළිබඳ ද අමාත්යවරයා දැනුවත් කිරීමට කටයුතු කෙරිණි.
රුසියානු සමූහාණ්ඩුවේ ක්රියාත්මක සෞඛ්ය සේවා පද්ධතිය පිළිබඳ අවබෝධයක් ලබාගැනීම සඳහාත්, නවීන තාක්ෂණික වෛද්ය උපකරණ ඇතුළු නවීන AI තාක්ෂණය මුසු කර ගත් නවීන ප්රතිකාර සේවා පිළිබඳ අධ්යයනය සඳහාත්, සෞඛ්ය හා ජනමාධ්ය අමාත්ය නලින්ද ජයතිස්ස මහතා ඇතුළු නිලධාරීන්ට රුසියානු සමූහාණ්ඩුවේ නිල සංචාරයකට ඇරයුම් කරන බව ද ඊට අදාළ සියලු කටයුතු සූදානම් කළ හැකි බව ද රුසියානු සමූහාණ්ඩුවේ සෞඛ්ය අමාත්ය මිහායිල් මුරාෂ්කෝ මහතා මෙහි දී පැවසීය.
එමෙන්ම බලශක්තිය ඇතුළු මෙරට පවතින ගැටලුවලින් අත්මිදීම සඳහා මිත්රශීලීව සහයෝගය ලබාදීමට සූදානම් බව අවධාරණය කළ මිහායිල් මුරාෂ්කෝ මහතා දෙරට අතර ඖෂධ නිෂ්පාදන සහ සැපයුම් දාමය ශක්තිමත් කිරීමට අපේක්ෂා කරන බව ද පැවසීය.
මෙරට වෛද්යවරුන් සඳහා වැඩිදුර වෛද්ය අධ්යාපනයක් ලබාදීමට රුසියාව සූදානම් බවත්, ඉදිරියේදී රුසියානු සමූහාණ්ඩුවේ සෞඛ්ය අමාත්යාංශය සහ ශ්රී ලංකාවේ සෞඛ්ය හා ජනමාධ්ය අමාත්යාංශය අතර අවබෝධතා ගිවිසුමක් අත්සන් කිරීම මඟින් අන්යොන්ය සම්බන්ධීකරණයක් තුළ ප්රශස්ත ඉදිරි ගමනක් යා හැකි බවත් රුසියානු සමූහාණ්ඩුවේ සෞඛ්ය අමාත්යවරයා පැවසීය.
සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස මහතා මෙහිදී අදහස් දක්වමින් කියා සිටියේ තෙදින නිල සංචාරයක් සඳහා එක්වෙමින් මෙරට සෞඛ්ය සේවාව ඉහළ නැංවීමට අදහස් කිරීම පිළිබඳ සිය ස්තුතිය පුද කරන බවත් මෙරට ප්රාථමික සෞඛ්ය සේවාව ශක්තිමත් කිරීම සඳහා ක්රියාත්මක නවමු වැඩපිළිවෙළ පිළිබඳ සහ එහිදී නවීන තාක්ෂණය ඊට අනුගත කිරීමේ අවශ්යතාව සහ නවීන තාක්ෂණික උපකරණවල අවශ්යතාව පෙන්වාදීම සම්බන්ධයෙන් ස්තුතිය පුද කරන බවත්ය.
මෙම සාකච්ඡාවෙන් පසුව සෞඛ්ය අමාත්යාංශයේ නිලධාරීන් සහ ප්රධාන ආයතන භාර නිලධාරීන් සමඟ අමාත්යවරුන් දෙදෙනා විශේෂ සාකච්ඡාවක් ද පැවැත්වීය.
මෙම සාකච්ඡාව සඳහා සෞඛ්ය හා ජනමාධ්ය අමාත්යාංශයේ ලේකම් විශේෂඥ වෛද්ය අනිල් ජාසිංහ, සෞඛ්ය සේවා අධ්යක්ෂ ජනරාල් වෛද්ය අසේල ගුණවර්ධන, අතිරේක ලේකම් (පාලන) I ජී.එම් ජනක කිත්සිරි, අතිරේක ලේකම් (වෛද්ය සේවා) කුමාර වික්රමසිංහ, අධ්යක්ෂ (ජාත්යන්තර සෞඛ්ය) වෛද්ය අනිල් සමරනායක, නියෝජ්ය අධ්යක්ෂ ජනරාල් (වෛද්ය සේවා) I වෛද්ය එච්.එම්. අර්ජුන තිලකරත්න, නියෝජ්ය අධ්යක්ෂ ජනරාල් (සැලසුම්) විශේෂඥ වෛද්ය එස්. ශ්රීධරන් මහත්වරු එක්ව සිටියහ.
@දිනමිණ
Discover more from cmn.lk
Subscribe to get the latest posts sent to your email.
