වියට්නාම් ජනාධිපති අද (07) රාත්රි දිවයිනට ළඟා විය
වියට්නාම් සමාජවාදී ජනරජයේ ජනාධිපති සහ වියට්නාම් කොමියුනිස්ට් පක්ෂයේ මධ්යම කමිටුවේ මහලේකම් ටෝ ලාම් (TO LAM) මහතා, රාජ්ය සංචාරයක් සඳහා අද (07) රාත්රි දිවයිනට ළඟා විය.
ශ්රී ලංකාව සහ වියට්නාම් රාජ්යය අතර රාජ්යතාන්ත්රික සබඳතා ස්ථාපිත කිරීමේ 55වන සංවත්සරය සැමරීම සඳහා, ජනාධිපති අනුර කුමාර දිසානායක මහතා 2025 වසරේ සිදු කළ එරට සිදු කළ රාජ්ය සංචාරයේදී කළ ආරාධනාවට අනුව, වියට්නාම ජනාධිපතිවරයාගේ මෙම රාජ්ය සංචාරය සිදු වේ.
වත්මන් රජය යටතේ ආර්ථික ස්ථාවරභාවය ළඟා කර ගනිමින් ශ්රී ලංකාව ඉදිරියට ගමන් කරමින් සිටින මොහොතක මෙම සංචාරය සිදු වීම විශේෂත්වයකි. වියට්නාම් ජනාධිපතිවරයකු මෙරට සංචාරයේ නිරත වන්නේ වසර 15කට පසුවය.
ලෝකයේ ප්රධාන නිෂ්පාදන කේන්ද්රස්ථානයක් බවට පත්වෙමින් වර්තමානයේ ලෝකයේ වේගයෙන්ම වර්ධනය වන ආර්ථිකයන් අතර ඉදිරියෙන්ම සිටින රාජ්යයක් වන වියට්නාම්හි ශක්තිමත් දේශපාලන සහ ආර්ථික දර්ශනය හඳුනාගනිමින් දෙරට අතර සහයෝගීතාව වර්ධනය කර ගැනීම, ශ්රී ලංකාවේ කාර්මීකරණ ක්රියාවලියට සහ විදේශ වෙළඳපොළ ජය ගැනීමට වියට්නාම් ජනාධිපතිවරයාගේ මෙම රාජ්ය සංචාරය වැදගත් අවස්ථාවක් වනු ඇත.
විශේෂයෙන්ම නිපැයුම් සහ අපනයන ක්ෂේත්රයේ වියට්නාම් රාජ්යය ලබා ඇති අත්දැකීම් මෙරටට ලබා ගැනීමටත්, දෙරට අතර සෘජු විදේශ ආයෝජන ප්රවර්ධනය කිරීමටත් මෙය අවස්ථාවක් වනු ඇත. කෘෂිකාර්මික නවීකරණය සහ සංචාරක කර්මාන්තය වැනි අංශයන්හි සහයෝගීතාව වර්ධනය කර ගැනීම හරහා නව රැකියා අවස්ථා උත්පාදනය කර ගැනීමේ හැකියාව මෙන්ම, අග්නිදිග ආසියානු කලාපය තුළ ප්රබල වෙළෙඳ මධ්යස්ථානයක් වන වියට්නාම් රාජ්යය සමග පවත්වන සමීප සබඳතා මගින් ජාත්යන්තර වෙළඳපොළට පිවිසීමට ශ්රී ලංකාවට නව මාවත් විවර වනු ඇත.
මීට අමතරව, වියට්නාමය සතු ශක්තිමත් කාර්මික පදනම සහ තාක්ෂණික දියුණුව මෙරට කුඩා සහ මධ්යපරිමාණ ව්යවසායකයන්ට නව තාක්ෂණය හඳුන්වා දීම සඳහා වන උත්සාහයටද දෙරට අතර ද්විපාර්ශ්වික වෙළෙඳ ගිවිසුම් ශක්තිමත් කිරීම මඟින් ශ්රී ලංකාවේ නිෂ්පාදිත භාණ්ඩ සඳහා එරට වෙළෙඳපොළ තුළ වැඩි ඉඩකඩක් වෙන් කරවා ගැනීමටද අවස්ථාව සැලසේ. විශේෂයෙන්ම ඩිජිටල් ආර්ථිකය සහ තොරතුරු තාක්ෂණය වැනි ක්ෂේත්රයන්හි දැනුම හුවමාරු කර ගැනීම මගින් මෙරට තරුණ පරපුරට ගෝලීය රැකියා වෙළෙඳපොළට පිවිසීමට දොරටු විවර කිරීම සඳහා මෙම රාජ්යතාන්ත්රික සබඳතාව වැදගත් වේ. එබැවින් මෙය දෙරටේම ආර්ථික සමෘද්ධිය උදෙසා දිගුකාලීන උපායමාර්ගික හවුල්කාරිත්වයක් ගොඩනැගීමට ලැබෙන මහඟු අවස්ථාවක් ලෙස සැලකිය හැකිය.
වියට්නාම් සමාජවාදී ජනරජයේ ජනාධිපති සහ වියට්නාම් කොමියුනිස්ට් පක්ෂයේ මධ්යම කමිටුවේ මහලේකම් ටෝ ලාම් මහතා පිළිගැනීමේ නිල උත්සවය ජනාධිපති අනුර කුමාර දිසානායක මහතාගේ ප්රධානත්වයෙන් හෙට (08) ජනාධිපති කාර්යාල පරිශ්රයේදී පැවැත්වෙන අතර ජනාධිපති ටෝ ලාම් මහතා සහ ජනාධිපති අනුර කුමාර දිසානායක මහතා අන්යෝන්ය වශයෙන් වැදගත් කරුණු රැසක් පිළිබඳව ද්විපාර්ශ්වික සාකච්ඡා පැවැත්වීමට නියමිතය. ඉන් අන්තුරුව වියට්නාම් රාජ්ය නියෝජිතයින් සහ ශ්රී ලංකා රජයේ නියෝජිතයින් අතරද ක්ෂේත්ර රැසක් ඔස්සේ සාකච්ඡා පැවැත්වීමට නියමිතය.
මෙම ඉහළපෙළෙහි රාජ්යතාන්ත්රික සාකච්ඡාවලින් අනතුරුව විවිධ ක්ෂේත්රවල සහයෝගීතාව පුළුල් කිරීම සඳහා දෙරටේ පොදු කැපවීම පිළිබිඹු කරමින්, අවබෝධතා ගිවිසුම් කිහිපයකට අත්සන් තැබීමට නියමිත අතර, ඉන් අනතුරුව දෙරටේ නායකයින් විසින් ඒකාබද්ධ මාධ්ය ප්රකාශයක් සිදු කරනු ලැබීමට නියමිතය.
අනතුරුව, වියට්නාම් ජනාධිපතිවරයා කොළඹ මහජන පුස්තකාල පරිශ්රයේ ස්ථාපිත හෝ චි මිං පිළිරුවට පුෂ්පෝපහාර දැක්වීමටද, කොළඹ මහජන පුස්තකාලයේ පිහිටා ඇති වියට්නාම්-හෝ චි මිං කලාපයේ (Vietnam-Ho Chi Minh Space) ඇති ඓතිහාසික ඡායාරූප එකතුව නැරඹීමටද නියමිතය.
ඉන් අනතුරුව, වියට්නාම් ජනාධිපතිවරයා ශ්රී ලංකා පාර්ලිමේන්තුව අමතා විශේෂ දේශනයක් සිදු කරනු ඇත.
අග්රාමාත්ය ආචාර්ය හරිනි අමරසූරිය මහත්මිය, කථානායක වෛද්ය ජගත් වික්රමරත්න මහතා සහ තවත් දේශපාලන නියෝජිතයන් සමග වියට්නාම් ජනාධිපතිවරයා හෙට (08) දිනයේදී සාකච්ඡා කිහිපයකටම එක් වනු ඇත.
කොළඹ හිල්ටන් හෝටලයේ පැවැත්වෙන ශ්රී ලංකාව සහ වියට්නාමය අතර පවතින ද්වීපාර්ශ්වික සබඳතා සහ සංස්කෘතික අනන්යතාව පිළිඹිබු කෙරෙන ඡායාරූප ප්රදර්ශනයට සහ වියට්නාමයට ආවේණික වූ නිෂ්පාදන, සාම්ප්රදායික අත්කම් නිර්මාණ සහ එරට නවීන කාර්මික නිපැයුම් ප්රදර්ශනයටද වියට්නාම් ජනාධිපතිවරයා හෙට (08) දිනයේ සහභාගි වනු ඇත.
අනතුරුව, ජනාධිපති ටෝ ලාම් මහතා ශ්රී ලංකා – වියට්නාම් වෙළෙඳ, ආයෝජන සහ සංචාරක සංසදයේ ප්රධාන දේශනය සිදු කිරීමට නියමිතය. අග්රාමාත්ය ආචාර්ය හරිනි අමරසූරිය මහත්මියද ශ්රී ලංකා – වියට්නාම් වෙළෙඳ, ආයෝජන සහ සංචාරක සංසදය ඇමතීමට නියමිත අතර වියට්නාම් එයාර්ලයින්ස් (Viet Nam Airlines) සහ වියට්ජෙට් එයාර් (VietJet Air) මගින් ක්රියාත්මක කරනු ලබන කොළඹ සහ හෝ චි මිං නගරය/හැනොයි අතර සෘජු ගුවන් ගමන් සේවාව නිල වශයෙන් ආරම්භ කිරීමද ඊට අදාළ ගිවිසුම් හුවමාරු කර ගැනීමද මෙහිදී සිදු කෙරේ.
ශ්රී ලංකා – වියට්නාම් ව්යාපාරික හමුවට සහභාගී වීමෙන් අනතුරුව හෙට (08) රාත්රියේ දී වියට්නාම් ජනාධිපතිවරයා ඇතුළු දූත පිරිස රාජ්ය සංචාරය අවසන් කර දිවයිනෙන් පිටත්ව යාමට නියමිතය.
Discover more from cmn.lk
Subscribe to get the latest posts sent to your email.
